ഹോട്ടല്‍ ഭക്ഷണവില നിയന്ത്രിക്കാന്‍ ബില്‍ ഉടന്‍: മന്ത്രി അനൂപ്
കൊച്ചി: ഹോട്ടലുകളിലെ ഭക്ഷണവില നിയന്ത്രിക്കുന്നതിനു ഭക്ഷ്യവകുപ്പ് തയാറാക്കിയ ഫുഡ് റെഗുലേഷന്‍ ബില്‍ അടുത്ത നിയമസഭയില്‍ അവതരിപ്പിച്ചു പാസാക്കുമെന്നു ഭക്ഷ്യ സിവില്‍ സപ്ളൈസ് മന്ത്രി അനൂപ് ജേക്കബ്. ഇതിനാവശ്യമായ വകുപ്പുതല ചര്‍ച്ചകള്‍ നടന്നുവരുകയാണെന്നും അദ്ദേഹം അറിയിച്ചു. ഭക്ഷ്യ പൊതുവിതരണ ഉപഭോക്തൃകാര്യ വകുപ്പ് സംഘടിപ്പിച്ച രാജീവ് ഗാന്ധി ഉപഭോക്തൃസംരക്ഷണ അവാര്‍ഡ് സമര്‍പ്പണച്ചടങ്ങ് എറണാകുളം ഭാരത് ടൂറിസ്റ് ഹോമില്‍ ഉദ്ഘാടനം ചെയ്യുകയായിരുന്നു അദ്ദേഹം.

ഹോട്ടലുകളില്‍ ഭക്ഷണസാധാനങ്ങളുടെ ഗുണമേന്മ ഉറപ്പുവരുത്തുന്നതിനും പറഞ്ഞിരിക്കുന്ന അളവില്‍ ഭക്ഷണം ഉപഭോക്താക്കള്‍ക്കു ലഭ്യമാക്കുന്നുണ്േടായെന്നു പരിശോധിക്കുന്നതിനും നിലവിലുള്ള നിയമം അപര്യാപ്തമാണ്. ഹോട്ടലുകളില്‍ ഭക്ഷണത്തിന്റെ വില എഴുതിവച്ചിട്ടുണ്െടങ്കിലും പലരും അതു പ്രാവര്‍ത്തികമാക്കാറില്ല. ഹോട്ടല്‍ സ്ഥിതിചെയ്യുന്ന സ്ഥലം, നിലവാരം, ഭക്ഷണത്തിന്റെ അളവ് എന്നിവയെല്ലാം പരിഗണിച്ചാണു വില നിശ്ചയിക്കേണ്ടത്. ഫെബ്രുവരിയോടെ ബില്ല് നടപ്പാക്കാനാകുമെന്നാണു പ്രതീക്ഷയെന്നും മന്ത്രി പറഞ്ഞു.

ഉപഭോക്താവിനെ വഴിതെറ്റിക്കുന്ന പരസ്യങ്ങളാണ് ഇന്നുള്ളത്. സൌന്ദര്യം വര്‍ധിപ്പിക്കാനും പൊക്കം കൂട്ടാനുമൊക്കെ ഉത്പന്നങ്ങള്‍ പുറത്തിറക്കി അതിന്റെ പരസ്യങ്ങള്‍ നല്കി വഴിതെറ്റിക്കുന്നതു രാജ്യത്തിനു ബാധ്യതയായി മാറിയിരിക്കുകയാണ്. ഉപഭോക്തൃ ഫോറങ്ങളില്‍ ലഭിക്കുന്ന പരാതികളിന്‍മേല്‍ സമയബന്ധിതമായി പരിഹാരം കാണുന്നതിനു നടപടി സ്വീകരിക്കും.


കേരളം ഇന്ന് 80 ശതമാനവും ഉപഭോക്തൃ സംസ്ഥാനമായി മാറിയിരിക്കുന്നു. ഇങ്ങനെ പോയാല്‍ കുറച്ചു വര്‍ഷങ്ങള്‍ക്കുള്ളില്‍ കേരളം 100 ശതമാനവും ഉപഭോക്തൃ സംസ്ഥാനമാകും. മുഴുവനായും മറ്റു സംസ്ഥാനങ്ങളെ ആശ്രയിക്കുന്ന സംസ്ഥാനമായി കേരളം മാറുന്നു. കൃഷി പോലുള്ള ഉത്പാദന മേഖലകളിലേക്കു ജനങ്ങളെ ആകര്‍ഷിക്കുന്നതിനു ബോധവത്കരണം ആവശ്യമാണെന്നും അദ്ദേഹം പറഞ്ഞു.

ഹൈബി ഈഡന്‍ എംഎല്‍എ അധ്യക്ഷത വഹിച്ചു. ഫിഷറീസ് മന്ത്രി കെ. ബാബു രാജീവ് ഗാന്ധി ഉപഭോക്തൃ പുരസ്കാരം സമര്‍പ്പിച്ചു. ജില്ലാ ഉപഭോക്തൃ തര്‍ക്കപരിഹാര ഫോറം പ്രസിഡന്റ് എ. രാജേഷ് മുഖ്യപ്രഭാഷണം നടത്തി. അഡ്വ.ഡി.ബി. ബിനു ഉപഭോക്തൃ സംരക്ഷണ നിയമവും പൊതുജനങ്ങളും എന്ന വിഷയത്തില്‍ സെമിനാര്‍ നടത്തി. മേയര്‍ ടോണി ചമ്മണി, സിവില്‍ സപ്ളൈസ് കോര്‍പറേഷന്‍ ചെയര്‍മാനും മാനേജിംഗ് ഡയറക്ടറുമായ എ.ടി. ജയിംസ്, ഭക്ഷ്യ പൊതുവിതരണ ഉപഭോക്തൃകാര്യ സെക്രട്ടറി എക്സ്. അനില്‍, സിവില്‍ സപ്ളൈസ് ഡയറക്ടര്‍ ശ്യാം ജഗന്നാഥന്‍, ജില്ല സപ്ളൈ ഓഫീസര്‍ എം.സി. രാധാമണി തുടങ്ങിയവര്‍ പ്രസംഗിച്ചു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.