ശബരിമലയില്‍ ഇന്നു നട തുറക്കും
ശബരിമല: അയ്യപ്പമന്ത്രങ്ങളുമായി എത്തുന്ന ലക്ഷകണക്കിനു തീര്‍ഥാടകര്‍ക്കു സ്വാഗതമോതി ശബരിമല അയ്യപ്പക്ഷേത്രം മണ്ഡല മഹോത്സവത്തിനായി ഇന്നു വൈകുന്നേരം 5.30-നു തുറക്കും. തന്ത്രി കണ്ഠര് രാജീവരുടെ സാന്നിധ്യത്തില്‍ മേല്‍ശാന്തി എന്‍.ബാലമുരളിയാണ് നട തുറന്നു ശ്രീകോവിലില്‍ ദീപം തെളിക്കുന്നത്. പിന്നാലെ അദ്ദേഹം 18-ാം പടിയിറങ്ങി ആഴി തെളിക്കും. ഇതോടെ മണ്ഡലകാലത്തിനു ശബരിമലയില്‍ തുടക്കമാകും.

നട തുറക്കുന്ന പുണ്യദിനത്തില്‍ ദര്‍ശനം നടത്താന്‍ ഇപ്പോള്‍തന്നെ നൂറുകണക്കിന് അയ്യപ്പഭക്തന്മാര്‍ പമ്പയിലെത്തി തുടങ്ങി. ഇന്ന് ഉച്ചകഴിഞ്ഞു മാത്രമേ ഇവരെ സന്നിധാനത്തേക്ക് കടത്തിവിടുകയുള്ളൂ. പുതിയ ശബരിമല മേല്‍ശാന്തി വൈക്കം തെക്കേനട ആറാട്ടുകുളങ്ങര പ്രണവത്തില്‍ എന്‍.ദാമോദരന്‍പോറ്റിയും മാളികപ്പുറം മേല്‍ശാന്തി കൂത്താട്ടുകുളം കാരമല കാരിക്കോട് ഇല്ലത്ത് എ.എന്‍.ഉണ്ണിക്കൃഷ്ണന്‍ നമ്പൂതിരിയുമാകും നട തുറന്നാല്‍ ആദ്യം പതിനെട്ടാം പടി കയറുന്നത്.

ശബരിമല, മാളികപ്പുറം മേല്‍ശാന്തിമാരുടെ സ്ഥാനാഭിഷേക ചടങ്ങുകള്‍ ഇന്നു രാത്രി സന്നിധാനത്തു നടക്കും. തന്ത്രി കണ്ഠര് രാജീവരുടെ കാര്‍മികത്വത്തിലാണ് ചടങ്ങുകള്‍ നടക്കുന്നത്. തുടര്‍ന്നു രാത്രി പത്തിനു മേല്‍ശാന്തി ബാലമുരളി നട അടച്ചു താക്കോല്‍ ദേവസ്വം അധികൃതര്‍ക്കു കൈമാറുന്നതോടെ അദ്ദേഹത്തിന്റെ ഒരു വര്‍ഷത്തെ അയ്യപ്പപൂജ അവസാനിക്കും. പുറപ്പെടാശാന്തിയായി ഒരു വര്‍ഷം സന്നിധാനത്തു ചെലവഴിച്ച മേല്‍ശാന്തി ബാലമുരളിയും മാളികപ്പുറം മേല്‍ശാന്തി ടി.കെ.ഈശ്വരന്‍നമ്പൂതിരിയും ഇന്നു രാത്രി മലയിറങ്ങും.

മണ്ഡലവ്രതാരംഭനാളായ വൃശ്ചികം ഒന്നിനു പുലര്‍ച്ചെ മൂന്നിന് നട തുറക്കുന്നത് പുതിയ മേല്‍ശാന്തിമാരാണ്. ഡിസംബര്‍ 26നാണ് ഇത്തവണത്തെ മണ്ഡലപൂജ. അന്നുരാത്രി അടയ്ക്കുന്ന നട പിന്നീടു മകരവിളക്ക് മഹോത്സവത്തിനായി ഡിസംബര്‍ 30നു വൈകുന്നേരം തുറക്കും. ജനുവരി 14നാണ് മകരവിളക്ക്. ചടങ്ങുകള്‍ പൂര്‍ത്തിയാക്കി ജനുവരി 20നു നട അടയ്ക്കും. മണ്ഡല മകരവിളക്കു മഹോത്സവത്തോടനുബന്ധിച്ച് ദര്‍ശനത്തിനെത്തുന്ന അയ്യപ്പഭക്തര്‍ക്കായി വിവിധ സര്‍ക്കാര്‍ വകുപ്പുകളുടെയും ദേവസ്വം ബോര്‍ഡിന്റെയും ചുമതലയില്‍ വിപുലമായ ക്രമീകരണങ്ങളാണ് പൂര്‍ത്തീകരിച്ചിരിക്കുന്നത്. നാളെ മുതല്‍ എല്ലാദിവസവും പുലര്‍ച്ചെ മൂന്നിനു നട തുറക്കും. രാത്രി 11.45വരെ ദര്‍ശനം അനുവദിക്കും. പ്രസാദവിതരണം കുറ്റമറ്റതാക്കാന്‍ ക്രമീകരണം ചെയ്തിട്ടുണ്െടന്ന് ദേവസ്വം അധികൃതര്‍ പറഞ്ഞു. 18 കൌണ്ടറുകള്‍ സന്നിധാനത്തു പ്രവര്‍ത്തിക്കും. അപ്പം, അരവണ എന്നിവ ആവശ്യാനുസരണം സ്റോക്ക് ചെയ്തിട്ടുണ്ട്.


കെഎസ്ആര്‍ടിസി സംസ്ഥാനത്തിന്റെ വിവിധ ഡിപ്പോകളില്‍ നിന്ന് പമ്പയിലേക്ക് സ്പെഷല്‍ സര്‍വീസുകള്‍ ആരംഭിച്ചു. 300 ബസുകള്‍ പമ്പ സര്‍വീസിനായി നീക്കിവച്ചിട്ടുണ്ട്. 100 ബസുകള്‍ പമ്പ - നിലയ്ക്കല്‍ റൂട്ടില്‍ ചെയിന്‍ സര്‍വീസായി ഓടിക്കും. ദര്‍ശനം സുഗമമാക്കുന്നതിലേക്ക് പോലീസ് വകുപ്പ് വെര്‍ച്വല്‍ ക്യൂ സംവിധാനം ഏര്‍പ്പെടുത്തിയിട്ടുണ്ട്. ഓണ്‍ലൈന്‍ രജിസ്ട്രേഷനിലൂടെ അയ്യപ്പഭക്തര്‍ക്കു ദര്‍ശനസമയം അനുവദിച്ചു നല്കുന്ന സംവിധാനമാണിത്. സംസ്ഥാന പോലീസിന്റെ വെബ്സൈറ്റിലൂടെയാണ് രജിസ്ട്രേഷനുള്ള സൌകര്യം ചെയ്തിരിക്കുന്നത്.