മാവോയിസ്റുകള്‍ വീണ്ടുമെത്തി
സ്വന്തം ലേഖകന്‍

കണ്ണൂര്‍: മാവോയിസ്റ് സംഘത്തിനു വേണ്ടിയുള്ള തെരച്ചില്‍ നടക്കുന്നതിനിടെ കണ്ണൂര്‍ ജില്ലയിലെ പയ്യാവൂര്‍ കാഞ്ഞിരക്കൊല്ലിക്കു സമീപം ചിറ്റാരി കോളനിയില്‍ ആയുധധാരികളായ അഞ്ചംഗ സംഘമെത്തി.

ഒരു സ്ത്രീയും മലയാളിയുമടക്കമുള്ള സംഘമാണ് ഇന്നലെ വൈകുന്നേരം 6.30 ഓടെ കോളനി പരിസരത്ത് എത്തിയത്. പട്ടാള വേഷത്തിലായിരുന്ന അഞ്ചുപേരുടെ കൈകളിലും തോക്കുണ്ടായിരുന്നു. കോളനിയിലെ വീട്ടുകാരെ സമീപിച്ച് തങ്ങള്‍ മാവോയിസ്റ്റുകളാണെന്നും നിങ്ങളെ ആക്രമിക്കില്ലെന്നും അരിയും മറ്റു സാധനങ്ങളും നല്‍കണമെന്നും ആവശ്യപ്പെട്ടു. വീടുകളില്‍ അരിയില്ലെന്നു പറഞ്ഞപ്പോള്‍ കോളനിയിലെ ബാബു എന്നയാളോട് സമീപത്തെ കടയില്‍ പോയി അരി വാങ്ങി നല്‍കാന്‍ നിര്‍ദേശിച്ചു. ഇയാള്‍ അരിയും പലചരക്കു സാധനങ്ങളും വാങ്ങി ഇവര്‍ക്കു നല്‍കി. രണ്ടായിരം രൂപയോളം സാധനങ്ങളുടെ വിലയായി സംഘം നല്‍കി. ഇതിനിടെ, ചിലര്‍ മൊബൈലില്‍ പടമെടുക്കാന്‍ ശ്രമിച്ചപ്പോള്‍ തോക്കുയര്‍ത്തി ഭീഷണിപ്പെടുത്തിയതായും പറയുന്നു. സാധനങ്ങളുമായി സംഘം വനത്തിലേക്കു തന്നെ തിരിച്ചുപോയി.


ഈസമയം സമന്‍സ് നല്‍കാനെത്തിയ രണ്ട് എക്സൈസ് ഉദ്യോഗസ്ഥര്‍ മഫ്തിയില്‍ കോളനിയിലുണ്ടായിരുന്നു.

ഇവര്‍ വിവരമറിയിച്ചതിനെത്തുടര്‍ന്ന് ശ്രീകണ്ഠപുരം സിഐ ജോഷി ജോസ്, പയ്യാവൂര്‍ എസ്ഐ കെ.പി. സതീശന്‍ തുടങ്ങിയവരുടെ നേതൃത്വത്തില്‍ പോലീസ് സ്ഥലത്തെത്തി. കോളനി പരിസരത്തും വനാതിര്‍ത്തിയിലും ഇവര്‍ തെരച്ചില്‍ നടത്തിയെങ്കിലും ആരെയും കണ്െടത്താനായില്ല.

ഈ മാസം ഒന്നിനു ചെറുപുഴയ്ക്കു സമീപം കാനംവയലിനോടു ചേര്‍ന്നു കര്‍ണാടക വനത്തിലെ മാങ്കുണ്ടി എസ്റ്റേറ്റില്‍ മാവോയിസ്റ്റ് സംഘം എത്തിയിരുന്നു. ഒരു സ്ത്രീയും മലയാളിയുമടക്കം ആറുപേരാണ് സംഘത്തിലുണ്ടായിരുന്നത്. ഈ സംഘം തന്നെയാണു ചിറ്റാരിക്കോളനിയില്‍ എത്തിയതെന്നാണു കരുതുന്നത്.