മലബാറിലെ 35 സ്കൂളുകള്‍ക്ക് എയ്ഡഡ് പദവിയില്ല
സ്വന്തം ലഖകന്‍

തിരുവനന്തപുരം: മലബാറിലെ വിവാദമായ 35 അണ്‍ എയ്ഡഡ് സ്കൂളുകള്‍ക്ക് എയ്ഡഡ് പദവി നല്‍കേണ്ടതില്ലെന്നു മന്ത്രിസഭായോഗം തീരുമാനിച്ചു. എന്നാല്‍, അധ്യാപക-അനധ്യാപക തസ്തികകയില്‍ ജോലി നോക്കുന്ന 238 പേര്‍ക്ക് ഈ അധ്യയന വര്‍ഷം മുതല്‍ മറ്റ് അധ്യാപകര്‍ക്കു ലഭിക്കുന്നതുപോലുള്ള ആനുകൂല്യം നല്‍കും. ശമ്പള കുടിശിക ഉണ്ടാവില്ല. കേന്ദ്രാവിഷ്കൃത പദ്ധതിയായ ഏരിയ ഇന്റന്‍സീവ് ഡവലപ്പ്മെന്റ് പ്രോഗ്രാമിന്റെ അടിസ്ഥാനത്തിലാണു ജീവനക്കാര്‍ക്ക് ആനുകൂല്യം നല്‍കുന്നത്.

ഹയര്‍ സെക്കന്‍ഡറി സ്കൂളുകളില്‍ 76 അധ്യാപക തസ്തികകള്‍ അനുവദിക്കാന്‍ മന്ത്രിസഭായോഗം തീരുമാനിച്ചു. 2010-11 ല്‍ ഹയര്‍സെക്കന്‍ഡറി അനുവദിച്ച സ്കൂളുകളിലാണു പുതിയ തസ്തികകള്‍ അനുവദിച്ചത്.

72 ജൂണിയര്‍ അധ്യാപകരുടെയും നാലു സീനിയര്‍ അധ്യാപകരുടെയും തസ്തികകള്‍ക്കാണ് അനുമതി നല്‍കിയതെന്നു മുഖ്യമന്ത്രി ഉമ്മന്‍ചാണ്ടി അറിയിച്ചു. 173 ജൂണിയര്‍ അധ്യാപക തസ്തികകള്‍ സീനിയറാക്കാനും തീരുമാനിച്ചു. ലീഗല്‍ മെട്രോളജി വകുപ്പില്‍ 15 അധിക തസ്തികകള്‍ സൃഷ്ടിച്ചു. രാജീവ്ഗാന്ധി അക്കാദമി ഫോര്‍ ഏവിയേഷന്‍ ടെക്നോളജിയില്‍ ശമ്പള പരിഷ്കരണത്തിനു സാങ്കേതിക അനുമതി നല്‍കി.


റവന്യു വകുപ്പിന്റെ കൈവശമുള്ള കൂടല്‍മാണിക്യം ദേവസ്വത്തിന്റെ 1.42 ഏക്കര്‍ ഭൂമി കോടതിയിലെ കേസു പിന്‍വലിക്കുന്നതിനനുസരിച്ചു ദേവസ്വത്തിനു വിട്ടുനല്‍കാന്‍ തീരുമാനിച്ചു.

വയനാട് ജില്ലയിലെ റവന്യു വകുപ്പിന്റെ അധീനതയിലുള്ള പാറ ക്വാറികളില്‍ ഒരു വര്‍ഷത്തേക്കു താത്കാലിക ഖനനം നടത്താന്‍ അനുമതി നല്‍കി. ക്വാറികളുടെ പ്രവര്‍ത്തനം നിലച്ചതോടെ പാറയും മെറ്റലും കിട്ടാനില്ലാത്ത അവസ്ഥ വന്നതോടെ വയനാട് ജില്ലയിലെ മുഴുവന്‍ വികസന പ്രവര്‍ത്തനങ്ങളും സ്തംഭനാവ സ്ഥയിലായിരുന്നു.