വല്ലാര്‍പാടത്ത് വീണ്ടും രക്തചന്ദനം പിടിച്ചു; സിപിഎം ബ്രാഞ്ച് സെക്രട്ടറി പിടിയില്‍
കൊച്ചി: വല്ലാര്‍പാടം രാജ്യാന്തര കണ്െടയ്നര്‍ ട്രാന്‍സ്ഷിപ്മെന്റ് ടെര്‍മിനലില്‍നിന്നു ചകിരിച്ചോറ് എന്ന വ്യാജേന ദുബായിലേക്കു കടത്താന്‍ ശ്രമിച്ച 28 മെട്രിക് ടണ്‍ രക്തചന്ദനം റവന്യു ഇന്റലിജന്‍സ് ഡയറക്ടറേറ്റ് (ഡിആര്‍ഐ) പിടികൂടി. വല്ലാര്‍പാടം ടെര്‍മിനലില്‍നിന്ന് എട്ടു ടണ്ണും പൊള്ളാച്ചിയിലെ ഗോഡൌണില്‍നിന്ന് 20 ടണ്ണുമാണു പിടിച്ചെടുത്തത്. സംഭവവുമായി ബന്ധപ്പെട്ടു കള്ളക്കടത്ത് ശൃംഖലയുടെ തലവനും സിപിഎം ബ്രാഞ്ച് സെക്രട്ടറിയും ഉള്‍പ്പെടെ അഞ്ചുപേരെ ഡിആര്‍ഐ അറസ്റ് ചെയ്തു. ഇവരെ വിശദമായി ചോദ്യം ചെയ്തുവരികയാണ്.

കസ്റംസ് പരിശോധന പൂര്‍ത്തിയാക്കി ദുബായ് പോര്‍ട്ട് വേള്‍ഡിന്റെ നിയന്ത്രണത്തിലുള്ള വല്ലാര്‍പാടം ടെര്‍മിനലില്‍ നിന്ന് ഇന്നലെ രാത്രി കപ്പല്‍ കയറ്റേണ്ടിയിരുന്ന കണ്െടയ്നറിലെ ചരക്കാണ് അവസാന മണിക്കൂറില്‍ പിടികൂടിയത്. രക്തചന്ദനം ദുബായില്‍ എത്തിച്ചേശേഷം അവിടെനിന്നു ചൈനയിലേക്കു കടത്താനായിരുന്നു പദ്ധതി. ഇന്ത്യയില്‍ കയറ്റുമതി നിരോധിച്ചിട്ടുള്ള രക്തചന്ദനത്തിനു ചൈന, സിംഗപ്പൂര്‍, തായ്വാന്‍ എന്നിവിടങ്ങളില്‍ വന്‍ ഡിമാന്‍ഡുണ്ട്.

കയറ്റുമതി ഏജന്റായ തൃശൂരിലെ സുവിഹാന്‍ എക്സ്പോര്‍ട്സ് ഉടമ യൂസഫ്, കള്ളക്കടത്ത് ശൃഖലയിലെ പ്രധാനിയായ ചെന്നൈ സ്വദേശി കരുണാകരന്‍ എന്ന കണ്ണന്‍, കള്ളക്കടത്തിനു കണ്െടയ്നര്‍ ലോറി ഏര്‍പ്പാട് ചെയ്തുകൊടുത്ത ഫോര്‍ട്ട്കൊച്ചി വെളി സ്വദേശി ആന്റണി മോറിസ്, കസ്റം സ് ക്ളിയറന്‍സിന് ഒത്താശ ചെയ്തു കൊടുത്ത ഇയാളുടെ സഹായി വില്ലിംഗ്ടണ്‍ ഐലന്‍ഡില്‍ താമസിക്കുന്ന തൃശൂര്‍ കൂഴൂര്‍ സിപിഎം ബ്രാഞ്ച് സെക്രട്ടറി ജയകുമാര്‍, കണ്െടയ്നര്‍ ഡ്രൈവര്‍ പ്രകാശ് എന്നിവരെയാണു ഡിആര്‍ഐ അറസ്റു ചെയ്തത്. ഇവര്‍ നല്കിയ വിവരത്തിന്റെ അടിസ്ഥാനത്തിലാണു പൊള്ളാച്ചിയിലെ മുഖ്യപ്രതിയുടെ ഗോഡൌണില്‍നിന്ന് 20 ടണ്‍ രക്തചന്ദനം കൂടി പിടിച്ചെടുത്തത്. പിടിച്ചെടുത്ത രക്തചന്ദനത്തിനു രാജ്യാന്തര വിപണിയില്‍ രണ്ടര കോടിയിലധികം രൂപ വിലമതിക്കുമെന്ന് ഡിആര്‍ഐ വൃത്തങ്ങള്‍ പറഞ്ഞു. വല്ലാര്‍പാടം വഴി നാലു കണ്െടയ്നര്‍ രക്തചന്ദനം നേരത്തെ പലപ്പോഴായി കടത്തിയിട്ടുണ്െടന്നു പ്രതികള്‍ ചോദ്യം ചെയ്യലില്‍ സമ്മതിച്ചിട്ടുണ്ട്. കോഫെപോസ നിയമപ്രകാരമാണ് ഇവര്‍ക്കെതിരെ കേസെടുത്തിരിക്കുന്നത്.


സാധാരണഗതിയില്‍ കസ്റ്റംസ് പരിശോധന പൂര്‍ത്തിയാക്കി സീല്‍ വച്ച ചരക്ക് പിന്നീട് തുറന്നു പരിശോധിക്കാറില്ല. ടെര്‍മിനല്‍ അധികൃതര്‍ക്കും ഇതു തുറക്കാനാവില്ലെന്നിരിക്കെ ഡിആര്‍ഐ പ്രത്യേക അധികാരമുപയോഗിച്ച് ചരക്ക് കസ്റ്റഡിയിലെടുത്ത് തുറന്നു പരിശോധിക്കുകയായിരുന്നു. കസ്റംസ് പരിശോധനയില്‍ പിടിക്കപ്പെടാതിരിക്കാന്‍ കണ്െടയ്നറിന്റെ മുന്‍ഭാഗത്ത് പകുതിയോളം ചകിരിച്ചോറു നിറച്ച ശേഷം പിന്നിലുള്ള ബാക്കി സ്ഥലത്താണ് രക്തചന്ദനം അടുക്കിവച്ചിരുന്നത്. കണ്െടയ്നറിലുള്ള മുഴുവന്‍ സാധനങ്ങളും കസ്റംസ് ഉദ്യോഗസ്ഥര്‍ പുറത്തിറക്കി പരിശോധിക്കാറില്ല. ഈ സാഹചര്യത്തിലാണു കണ്െടയ്നറില്‍ പകുതിയോളം ചകിരിച്ചോര്‍ നിറച്ചു ബാക്കി സ്ഥലത്ത് രക്തചന്ദനം കയറ്റിയത്.

വല്ലാര്‍പാടത്തുനിന്നു ദുബായിലെത്തിക്കുന്ന രക്തചന്ദനം പിന്നീട് ഹോങ്കോംഗിലേക്കും ചൈനയിലേക്കും ജപ്പാനിലേക്കുമാണു പോകുക. ദുബായില്‍ രക്തചന്ദനം കള്ളക്കടത്ത് നിയന്ത്രിക്കുന്നത് തലശേരി സ്വദേശി ഷെഫീക്കും ഹോങ്കോംഗിലെ ഇടനിലക്കാരന്‍ തമിഴ്നാട് സ്വദേശി മൊയ്തീനുമാണെന്ന് ഡിആര്‍ഐ വൃത്തങ്ങള്‍ പറഞ്ഞു. ചെന്നൈ സ്വദേശി കണ്ണന്‍ കിലോഗ്രാമിന് 35 രൂപ നിരക്കിലാണ് ഇവിടെ നിന്ന് രക്തചന്ദനം ദുബായിലേക്കു കയറ്റിയയക്കുന്നത്. ദുബായിലെത്തുമ്പോള്‍ ഇതിന് കിലോയ്ക്ക് 55 രൂപ വില കിട്ടും. അവിടെ നിന്ന് ഹോങ്കോങ്ങിലെത്തുമ്പോള്‍ വില പലമടങ്ങായി വര്‍ധിക്കും. കിലോയ്ക്ക് 1,000 രൂപ വരെ അവിടെ രക്തചന്ദനത്തിനു ലഭിക്കുന്നുണ്ട്.

ഡിആര്‍ഐ ഡപ്യൂട്ടി ഡയറക്ടര്‍ ആര്‍. രാഹുല്‍, സീനിയര്‍ ഇന്റലിജന്‍സ് ഓഫീസര്‍ വി.എസ്. സെയ്ത് മുഹമ്മദ് എന്നിവരുടെ നേതൃത്വത്തിലായിരുന്നു പരിശോധന. ഇതു രണ്ടാം തവണയാണ് വല്ലാര്‍പാടം ടെര്‍മിനലില്‍ നിന്നു ഡിആര്‍ഐ രക്തചന്ദനം പിടികൂടുന്നത്. കഴിഞ്ഞവര്‍ഷം ഓക്ടോ ബറില്‍ റബര്‍ മാറ്റ് എന്ന വ്യാജേന കടത്താന്‍ ശ്രമിച്ച 13.7 ടണ്‍ രക്തചന്ദനം ഡിആര്‍ഐ പിടികൂടിയിരുന്നു.