സിയാല്‍ 162 കോടി രൂപ മുടക്കി വിമാനങ്ങളുടെ പാര്‍ക്കിംഗ് ബേ നിര്‍മിക്കും
സിയാല്‍ 162 കോടി രൂപ മുടക്കി വിമാനങ്ങളുടെ പാര്‍ക്കിംഗ് ബേ നിര്‍മിക്കും
Thursday, September 18, 2014 12:25 AM IST
നെടുമ്പാശേരി: കൊച്ചിന്‍ ഇന്റര്‍നാഷണല്‍ എയര്‍പോര്‍ട്ട് (സിയാല്‍) 162.45 കോടി രൂപ മുടക്കി വിമാനങ്ങള്‍ക്കു പുതിയ പാര്‍ക്കിംഗ് ബേ നിര്‍മിക്കും. ഇതോടനുബന്ധിച്ചു ടാക്സി ലിങ്കുകളും ലൈറ്റിംഗ് സൌകര്യങ്ങളും ഉണ്ടായിരിക്കും. 18 മാസത്തിനകം ഇതിന്റെ ജോലികള്‍ പൂര്‍ത്തിയാക്കത്തക്ക വിധം ടെന്‍ഡറായിട്ടുണ്ട്.

85 കോടി രൂപ മുടക്കി നിര്‍മിക്കുന്ന 15 ലക്ഷം ചതുരശ്ര അടി വിസ്തീര്‍ണമുള്ള പുതിയ അന്താരാഷ്ട്ര ടെര്‍മിനലിന്റെ ഭാഗമായിരിക്കും വിമാനങ്ങളുടെ പാര്‍ക്കിംഗ് ഏരിയ. പുതിയ ടെര്‍മിനലില്‍ പാര്‍ക്കിംഗ് ബേയില്‍ പത്ത് എയ്റോ ബ്രിഡ്ജുകള്‍ ഉണ്ടായിരിക്കും. യാത്രക്കാര്‍ക്കു വിമാനത്തില്‍നിന്ന് എയ്റോ ബ്രിഡ്ജ് വഴി മഴയും മഞ്ഞും വെയിലും ഏല്‍ക്കാതെ ടെര്‍മിനലില്‍ എത്താന്‍ കഴിയും. 2016 മാര്‍ച്ചില്‍ നിര്‍മാണ ജോലികള്‍ പൂര്‍ത്തിയാക്കി പുതിയ ടെര്‍മിനല്‍ പ്രവര്‍ത്തിച്ചുതുടങ്ങും. മണിക്കൂറില്‍ 4,000 യാത്രക്കാരെ കൈകാര്യം ചെയ്യാനുള്ള സൌകര്യമാണു സജ്ജമാക്കുന്നത്. 11 ചെക്ക് ഇന്‍ കൌണ്ടറുകള്‍, 19 ബോര്‍ഡിംഗ് ഗേറ്റ്, 60 എമിഗ്രേഷന്‍ കൌണ്ടറുകള്‍ എന്നിവ ഉണ്ടായിരിക്കും. കിറ്റ്കോയാണു നിര്‍മാണത്തിന്റെ മേല്‍നോട്ടം വഹിക്കുന്നത്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.