യുഎസ് വ്യോമാക്രമണത്തിൽ 33 സിവിലിയൻമാർ കൊല്ലപ്പെട്ടു : Deepika.com International News |

Click here for detailed news of all items

യുഎസ് വ്യോമാക്രമണത്തിൽ 33 സിവിലിയൻമാർ കൊല്ലപ്പെട്ടു

Wednesday, March 22, 2017 11:57 AM IST

ഡമാസ്കസ്: വടക്കൻ സിറിയയിൽ ഐഎസ് ആസ്ഥാനമായ റാഖായ്ക്കു സമീപം യുഎസ് സഖ്യസേന നടത്തിയ വ്യോമാക്രമണത്തിൽ 33 സാധാരണക്കാർ കൊല്ലപ്പെട്ടു. യുദ്ധത്തിൽ ഭവനരഹിതരായവരെ പാർപ്പിച്ചിരുന്ന അൽമൻസൂറയിലെ സ്കൂൾ കെട്ടിടം ചൊവ്വാഴ്ചത്തെ ആക്രമണത്തിൽ പൂർണമായി തകർന്നു. അന്പതോളം കുടുംബങ്ങളാണ് ഇവിടെ അഭയം തേടിയിരുന്നത്. 33 പേരുടെ മരണം സ്ഥിരീകരിക്കാനായെന്നും മരണസംഖ്യ ഇനിയും ഉയരാൻ സാധ്യതയുണ്ടെന്നും സിറിയൻ ഒബ്സർവേറ്ററി പറഞ്ഞു.

കെട്ടിടാവശിഷ്ടങ്ങൾക്കിടയിൽനിന്നു രണ്ടുപേരെ ജീവനോടെ പുറത്തെടുത്തതായി ഒബ്സർവേറ്ററി മേധാവി റമി അബ്ദൽ റഹ്‌മാൻ പറഞ്ഞു. ആലപ്പോ, റാഖാ, ഹോംസ് പട്ടണങ്ങളിൽനിന്ന് എത്തിയ അഭയാർഥികൾ താമസിച്ചിരുന്ന സ്കൂൾ കെട്ടിടത്തിനു നേർക്കാണ് ആക്രമണം നടന്നത്.

ഐഎസിനെ റാഖായിൽനിന്നു തുരത്താനാ‍യി 2014മുതൽ യുഎസ് സഖ്യസേന നിരന്തരമായി ആക്രമണം നടത്തിവരികയാണ്. സിവിലിയന്മാർ കൊല്ലപ്പെട്ട സംഭവത്തെക്കുറിച്ച് അന്വേഷണം നടത്തുമെന്നു പെന്‍റഗൺ അറിയിച്ചു.

ഐഎസിനെ പരാജയപ്പെടുത്തുന്നതിനുള്ള യുഎസിന്‍റെ പദ്ധതികളെക്കുറിച്ചു ചർച്ച ചെയ്യുന്നതിന് വാഷിംഗ്ടണിൽ 68രാജ്യങ്ങളുടെ പ്രതിനിധികൾ യോഗം ചേരാനിരിക്കേയാണ് റാഖായിൽ യുഎസ് ആക്രമണത്തിൽ സിവിലിയന്മാർ കൊല്ലപ്പെട്ടത്.

സിറിയയിലും ഇറാക്കിലും ഐഎസിനെതിരേ യുഎസ് സഖ്യസേന നടത്തിയ ആക്രമണങ്ങളിൽ 220 സിവിലിയന്മാർക്കു ജീവഹാനി നേരിട്ടതായി ഔദ്യോഗിക കേന്ദ്രങ്ങൾ സമ്മതിച്ചിട്ടുണ്ട്. എന്നാൽ യഥാർഥ മരണസംഖ്യ ഇതിലും ഏറെയാണെന്ന് നിരീക്ഷകർ പറയുന്നു.യുഎസിനു പുറമേ റഷ്യയും ജിഹാദികൾക്ക് എതിരേ സിറിയയിൽ വ്യോമാക്രമണം നടത്തുന്നുണ്ട്. അസാദിന്‍റെ സൈന്യത്തെ സഹായിക്കാൻ റഷ്യ നടത്തുന്ന ആക്രമണങ്ങളിലും സിവിലിയന്മാർക്കു ജീവഹാനി നേരിടുന്നു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.