ജീവിതം സന്ദേശമാക്കി ജാന്‍ഹവി ടീച്ചര്‍ യാത്രയായി
മട്ടാഞ്ചേരി: അരനൂറ്റാണ്ടിലേറെക്കാലം ആയിരങ്ങള്‍ക്ക് അക്ഷരവെളിച്ചം പകര്‍ന്ന എച്ച്. ജാന്‍ഹവി ടീച്ചര്‍ (75) വിടവാങ്ങി. തെക്കെ ചെറളായി കേരളേശ്വര്‍ ലൈനില്‍ നന്ദിഗ്രാമം വീട്ടില്‍ ഇന്നലെ പുലര്‍ച്ചെ അഞ്ചിനായിരുന്നു അന്ത്യം. ഏതാനും മാസങ്ങളായി ആരോഗ്യനില മോശമായിരുന്നു. ശ്രീ ശിവ പ്രൈമറി സ്കൂള്‍ സ്ഥാപിച്ചു കുരുന്നുകള്‍ക്ക് ആദ്യാക്ഷരം പകര്‍ന്നു നല്‍കിയ ടീച്ചര്‍ കുട്ടികളെ വീടുകളില്‍ ചെന്നു കൂട്ടികൊണ്ടുവന്നാണ് അറിവു പകര്‍ന്നത്.

ഇംഗ്ളീഷ്, മലയാളം, കണക്കിലെ എളുപ്പവഴികള്‍, കഥകള്‍, കവിതകള്‍ എന്നിവ കുരുന്നു മനസുകളില്‍ ആഴത്തില്‍ പതിയുന്ന രീതിയിലായിരുന്നു പഠിപ്പിച്ചിരുന്നത്. അതുകൊണ്ടു തന്നെ നിരവധി കുട്ടികളാണു ടീച്ചറിന്റെ ക്ളാസില്‍ ഏറെ താല്പര്യത്തോടെ എത്തികൊണ്ടിരുന്നതെന്നു പ്രദേശത്തെ റിട്ടയേഡ് അധ്യാപിക സുശീല ത്രിവിക്രമ ഭട്ട് അനുസ്മരിച്ചു. ശൈശവത്തിലുണ്ടായ പിള്ളവാതംമൂലം ശരീരത്തിന്റെ ഒരു ഭാഗം തളര്‍ന്നിരുന്നു. എന്നിട്ടും സാമൂഹ്യപ്രതിബന്ധതയുള്ള വിഷയങ്ങളില്‍ ടീച്ചര്‍ എന്നും മുന്നിലായിരുന്നു. വിവാഹംപോലും വേണ്െടന്നുവച്ചു കുട്ടികള്‍ക്കായി സമര്‍പ്പിച്ച ജീവിതത്തിനൊടുവില്‍ അവയവങ്ങളും ശരീരം മൊത്തമായും സമൂഹനന്മയ്ക്കു സമര്‍പ്പിക്കുകയായിരുന്നു ജാന്‍ഹവി ടീച്ചര്‍. നേരത്തെ ഇതിനായുള്ള സമ്മതപത്രം നല്കിയിരുന്നു.


കണ്ണുകള്‍ ഡോ.ടോണി സൂപ്പര്‍ സ്പെഷാലിറ്റി ഐ ഹോസ്പിറ്റലിനാണു ദാനം ചെയ്തത്. ശരീരം കോലഞ്ചേരി മലങ്കര ഓര്‍ത്തഡോക്സ് ചര്‍ച്ച് ആശുപത്രിക്കും നല്കി. ആശുപത്രിയില്‍ നിന്നെത്തിയ 'സോര്‍ട്ട് ' എന്ന സംഘടയുടെ ജോ.സെക്രട്ടറി വസന്ത് ഷേണായ് മൃതദേഹം ഏറ്റെടുത്തു കുടുംബാംഗങ്ങള്‍ക്കു സാക്ഷ്യപത്രവും നല്കി.

ഗൌഢ സാരസ്വത ബ്രാഹ്മണ സമുദായത്തില്‍ ശരീര ദാനത്തിലേര്‍പ്പെടുന്ന സംസ്ഥാനത്തെ ആദ്യ വനിത എന്ന ബഹുമതിയും ടീച്ചറിനാണെന്നും, മറ്റുള്ളവര്‍ക്കു മാതൃകയും പ്രചോദനവുമാണ് ടീച്ചറിന്റെ ജീവിതമെന്നും വസന്ത് ഷേണായ് പറഞ്ഞു. കേരള ഗൌഢ സാരസ്വത് യൂത്ത് ഫെഡറേഷന്‍ സംസ്ഥാന ജനറല്‍ സെക്രട്ടറി കെ.ജയാനന്ദ പൈ ടീച്ചറിന്റെ നിര്യാണത്തില്‍ അനുശോചനം രേഖപ്പെടുത്തി. എച്ച്. നരേന്ദ്ര ഭട്ട്, എച്ച്. സുനന്ദ ബായി, എച്ച്. ജയലക്ഷ്മി, എച്ച്. പ്രേമ എന്നിവരാണ് ജാന്‍ഹവി ടീച്ചറിന്റെ സഹോ ദരങ്ങള്‍.