ഇന്ദുവിന്റെ മരണം കൊലപാതകം; സുഹൃത്ത് അറസ്റില്‍
തിരുവനന്തപുരം: കോഴിക്കോട് നാഷണല്‍ ഇന്‍സ്റിറ്റ്യൂട്ട് ഓഫ് ടെക്നോളജിയിലെ ഗവേഷക വിദ്യാര്‍ഥിനിയായിരുന്ന തിരുവനന്തപുരം കുമാരപുരം സ്വദേശിനി ഒ.കെ.ഇന്ദുവിന്റെ മരണം കൊലപാതകമാണെന്നു തെളിഞ്ഞു. ഇന്ദുവിനോടൊപ്പം ട്രെയിനില്‍ യാത്ര ചെയ്ത അടുത്ത സുഹൃത്തും എന്‍ഐടിയിലെ അസി. പ്രഫസറുമായ സുഭാഷിനെ ക്രെെംബ്രാഞ്ച് അറസ്റ് ചെയ്തു. ട്രെയിന്‍ യാത്രയ്ക്കിടെ ഇന്ദുവിനെ ആലുവാപ്പുഴയിലേക്കു സുഭാഷ് തളളിയിടുകയായിരുന്നുവെന്നു ക്രൈംബ്രാഞ്ച് പറഞ്ഞു.

2011 ഏപ്രില്‍ 24ന് തിരുവനന്തപുരത്തുനിന്നു കോഴിക്കോട്ടേക്കുളള യാത്രാമധ്യേയാണ് ഇന്ദുവിനെ കാണാതായത്. രണ്ടു വര്‍ഷം നീണ്ട പ്രണയത്തിനൊടുവില്‍ രജിസ്റര്‍ വിവാഹം കഴിക്കണമെന്ന അഭ്യര്‍ഥന നിരസിച്ചതിനെത്തുടര്‍ന്നായിരുന്നു കൊലപാതകം. ആദ്യക്രൈംബ്രാഞ്ച് സംഘം, ഇന്ദു സ്വയം ജീവനൊടുക്കിയതാണെന്നു പറഞ്ഞ് എഴുതിത്തളളിയിരുന്നു. അന്വേഷണത്തിലെ പിഴവുകള്‍ ചൂണ്ടിക്കാട്ടി ഇന്ദുവിന്റെ അച്ഛന്‍ ഹൈക്കോടതിയെ സമീപിച്ചു. കോടതി ഉത്തരവിനെതുടര്‍ന്നു ക്രൈംബ്രാഞ്ച് ഐജി ബി.സന്ധ്യയുടെ നേതൃത്വത്തില്‍ നടത്തിയ തുടര്‍അന്വേഷണത്തിലാണു മരണം കൊലപാതകമാണെന്നു കണ്െടത്തിയത്.

ബാല്യകാല സുഹൃത്തും കൊട്ടാരക്കര സ്വദേശിയുമായ അഭിഷേകുമായി നിശ്ചയിച്ച വിവാഹത്തിനു കോഴിക്കോടുള്ള സുഹൃത്തുക്കളെയും അധ്യാപകരെയും ക്ഷണിക്കാനായിരുന്നു സുഭാഷുമൊത്തുള്ള ഇന്ദുവിന്റെ യാത്ര. ഈ യാത്രയ്ക്കു പദ്ധതിയിട്ടതു സുഭാഷായിരുന്നു. ട്രെയിന്‍ യാത്രയ്ക്കിടെ പലവട്ടം ഈ വിവാഹത്തില്‍നിന്നു പിന്മാറാന്‍ സുഭാഷ് ഇന്ദുവിനെ നിര്‍ബന്ധിച്ചു. വാക്കുതര്‍ക്കത്തിനിടെ ആലുവ പാലത്തിലെത്തിയപ്പോള്‍ ഇന്ദുവിനെ സുഭാഷ് പുഴയിലേക്കു തള്ളിയിടുകയായിരുന്നുവെന്നാണു ക്രൈംബ്രാഞ്ചിന്റെ കണ്െടത്തല്‍. പുഴയിലേക്കു തള്ളിയിട്ടശേഷം ഒന്നുമറിയാത്ത പോലെ കിടന്നുറങ്ങി. രാവിലെ ആറരയോടെ കോഴിക്കോട്ടെത്തിപ്പോള്‍ താന്‍ ഉണര്‍ന്നെന്നും അപ്പോള്‍ ഇന്ദുവിനെ കാണാനില്ലെന്നും കാട്ടി കോഴിക്കോട് റെയില്‍വേ പോലീസിനു പരാതി നല്കി. രണ്ടു ദിവസത്തിനുശേഷം ആലുവ ചെങ്ങമനാട്ടു തുരുത്തിനു സമീപം ഇന്ദുവിന്റെ മൃതദേഹം കണ്െടത്തി.

എന്നാല്‍, യാത്രയ്ക്ക് 30 ദിവസം മുമ്പു സുഭാഷ് ട്രെയില്‍വേ ടിക്കറ്റ് റിസര്‍വ് ചെയ്തിരുന്നതായി ക്രൈംബ്രാഞ്ച് കണ്െടത്തി. മൂന്നാം ക്ളാസ് എ.സിയില്‍ സിംഗിള്‍ സീറ്റുളള സൈഡ് ബര്‍ത്ത് പ്രത്യേകം ആവശ്യപ്പെട്ടിരുന്നു. യാത്ര തുടങ്ങിയപ്പോള്‍ മുതല്‍ ഇരുവരും തമ്മില്‍ വാക്കുതര്‍ക്കമുണ്ടായിരുന്നുവെന്നും പലവട്ടം ഇന്ദു പൊട്ടിക്കരഞ്ഞുവെന്നും സഹയാത്രികര്‍ പോലീസിനു മൊഴിനല്കി. മാത്രമല്ല, പുലര്‍ച്ചെ 5.30ന് ഇന്ദുവിന്റെ ബര്‍ത്ത് രണ്ടായി മടക്കിവച്ചിരുന്നതു കണ്ടതായുളള സഹയാത്രികരുടെ മൊഴിയാണു സുഭാഷിനു വിനയായത്. ഇവരുടെ അടുത്ത ബര്‍ത്തിലുണ്ടായിരുന്ന കോഴിക്കോട് മെഡിക്കല്‍ കോളജിലെ വിദ്യാര്‍ഥിനിയാണു ശക്തമായ മൊഴികള്‍ നല്കിയത്. കോഴിക്കോട് സബ്രജിസ്ട്രാര്‍ ഓഫീസിലെത്തി വിവാഹം രജിസ്റര്‍ ചെയ്തശേഷം സിക്കിമിലേക്കു വിനോദയാത്ര പോകാനാണു ഇയാള്‍ ലക്ഷ്യമിട്ടത്. രണ്ടു വര്‍ഷത്തോളം ഒരുമിച്ചു താമസിച്ച ഇന്ദുവിനെ വേര്‍പിരിഞ്ഞു ഒരു നിമിഷം പോലും ജീവിക്കാന്‍ തനിക്കു കഴിയുമായിരുന്നില്ലെന്നും ഇയാള്‍ മൊഴി നല്കി.


തന്നെ രജിസ്റര്‍ വിവാഹം ചെയ്യണമെന്ന് ട്രെയിനില്‍വച്ചു ഇന്ദുവിനോടു പലവട്ടം ആവശ്യപ്പെട്ടു. വഴങ്ങില്ലെന്നു കണ്ടപ്പോള്‍ ലാപ്ടോപ്പിലും 50 സിഡികളിലുമുളള നൂറിലേറെ ചിത്രങ്ങള്‍ പരസ്യപ്പെടുത്തുമെന്നു ഭീഷണിപ്പെടുത്തി. പിന്നീടു വാതിലിനടുത്തേക്കു തന്ത്രത്തില്‍ ഇന്ദുവിനെ കൂട്ടിക്കൊണ്ടുപോയി. അവിടെവച്ചു വീണ്ടും വിവാഹാഭ്യര്‍ഥന നടത്തി. പറ്റില്ലെന്ന് ഇന്ദു ഉറച്ച നിലപാടെടുത്തതോടെ നെഞ്ചില്‍ ശക്തമായി തള്ളി ആലുവാപ്പുഴയിലേക്കിടുകയായിരുന്നു. റെയില്‍വേ പാലത്തിലെ പില്ലറില്‍ തലയിടിച്ചു വെളളത്തിലേക്കു വീണാണ് ഇന്ദു മരിച്ചത്.

കൊലപാതകത്തിനുശേഷം ലാപ്ടോപ്പിലുണ്ടായിരുന്ന ചിത്രങ്ങള്‍ സുഭാഷ് മായ്ച്ചുകളഞ്ഞു. സുഹൃത്തിനെ വിളിച്ച് എന്‍ഐടിക്ക് അടുത്ത് ഇരുവരും താമസിച്ചിരുന്ന വാടകവീട്ടില്‍നിന്ന് ഇന്ദുവിന്റെ വസ്ത്രങ്ങളും മാറ്റി. ഇന്ദുവിന്റെ മുറിയിലുണ്ടായിരുന്ന ഡയറിയിലെ ചില പേജുകള്‍ മറ്റൊരു ഗവേഷകയെക്കൊണ്ടു കീറിക്കളയിച്ചു. എന്നാല്‍, ഫോറന്‍സിക് ലാബിലെ പരിശോധനയില്‍ മൊബൈലില്‍നിന്നും ലാപ്ടോപ്പില്‍നിന്നും മായ്ച്ചുകളഞ്ഞ ചിത്രങ്ങളും വീഡിയോ സന്ദേശങ്ങളും വീണ്െടടുത്തു. തനിയെ ചാടുമ്പോള്‍ സംഭവിക്കാവുന്ന പരിക്കുകളല്ല ഇന്ദുവിന്റെ ശരീരത്തില്‍ ഉണ്ടായിരുന്നതെന്നു കണ്െടത്തി. തലയ്ക്കു പിന്നിലായിരുന്നു പ്രധാന പരിക്ക്. ഇതു പിന്നിലേക്കു തള്ളിവീഴ്ത്തുമ്പോള്‍ സംഭവിക്കുന്നതാണെന്നും സംഘം കണ്െടത്തി.