സംസ്കൃത സര്വകലാശാലയിൽ ബിരുദ കോഴ്സുകൾ
കാലടി: ശ്രീ ശങ്കരാചാര്യ സംസ്കൃത സര്വകലാശാലയുടെ കാലടി മുഖ്യകേന്ദ്രത്തിലും വിവിധ പ്രാദേശിക കേന്ദ്രങ്ങളിലും 20172018 അധ്യയന വര്ഷത്തിലെ വിവിധ ബിരുദ പ്രോഗ്രാമുകളിലേക്ക് അപേക്ഷ ക്ഷണിച്ചു. സംസ്കൃതം സാഹിത്യം, സംസ്കൃതം വേദാന്തം, സംസ്കൃതം വ്യാകരണം, സംസ്കൃതം ന്യായം, സംസ്കൃതം ജനറല്, സാന്സ്ക്രിറ്റ് ആന്ഡ് ഇന്ഫര്മേഷന് ടെക്നോളജി, സംഗീതം (വായ്പാട്ട്), ഡാന്സ് (ഭരതനാട്യം, മോഹിനിയാട്ടം) എന്നീ വിഷയങ്ങളില് ചോയ്സ് ബേസ്ഡ് ക്രെഡിറ്റ് ആന്ഡ് സെമസ്റ്റര് സമ്പ്രദായത്തിലും, പെയിന്റിംഗ്, മ്യൂറല് പെയിന്റിംഗ്, സ്കള്പ്ചര് വിഷയങ്ങള്ക്ക് മാര്ക്ക് സമ്പ്രദായത്തിലുമായിരിക്കും കോഴ്സുകള് നടത്തപ്പെടുക.
മുഖ്യ കേന്ദ്രമായ കാലടിയില് സംസ്കൃത വിഷയങ്ങള് കൂടാതെ സംഗീതം, നൃത്തം എന്നീ കലാ വിഭാഗങ്ങള് മുഖ്യ വിഷയമായി ത്രിവത്സര ബിഎ ബിരുദ കോഴ്സുകളിലേക്കും പെയിന്റിംഗ്, മ്യൂറല് പെയിന്റിംഗ്, സ്കള്പ്ചര് വിഷയങ്ങളില് നാലു വര്ഷത്തെ ബിഎഫ്എ ബിരുദ കോഴ്സുകളിലേക്കും പ്രവേശനം നല്കുന്നു. സര്വകലാശാലയുടെ തിരുവനന്തപുരം (സംസ്കൃതം ന്യായം, വ്യാകരണം, വേദാന്തം, സാഹിത്യം), പന്മന (സംസ്കൃതം വേദാന്തം), ഏറ്റുമാനൂര് (സംസ്കൃതം സാഹിത്യം) തുറവൂര് (സംസ്കൃതം സാഹിത്യം), കൊയിലാണ്ടി (സംസ്കൃതം സാഹിത്യം, വേദാന്തം, ജനറല്), തിരൂര് (സംസ്കൃതം വ്യാകരണം), പയ്യന്നൂര് (സംസ്കൃതം വ്യാകരണം, വേദാന്തം, സാഹിത്യം) എന്നീ പ്രാദേശിക കേന്ദ്രങ്ങളില് വിവിധ സംസ്കൃത വിഷയങ്ങളിലാണ് പ്രവേശനം നല്കുന്നത്. സംസ്കൃത വിഷയങ്ങളില് ബിരുദ പഠനത്തിന് പ്രവേശനം നേടുന്ന മുഴുവന് വിദ്യാര്ഥികള്ക്കും പ്രതിമാസം 250 രൂപ വീതം സ്കോളര്ഷിപ്പ് നല്കും.
പ്ളസ് ടു/ വൊക്കേഷണല് ഹയര് സെക്കൻഡറി അഥവാ തത്തുല്യ അംഗീകൃത യോഗ്യതയുള്ളവര്ക്ക് (രണ്ട് വര്ഷം) മേല് പറഞ്ഞ കോഴ്സുകളിലേക്ക് അപേക്ഷിക്കാം. നൃത്തം (മോഹിനിയാട്ടം, ഭരതനാട്യം), സംഗീതം, പെയിന്റിംഗ്, മ്യൂറല് പെയിന്റിംഗ്, സ്കള്പ്ചര് എന്നിവ മുഖ്യ വിഷയമായ പ്രോഗ്രാമുകള്ക്ക് അഭിരുചി നിര്ണയ പരീക്ഷയുടെ കൂടി അടിസ്ഥാനത്തിലായിരിക്കും പ്രവേശനം നല്കുന്നത്. പ്രായം 2017 ജൂണ് ഒന്നിന് 22 വയസില് കൂടുതല് ആകരുത്.
താത്പര്യമുള്ള വിദ്യാര്ഥികള്ക്ക് സര്വകലാശാല വെബ്സൈറ്റായ wwwss.su.ac.in/ wwwss.su.online.org വഴി അപേക്ഷ സമര്പ്പിക്കാവുന്നതാണ്. തുടർന്ന്,ഓണ്ലൈന് അപേക്ഷയുടെ പ്രിന്റ് കോപ്പിയും നിര്ദിഷ്ട യോഗ്യത തെളിയിക്കുന്ന സര്ട്ടിഫിക്കറ്റുകളും (എസ്എസ്എല്സി, പ്ലസ് ടു) സംവരണാനുകൂല്യം തെളിയിക്കുന്നതിനുള്ള സാക്ഷ്യപ്പെടുത്തിയ പകര്പ്പുകളും യൂണിയന് ബാങ്കില് 50 രൂപ അടച്ച ചലാനും (എസ് സി, എസ്ടി വിദ്യാര്ഥികള്ക്ക് 10 രൂപ) ഉള്പ്പെടെ അതതു കേന്ദ്രങ്ങളിലെ വകുപ്പ് അധ്യക്ഷന്മാര്ക്ക്/ ഡയറക്ടര്മാര്ക്ക് സമര്പ്പിക്കേണ്ടതാണ്. പ്രോസ്പെക്ടസും/ ബാങ്ക് ചലാനും wwwss.su.ac.in/ wwwss.suonline.org എന്നീ വെബ്സൈറ്റുകളില് ലഭ്യമാണ്.
അപേക്ഷകള് ഓണ്ലൈന് വഴി സമര്പ്പിക്കേണ്ട അവസാന തീയതി ജൂണ് 24. ഓണ്ലൈന് അപേക്ഷയുടെ പ്രിന്റ് കോപ്പിയും സര്ട്ടിഫിക്കറ്റുകളുടെ പകര്പ്പും ലഭിക്കേണ്ട അവസാന തീയതി ജൂണ് 30.