പ്രസംഗവേദിയും തുറന്ന പുസ്തകവും പേനയുമായി അഴീക്കോടിനു സ്മാരകം
കണ്ണൂര്‍: ഒരു കാലഘട്ടത്തെയാകെ വാഗ്ധോരണിയാല്‍ ത്രസിപ്പിച്ച ഡോ. സുകുമാര്‍ അഴീക്കോട് അന്ത്യവിശ്രമം കൊള്ളുന്ന പയ്യാമ്പലം കടല്‍തീരത്ത് സ്മാരകം ഒരുങ്ങി. മേല്‍ക്കൂരയില്ലാതെ ആകാശത്തേക്ക് ഉയര്‍ന്നു നില്‍ക്കുന്ന നാലു ചെങ്കല്‍ തൂണുകള്‍ ഉള്‍പ്പെടുന്ന സ്മൃതി മണ്ഡപത്തില്‍ കരിങ്കല്ലില്‍ തീര്‍ത്ത പ്രസംഗവേദിയും മാഷിന്റെ വായനയുടെയും എഴുത്തിന്റെയും പ്രതീകമായി തുറന്ന പുസ്തകവും പേനയും ഉണ്ടാകും.

ഒന്നാം ചരമവാര്‍ഷികദിനമായ 24 ന് രാവിലെ 8.30 ന് നടക്കുന്ന ചടങ്ങില്‍ മുഖ്യമന്ത്രി ഉമ്മന്‍ ചാണ്ടി സ്മൃതിമണ്ഡപ സമര്‍പ്പണം നിര്‍വഹിക്കും. കണ്ണൂരിലെ സുകുമാര്‍ അഴീക്കോട് സാംസ്കാരിക കേന്ദ്രവും കോട്ടയത്തെ അഴീക്കോട് ട്രസ്റ്റും ചേര്‍ന്നൊരുക്കിയ സ്മൃതി മണ്ഡപത്തിന്റെ നിര്‍മാണം ഏറെക്കുറെ പൂര്‍ത്തിയായി. 14 ലക്ഷത്തോളം രൂപയാണു നിര്‍മാണച്ചെലവ്.

അഴീക്കോട് മാഷിനെ സ്നേഹിക്കുന്നവരില്‍ നിന്നാണു പ്രധാനമായി പണം സ്വരൂപിച്ചത്. കണ്ണൂര്‍ ജില്ലാ പഞ്ചായത്ത് ഒരു ലക്ഷം രൂപ അനുവദിച്ചു. അതിനിടെ സ്മാരക നിര്‍മാണത്തിനായി അഞ്ചു ലക്ഷം രൂപയുടെ ഭരണാനുമതി ഇന്നലെ നല്‍കിയതായി സര്‍ക്കാര്‍ വൃത്തങ്ങള്‍ അറിയിച്ചു. ആര്‍ക്കിടെക്ട് മധുകുമാറാണു സ്മൃതി മണ്ഡപം രൂപകല്പന ചെയ്തത്. നിര്‍മിതി കേന്ദ്രം പ്രോജക്ട് എന്‍ജിനിയര്‍ ജയേഷ് നിര്‍മാണ മേല്‍നോട്ടം വഹിച്ചു.

സ്മാരക സമര്‍പ്പണ ചടങ്ങില്‍ സാംസ്കാരിക മന്ത്രി കെ.സി. ജോസഫ് അധ്യക്ഷത വഹിക്കും. തുടര്‍ന്നു ജവഹര്‍ ലൈബ്രറി ഓഡിറ്റോറിയത്തില്‍ നടക്കുന്ന അനുസ്മരണ സമ്മേളനവും മുഖ്യമന്ത്രി ഉദ്ഘാടനം ചെയ്യും. ജസ്റ്റിസ് കെ.ടി. തോമസ് അധ്യക്ഷത വഹിക്കും. മന്ത്രി കെ.സി. ജോസഫ് മുഖ്യാതിഥിയായിരിക്കും. പി.പി. ലക്ഷ്മണന്‍, ഡോ.എ.കെ. നമ്പ്യാര്‍, ജില്ലാ കളക്ടര്‍ ഡോ. രത്തന്‍ ഖേല്‍ക്കര്‍, നഗരസഭാധ്യക്ഷ എം.സി. ശ്രീജ, എം. പ്രകാശന്‍ എന്നിവര്‍ പ്രസംഗിക്കും.


തുടര്‍ന്ന് അഴിക്കോട് രചിച്ച അഴീക്കോടിന്റെ മാധ്യമ വിചാരണ, ടാഗോറിന്റെ ഇന്ത്യ എന്നീ പുസ്തകങ്ങളുടെയും സി.ജെ. റോയ് എഡിറ്റു ചെയ്ത അഴീക്കോടനുഭവങ്ങള്‍, എസ്. കൃഷ്ണകുമാറിന്റെ സുകുമാര്‍ അഴീക്കോട് എന്നിവയുടെയും പ്രകാശനവും നടക്കും. 23 ന് ഉച്ചകഴിഞ്ഞു മൂന്നിനു ജവഹര്‍ ലൈബ്രറി ഓഡിറ്റോറിയത്തില്‍ അഴീക്കോടിന്റെ സംഭാവനകള്‍ എന്ന വിഷയത്തില്‍ സെമിനാര്‍ നടക്കും. കേന്ദ്രമന്ത്രി മുല്ലപ്പള്ളി രാമചന്ദ്രന്‍ ഉദ്ഘാടനം ചെയ്യും.

സുകുമാര്‍ അഴീക്കോടിന്റെ രചനകള്‍, പ്രഭാഷണ കല, ചിന്തകള്‍ തുടങ്ങിയ വിഷയങ്ങളുമായി ബന്ധപ്പെട്ട് ഡോ. പി.വി. കൃഷ്ണന്‍ നായര്‍, ഡോ. അംബികാ സുതന്‍ മാങ്ങാട്, ഡോ. കെ.എച്ച്. സുബ്രഹ്മണ്യന്‍, എസ്. കൃഷ്ണകുമാര്‍, എം. അബ്ദുറഹിമാന്‍, ഡോ. എ.കെ. നമ്പ്യാര്‍ തുടങ്ങിയവര്‍ പ്രബന്ധങ്ങള്‍ അവതരിപ്പിക്കും.