കെഎസ് യു സംസ്ഥാന ക്യാമ്പ് നാളെ മുതല്‍ ചരല്‍ക്കുന്നില്‍
പത്തനംതിട്ട: കെഎസ്യു സംസ്ഥാന ക്യാമ്പ് നാളെ മുതല്‍ 18 വരെ ചരല്‍ക്കുന്നില്‍ നടക്കുമെന്ന് സംസ്ഥാന പ്രസിഡന്റ് അഡ്വ.വി.എസ്.ജോയി പത്രസമ്മേളനത്തില്‍ പറഞ്ഞു. നാളെ വൈകുന്നേരം അഞ്ചിനു കേന്ദ്രമന്ത്രി വയലാര്‍ രവി ക്യാമ്പ് ഉദ്ഘാടനം ചെയ്യും. എന്‍എസ് യു ദേശീയ പ്രസിഡന്റ് രോഹിത് ചൌധരി ക്യാമ്പില്‍ മുഖ്യാതിഥിയായിരിക്കും.

കേന്ദ്രമന്ത്രിമാരായ ഡോ.ശശി തരൂര്‍, കെ.വി.തോമസ്, കെ.സി.വേണുഗോപാല്‍, കൊടിക്കുന്നില്‍ സുരേഷ്, രാജ്യസഭ ഉപാധ്യക്ഷന്‍ പ്രഫ.പി.ജെ.കുര്യന്‍, കോണ്‍ഗ്രസ് വക്താവ് പി.സി.ചാക്കോ, നേതാക്കളായ വി.എം.സുധീരന്‍, കെ.മുരളീധരന്‍, മന്ത്രിമാര്‍, എംഎല്‍എമാര്‍ എന്നിവര്‍ ക്യാമ്പില്‍ പങ്കെടുക്കും. 18നു രാവിലെ 9.30ന് മുഖ്യമന്ത്രി ഉമ്മന്‍ ചാണ്ടി ക്യാമ്പില്‍ പ്രസംഗിക്കും. ഉച്ചകഴിഞ്ഞ് മൂന്നിനു സമാപനസമ്മേളനം കെപിസിസി പ്രസിഡന്റ് രമേശ് ചെന്നിത്തല ഉദ്ഘാടനം ചെയ്യും. സാമൂഹിക, സാംസ്കാരിക, രാഷ്ട്രീയ, സാമ്പത്തിക മേഖലകളിലെ പ്രമുഖര്‍ ക്ളാസുകള്‍ക്കു നേതൃത്വം നല്കും.


കഴിഞ്ഞ എല്‍ഡിഎഫ് ഗവണ്‍മെന്റ് രൂപീകരിച്ച പാഠപുസ്തക പരിഷ്കരണ കമ്മിറ്റിയാണ് നിലവിലുള്ളതെന്നും യുഡിഎഫ് സര്‍ക്കാര്‍ അധികാരത്തിലെത്തി ഒന്നരവര്‍ഷം പിന്നിടുമ്പോഴും കമ്മിറ്റി പുനഃസംഘടിപ്പിക്കാതെ പാഠപുസ്തക പരിഷ്കരണ നടപടികളിലേക്കു കടക്കാനുള്ള ശ്രമമാണ് നടത്തുന്നതെന്നും കെഎസ് യു കുറ്റപ്പെടുത്തി. വിദ്യാഭ്യാസ വകുപ്പിന്റെ പല നടപടികളോടും കെഎസ് യുവിനു ശക്തമായ വിയോജിപ്പുണ്െടന്നും ഇത്തരം വിഷയങ്ങള്‍ ക്യാമ്പ് ചര്‍ച്ച ചെയ്യുമെന്നും സംസ്ഥാന പ്രസിഡന്റ് പറഞ്ഞു. എല്ലാ ജില്ലകളില്‍ നിന്നുമായി തെരഞ്ഞെടുക്കപ്പെട്ട 500 പ്രതിനിധികള്‍ പങ്കെടുക്കും. ജില്ലാ പ്രസിഡന്റ് സോണി എം.ജോസും പത്രസമ്മേളനത്തില്‍ പങ്കെടുത്തു.