കാണാതായ യുവതിയെ കൊലപ്പെടുത്തി കുഴിച്ചുമൂടിയ നിലയില്‍ കണ്െടത്തി
ചാവക്കാട്: ചൊവ്വാഴ്ച രാത്രി വീട്ടില്‍നിന്നു കാണാതായ യുവതിയുടെ മൃതദേഹം, കൊലപ്പെടുത്തി കുഴിച്ചുമൂടിയ നിലയില്‍ കണ്െടത്തി. അകലാട് ഒറ്റയിനി കോളനിയില്‍ കൊല്ലംപറമ്പില്‍ അബൂബക്കറിന്റെ മകള്‍ റസിയ(28)യാണ് കൊല്ലപ്പെട്ടത്. സംഭവവുമായി ബന്ധപ്പെട്ട് അകലാട് കാട്ടിലപള്ളിക്കു സമീപം വാളങ്ങാട്പറമ്പില്‍ നൂര്‍ദീനെ(38) പോലീസ് അന്വേഷിക്കുന്നു. ബസ് ഡ്രൈവറായ നൂര്‍ദീന്‍ ഒളിവിലാണ്.

ഇന്നലെ രാവിലെ ചാവക്കാട് സിഐ കെ. സുദര്‍ശനുവന്ന ഫോണ്‍ സന്ദേശത്തെതുടര്‍ന്നാണു യുവതിയുടെ കൊലപാതകവിവരം പുറത്തറിയുന്നത്. ദുര്‍ഗന്ധം വമിച്ചിരുന്നെങ്കിലും നാട്ടുകാര്‍ കാര്യമാക്കിയില്ല. പോലീസ് അന്വേഷിക്കുന്ന നൂര്‍ദീന്റെ സഹോദരന്‍ മുസ്തഫയാണു സിഐയെ വിളിച്ച് യുവതിയെ കുഴിച്ചുമൂടിയ വിവരം അറിയിച്ചത്. മുസ്തഫയുടെ വീടിന്റെ പിറകില്‍ യുവതിയെ കുഴിച്ചുമൂടിയിട്ടുണ്െടന്നും തനിക്കു സംഭവത്തില്‍ പങ്കില്ലെന്നും നൂര്‍ദീന്‍ തന്നെയാണത്രെ മുസ്തഫയോടു പറഞ്ഞത്. തുടര്‍ന്നു മുസ്തഫ വീടിന്റെ പിന്നില്‍ ഒഴിഞ്ഞുകിടക്കുന്ന പറമ്പില്‍ നോക്കിയപ്പോഴാണ് കൈ പുറത്തു കാണുന്ന നിലയില്‍ മൃതദേഹം കണ്ടത്. ഉടന്‍ മുസ്തഫ സിഐയെ വിവരം അറിയിച്ചു.


റസിയയെ കാണാതായതിനെതുടര്‍ന്നു ബുധനാഴ്ച വടക്കേക്കാട് പോലീസില്‍ പരാതി നല്‍കിയിരുന്നു. എസ്ഐ സജിന്‍ ശശി നൂര്‍ദീനെ വിളിച്ചുവരുത്തി ചോദ്യംചെയ്തു വിട്ടയച്ചിരുന്നു. സിഐ എത്തി അന്വേഷണം നടത്തി റസിയയുടെ ബന്ധുക്കളെ വിളിച്ചുവരുത്തിയപ്പോഴാണ് മൃതദേഹം തിരിച്ചറിഞ്ഞത്. അവിവാഹിതയായ റസിയയും രണ്ടു വിവാഹം കഴിച്ച നൂര്‍ദീനും തമ്മില്‍ ഇടയ്ക്ക് കാണാറുണ്െടന്നു നാട്ടുകാര്‍ പോലീസിനോടു പറഞ്ഞു. ആര്‍ഡിഒയുടെ നിര്‍ദേശപ്രകാരം തഹസില്‍ദാര്‍ മുഹമ്മദ് റഫീക്കിന്റെ സാന്നിധ്യത്തില്‍ പോലീസ് ഫോറന്‍സിക് തലവന്‍ ഉണ്ണികൃഷ്ണന്റെ നേതൃത്വത്തില്‍ ഇന്‍ക്വസ്റ് നടത്തി. മൃതദേഹം തൃശൂര്‍ മെഡിക്കല്‍ കോളജ് ആശുപത്രിയിലേക്കു മാറ്റി. ഇന്നുരാവിലെ പോസ്റുമോര്‍ട്ടം നടത്തും.