ചാല ടാങ്കര്‍ ദുരന്തം: പൊതുമരാമത്തുവകുപ്പ് പ്രതിയായേക്കും
പി. ജയകൃഷ്ണന്‍

കണ്ണൂര്‍: ചാലയില്‍ പാചകവാതക ബുള്ളറ്റ് ടാങ്കര്‍ പൊട്ടിത്തെറിച്ച് 20 പേര്‍ മരിച്ച സംഭവത്തില്‍ ക്രൈംബ്രാഞ്ച് അന്വേഷണം അവസാനഘട്ടത്തില്‍. കഴിഞ്ഞ ഓഗസ്റ് 27നു രാത്രിയാണു ബുള്ളറ്റ് ടാങ്കര്‍ ചാല ബൈപാസിലെ ഡിവൈഡറില്‍ തട്ടി മറിഞ്ഞു പൊട്ടിത്തെറിച്ചു വന്‍ ദുരന്തമു ണ്ടായത്. ടാങ്കര്‍ ഓടിച്ചിരുന്ന ഡ്രൈവര്‍ സേലം സ്വദേശി മുത്തയ്യനെ മാത്രമാണു നിലവില്‍പ്രതിപ്പട്ടികയില്‍ ഉള്‍പ്പെടുത്തിയിരിക്കുന്നത്. അശ്രദ്ധമായി വാഹനമോടിച്ച് അപകടം വരുത്തിയതിനുള്ള കേസ് മാത്രമാണു ഇയാള്‍ക്കെതിരേയുള്ളത്. മുത്തയ്യനെ മാത്രം പ്രതിയാക്കി, ഭാവിയില്‍ പാചകവാതക ടാങ്കറടക്കമുള്ള എക്സ്പ്ളോസീവ് സാധനങ്ങള്‍ കൊണ്ടുപോകുമ്പോള്‍ സര്‍ക്കാര്‍ എന്തൊക്കെ നടപടികള്‍ സ്വീകരിക്കണം എന്ന നിര്‍ദേശങ്ങള്‍ സമര്‍പ്പിക്കാനായിരുന്നു അന്വേഷണ ഉദ്യോഗസ്ഥരുടെ ആദ്യ തീരുമാനം.

പൊതുമരാമത്തു വകുപ്പിനെതിരേ ചില പരാമര്‍ശങ്ങള്‍ മാത്രം മതിയെന്നും തീരുമാനിച്ചിരുന്നു. എന്നാല്‍, പൊതുമരാമത്തു വകുപ്പിനെതിരേ തദ്ദേശവാസികളായ ഭാസ്കരന്‍, പ്രഭാകരന്‍ തുടങ്ങിയവര്‍ രേഖാമൂലം പരാതി നല്കി. ഇതോടെ പൊതുമരാമത്തു വകുപ്പിനെ പ്രതിപ്പട്ടികയില്‍ ഉള്‍പ്പെടുത്തണമെന്ന നിര്‍ദേശം ഉയര്‍ന്നു. ഉന്നത ഉദ്യോഗസ്ഥര്‍ അടക്കമുള്ളവരോട് ആലോചിച്ച ശേഷമായിരിക്കും ഇക്കാര്യത്തില്‍ അന്തിമ തീരുമാനമുണ്ടാവുക. ഇതിനായി ഉന്നതതല യോഗം വിളിക്കും.

ഇന്നു വൈകുന്നേരം കോഴിക്കോട് ഐജി ബി. സന്ധ്യയുമായുള്ള ചര്‍ച്ചയ്ക്കു ശേഷമായിരിക്കും ഭാവി കാര്യങ്ങള്‍ തീരുമാനിക്കുക. അപകട സൂചനാ ബോര്‍ഡ് സ്ഥാപിക്കാത്തതാണു പൊതുമരാമത്ത് വകുപ്പിന്റെ ഭാഗത്തുനിന്നുണ്ടായ പ്രധാന വീഴ്ച. എക്സ്പ്ളോസീവ് സാധാനങ്ങള്‍ കൊണ്ടുപോകുന്നതിനായി കൈവശം വയ്ക്കേണ്ട അഞ്ചു രേഖകളുടെ പരിശോധനയും ക്രൈംബ്രാഞ്ച് ഡിവൈഎസ്പി സന്തോഷിന്റെ നേതൃത്വത്തിലുള്ള അന്വേഷണസംഘം പൂര്‍ത്തിയാക്കിയിട്ടുണ്ട്.


ഒറിജിനല്‍ രേഖകള്‍ ടാങ്കറിനൊപ്പം കത്തി നശിച്ചുവെന്ന മൊഴിയുടെ അടിസ്ഥാനത്തില്‍ രേഖകളുടെ കോപ്പികളുമായി ചെന്നൈയിലെയും ഐഒസിയിലെയും ഓഫീസുകളിലെത്തിയാണു പരിശോധന നടത്തിയത്.

എന്നാല്‍, കണ്‍ട്രോള്‍ ഓഫ് എക്സ്പ്ളോസീവ് സര്‍ട്ടിഫിക്കറ്റ് ഒപ്പിട്ടു നല്കിയ എന്‍ജിനിയര്‍മാരായ പാര്‍ഥസാരഥി, സെക്കന്തീര്‍ എന്നിവര്‍ സ്ഥലത്തില്ലാത്തതിനാല്‍ ഇതിന്റെ പരിശോധന പൂര്‍ത്തിയായിട്ടില്ല. ഒളിവില്‍ പോയിരുന്ന ടാങ്കര്‍ ഉടമ തമിഴ്നാട് നാമക്കല്‍ സ്വദേശി സേലം റോഡില്‍ കണ്‍മണി, ഭര്‍ത്താവ് ദുരൈരാജ് എന്നിവരെയും അന്വേഷണസംഘം ചോദ്യം ചെയ്തു. പ്രാഥമിക വിദ്യാഭ്യാസം മാത്രമുള്ള ഇവര്‍ക്കു വാഹനനിയമങ്ങള്‍ സംബന്ധിച്ചു കാര്യമായ അറിവില്ലെന്നു വ്യക്തമായിട്ടുണ്ട്.

ഏജന്റുമാര്‍ വഴിയാണ് ഇവര്‍ കാര്യങ്ങള്‍ നടത്തിയിരുന്നത്. ടാങ്കറിന്റെ ഡി -ക്വിറ്റുവരെ പുതിയതാണെന്നു വ്യക്തമായിട്ടുണ്ട്. അപകടത്തില്‍പ്പെട്ട ടാങ്കറിന്റെ തകിടിന്റെ പരിശോധനയാണ് ഇനി പൂര്‍ത്തിയാക്കാനുള്ളത്. ദുരന്തത്തില്‍ 20 പേര്‍ക്കു സാരമായി പൊള്ളലേല്‍ക്കുകയും നിരവധി വീടുകള്‍, സ്ഥാപനങ്ങള്‍, വാഹനങ്ങള്‍, കൃഷി എന്നിവ കത്തിനശിക്കുകയും ചെയ്തിരുന്നു.