ചന്ദ്രശേഖരന്‍ വധം: പ്രതികളുടെ പേരുകള്‍ തിരിച്ചറിഞ്ഞതു പോലീസ് സഹായത്തോടെയെന്നു മൂന്നാം സാക്ഷി
കോഴിക്കോട്: ആര്‍എംപി നേതാവ് ടി.പി ചന്ദ്രശേഖരനെ വെട്ടിക്കൊലപ്പെടുത്തിയ പ്രതികളെ തിരിച്ചറിഞ്ഞതു പോലീസിന്റെ സഹായത്തോടെയായിരുന്നുവെന്നു കേസിലെ മൂന്നാം സാക്ഷിയും ദൃക്സാക്ഷികളിലൊരാളുമായ കെ.കെ. പ്രസീത്. കേസിലെ പ്രതികള്‍ക്കുവേണ്ടി ഹാജരായ അഭിഭാഷകരുടെ ചോദ്യത്തിനു മറുപടിയായാണു സാക്ഷി ഇങ്ങനെ പറഞ്ഞത്.പ്രതിഭാഗത്തിനുവേണ്ടി അഭിഭാഷകരായ ബി.രാമന്‍പിള്ള, പി.വി ഹരി, കെ.എം രാംദാസ്, ദാമോദരന്‍ നമ്പ്യാര്‍, കെ. വിശ്വന്‍, എം. അശോകന്‍ എന്നിവരും, പ്രോസിക്യൂഷനുവേണ്ടി ചീഫ് പ്രോസിക്യൂട്ടര്‍ സി.കെ. ശ്രീധരനുമാണ് ഇന്നലെ കോടതിയില്‍ ഹാജരായത്.

ചന്ദ്രശേഖരനെ കൊലപ്പെടുത്തിയ പ്രതികളുടെ പേര് അറിയില്ലായിരുന്നുവെന്നും തെളിവെടുപ്പു സമയത്ത് അന്വേഷണസംഘത്തിന്റെ ക്യാമ്പ് ഓഫീസില്‍ എത്തിയാണു പ്രതികളെ തിരിച്ചറിഞ്ഞതെന്നും ഇയാള്‍ പറഞ്ഞു. പ്രതികളെ തിരിച്ചറിഞ്ഞശേഷമാണ് ഇവരുടെ പേരു വിവരങ്ങള്‍ പോലീസ് തന്നോടു പറഞ്ഞതെന്നും പ്രസീത് പറഞ്ഞു. പോലീസ് തയാറാക്കിയ മഹസര്‍ വായിച്ചിട്ടാണോ സാക്ഷിയെന്ന നിലയില്‍ ഇതില്‍ ഒപ്പിട്ടതെന്ന ചോദ്യത്തിന് ഓര്‍മയില്ലെന്നു പറഞ്ഞ സാക്ഷി പല ചോദ്യങ്ങളിലും വ്യക്തമായ ധാരണയില്ലെന്നും മറുപടി നല്‍കി. വള്ളിക്കാട്ടെ ക്ളബ്ബിന്റെ വാര്‍ഷികത്തിന് അലങ്കരിക്കുന്നതിന്റെ ഭാഗമായി വള്ളിക്കാട് അങ്ങാടിയില്‍ ഏഴുമീറ്റര്‍ നീളമുള്ള ബാനര്‍ കെട്ടുന്നതിനിടയിലാണ് താന്‍ വീട്ടിലേക്ക് പോകാന്‍ ഒരുങ്ങിയത്. ഈ സമയത്താ ണ് വടക്കുഭാഗത്തുനിന്നും പടിഞ്ഞാറു ഭാഗത്തേക്കു പ്രതികള്‍ സഞ്ചരിച്ച കാര്‍വന്നത്. പിന്നീട് കാര്‍ വലത്തേക്കു തിരിഞ്ഞുനിന്നു. ഇതു താന്‍ നില്‍ക്കുന്നതിന്റെ നാലുമീറ്റര്‍ മുന്നിലായിട്ടായിരുന്നുവെന്നും പ്രസീത് പറഞ്ഞു. കാറി ല്‍നിന്നും വാളുമായി ഇറങ്ങിയ മൂന്നുപേര്‍ കുനിഞ്ഞുനിന്നു ബൈക്കില്‍ നിന്നും വീണ ആളെ വെട്ടുകയായിരുന്നുവെന്നും മറ്റു രണ്ടുപേര്‍ ആയുധങ്ങളുമായി രണ്ടു ഭാഗങ്ങളില്‍ നിന്നിരുന്നുവെന്നും ക്രോസ് വിസ്താരത്തിനിടെ പ്രസീത് മൊഴിനല്‍കി. തൊട്ടടുത്ത പള്ളിയില്‍നിന്നുള്ള വെളിച്ചവും നല്ലനിലാവുമുണ്ടായിരുന്നതുകൊണ്ട് കാറില്‍നിന്നിറങ്ങിയ പ്രതികളെ കണ്ടുവെന്നും ഇയാള്‍ പറഞ്ഞു. കാറിടിച്ച് ബൈക്ക് യാത്രക്കാരന്‍ വീണതു കണ്ടപ്പോള്‍ ക്ളബ്ബ് വാര്‍ഷികത്തിന് അലങ്കരിക്കാന്‍ കൂട്ടത്തിലുണ്ടായിരുന്ന രാമചന്ദ്രനും മനീഷുമെല്ലാം ഓടുന്നതുകണ്ടു. താനും പിന്നാലെ ചെന്നു. എല്ലാം ഒന്നരമിനിറ്റുകൊണ്ടു കഴിഞ്ഞിരുന്നു. ബൈക്കില്‍ നിന്നു വീണ ആള്‍ മലര്‍ന്നുകിടന്ന് വെട്ട് തടുക്കാന്‍ ശ്രമിച്ചിരുന്നതും കണ്ടിരുന്നു.പ്രസീത് പറഞ്ഞു.സംഭവം കഴിഞ്ഞ് വീട്ടിലേക്ക് പോയ താന്‍ പിറ്റേന്ന് രാവിലെ പതിനൊന്നോടുകൂടിയാണ് വീട്ടില്‍ നിന്ന് പുറത്തിറങ്ങിയത്. സംഭവസ്ഥലത്ത് എത്തുമ്പോള്‍ അവിടെ പോലീസുണ്ടായിരുന്നു. ഇവിടെ തലേ ദിവസം കണ്ട കാര്യം സ്ഥലത്തുണ്ടായിരുന്ന ഡിവൈഎസ്പിയോടു പറഞ്ഞു. കൂടെ വരാന്‍ അദ്ദേഹം ആവശ്യപ്പെട്ടപ്രകാരം വടകര പോലീസ് സ്റ്റേഷനിലേക്ക് പോലീസ് വാഹനത്തില്‍ പോവുകയും ചെയ്തിരുന്നു.


കോടതിയില്‍ ഹാജരാക്കുന്ന പ്രതികളെ കാണാന്‍ താന്‍ പോയിട്ടുണ്ടായിരുന്നില്ല. കാറില്‍നിന്നു പോലീസ് കണ്െടടുത്തുവെന്നു പറയുന്നതൊന്നും നുണയല്ല. കോടതിയില്‍നിന്ന് സമന്‍സ് വന്നപ്രകാരമാണു ജയിലില്‍ പ്രതികളുടെ തിരിച്ചറിയല്‍ പരേഡിനു പോയത്. മൂന്നു പ്രാവശ്യം പോയിരുന്നു. തിരിച്ചറിയല്‍ പരേഡിനു പോകുമ്പോള്‍ എന്തിനാണ് പോകുന്നതെന്ന് അറിയില്ലായിരുന്നു. ഒരേനിറത്തിലുള്ള വസ്ത്രങ്ങള്‍ ധരിച്ചാണ് പ്രതികള്‍ പരേഡിനു ഹാജരായിരുന്നത്.അന്വേഷണസംഘം തെളിവെടുപ്പിനായി വിളിപ്പിച്ചതു 2012 മേയ് 25നായിരുന്നു. കൊലയില്‍ പങ്കാളികളായിരുന്നവരെ കാണിച്ചുകൊടുത്തപ്പോള്‍ മാത്രമാണു പോലീസ് ഇവരുടെ പേരു വിവരം തന്നോടു വെളിപ്പെടുത്തിയതെന്നും പ്രസീത് പറഞ്ഞു.
ചന്ദ്രശേഖരന്‍ സഞ്ചരിച്ച ബൈ ക്കിനെക്കുറിച്ചു വ്യക്തമായി പറയാന്‍ കഴിയില്ല. വെട്ടേറ്റ ആളെ കൊണ്ടുപോകുമ്പോള്‍ ആരുടെയെങ്കിലും ശരീരത്തില്‍ രക്തം ഒലിച്ചിറങ്ങിയിരുന്നതായി ശ്രദ്ധിച്ചിരുന്നില്ല. പോലീസ് ജീപ്പ് എത്തിയ ശേഷമാണ് ആശുപത്രിയിലേക്കു കൊണ്ടുപോയത്. കേസിന്റെ വിവരങ്ങളും അന്വേഷണപുരോഗതിയും മാധ്യമങ്ങളില്‍നിന്നും സുഹൃത്തുക്കള്‍ വഴിയുമാണ് അറിഞ്ഞതെന്നും ഇയാള്‍ പറഞ്ഞു. ഇന്നു രണ്ടാം സാക്ഷിയായ ടി.പി. രമേശനെ കോടതി വിസ്തരിക്കും.