അധ്യാപക- വിദ്യാര്‍ഥി അനുപാതം കാലോചിതമായി പരിഷ്കരിക്കണം: മാര്‍ ആന്‍ഡ്രൂസ് താഴത്ത് : Deepika.com Kerala News |

തിരുവനന്തപുരം: പൊതു വിദ്യാഭ്യാസ മേഖലയുടെ ഗുണപരമായ മാറ്റത്തിന് അധ്യാപക- വിദ്യാര്‍ഥി അനുപാതം കാലോചിതമായി പരിഷ്കരിക്കണമെന്ന് കെസിബിസി വിദ്യാഭ്യാസ കമ്മീഷന്‍ ചെയര്‍മാന്‍ ആര്‍ച്ച്ബിഷപ് മാര്‍ ആന്‍ഡ്രൂസ് താഴത്ത്. സംതൃപ്തമായ അധ്യാപക സമൂഹത്തിനു മാത്രമേ ഈ മേഖലയില്‍ പുതിയ മാറ്റങ്ങള്‍ സൃഷ്ടിക്കാനാകൂ. മാറുന്ന ലോകത്തു ധാര്‍മികമൂല്യങ്ങളുടെ പ്രവാചകരാകാന്‍ അധ്യാപകര്‍ക്കു കഴിയണമെന്ന് അദ്ദേഹം ആഹ്വാനം ചെയ്തു.

കേരള കത്തോലിക്കാ മെത്രാന്‍ സമിതിയുടെ ആഭിമുഖ്യത്തില്‍ കേരളത്തിലെ 31 രൂപതകളിലായി പ്രവര്‍ത്തിക്കുന്ന സര്‍ക്കാര്‍, എയ്ഡഡ്, അണ്‍എയ്ഡഡ് സ്കൂള്‍ അധ്യാപകരുടെ പൊതുവേദിയായ കാത്തലിക് ടീച്ചേഴ്സ് ഗില്‍ഡിന്റെ സംസ്ഥാനതല പ്രവര്‍ത്തനോദ്ഘാടനം നിര്‍വഹിച്ചു പ്രസംഗിക്കുകയായിരുന്നു അദ്ദേഹം.

അധ്യാപകരുടെ ഹ്രസ്വകാല- ദീര്‍ഘകാല ഒഴിവുകളില്‍ മാനേജ്മെന്റിന്റെ നിയമനാവകാശം ഇല്ലാതാക്കുകയും സ്പെഷലിസ്റ് അധ്യാപക നിയമനം പിഎസ്സിക്കു വിടുകയും ചെയ്യാനുള്ള സര്‍ക്കാര്‍ ഉത്തരവ് ന്യൂനപക്ഷാവകാശങ്ങളുടെ ലംഘനമാണെന്ന് അദ്ദേഹം പറഞ്ഞു.

കാത്തലിക് ടീച്ചേഴ്സ് ഗില്‍ഡിന്റെ പുതിയ ഭാരവാഹികളായി ജോഷി വടക്കന്‍ (തൃശൂര്‍)- പ്രസിഡന്റ്, സാലു പതാലില്‍ (തിരുവനന്തപുരം) - ജനറല്‍ സെക്രട്ടറി, എം.എല്‍. സേവ്യര്‍ ( വരാപ്പുഴ)-ട്രഷറര്‍, ജയിംസ് കോശി, മരിയദാസ് (തിരുവനന്തപുരം), പോള്‍ ജയിംസ് (എറണാകുളം)- വൈസ് പ്രസിഡന്റുമാര്‍, ജെസി ജയിംസ് (കോട്ടപ്പുറം), സി.ടി.വര്‍ഗീസ് (മാവേലിക്കര), സിസ്റര്‍ ആല്‍ഫി നെല്ലിക്കുന്നേല്‍ (എറണാകുളം)-ജോയിന്റ് സെക്രട്ടറിമാര്‍ എന്നിവരെ തെരഞ്ഞെടുത്തു.

യോഗത്തില്‍ ടീച്ചേഴ്സ് ഗില്‍ഡ് ഡയറക്ടര്‍ ഫാ. ജേക്കബ് പാലയ്ക്കാപ്പള്ളി, കെസിബിസി ഡെപ്യൂട്ടി സെക്രട്ടറി ജനറല്‍ ഫാ. വര്‍ഗീസ് വള്ളിക്കാട്, ഫാ. മാത്യു ചന്ദ്രന്‍കുന്നേല്‍, മോണ്‍. തോമസ് പനയ്ക്കല്‍ എന്നിവര്‍ പ്രസംഗിച്ചു.