രാജ്യസഭ: പ്രഥമ ദൌത്യത്തില്‍ തോമസ് ഉണ്ണിയാടനു വിജയം
Tuesday, April 21, 2015 12:20 AM IST
തിരുവനന്തപുരം: ചീഫ് വിപ്പായ ശേഷം തോമസ് ഉണ്ണിയാടന്റെ പ്രഥമ ദൌത്യമായ രാജ്യസഭാ തെരഞ്ഞെടുപ്പില്‍ അഭിമാനാര്‍ഹമായ വിജയം നേടാനായി. ഘടകകക്ഷികള്‍ ഇടഞ്ഞുനില്‍ക്കുന്നതിനിടയിലും യുഡിഎഫിന്റെ മുഴുവന്‍ വോട്ടുകളും കോണ്‍ഗ്രസിലെ വയലാര്‍ രവിക്കും മുസ്ലിം ലീഗിലെ അബ്ദുള്‍ വഹാബിനും ഉറപ്പാക്കാനായി.

കേരള കോണ്‍ഗ്രസ്- എമ്മുമായി ഇടഞ്ഞുനില്‍ക്കുന്ന മുന്‍ ചീഫ് വിപ്പ് പി.സി. ജോര്‍ജിന്റെ വോട്ടും യുഡിഎഫിനു തന്നെ ലഭിച്ചു. അസംതൃപ്തരായ ജനതാദള്‍- യുവിന്റെയും ആര്‍എസ്പിയുടെയും വോട്ടുകള്‍ ഉറപ്പാക്കാനായതും ചീഫ് വിപ്പിന്റെ ഏകോപനത്തിനു ലഭിച്ച പൊന്‍ തൂവലായി. എന്നാല്‍, ഇനി നിയമസഭാ സമ്മേളനം ചേരുമ്പോഴുള്ള നടപടികളാണു തലവേദനയ്ക്കിടയാക്കുന്നത്.


പി.സി. ജോര്‍ജ് ഇനി യുഡിഎഫിനു വോട്ടു ചെയ്യുന്ന കാര്യം ആലോചിക്കുമെന്നാണു പ്രഖ്യാപിച്ചിട്ടുള്ളത്. രണ്ടു മാസത്തിനുള്ളില്‍ പ്രഖ്യാപനമുണ്ടാകുമെന്നു ജനതാദള്‍- യു സംസ്ഥാന പ്രസിഡന്റ് എം.പി. വീരേന്ദ്രകുമാറും പ്രഖ്യാപിച്ചിച്ചിട്ടുണ്ട്. പ്രതിസന്ധികളെ അതിജീവിക്കുകയാണ് ഇനി ഉണ്ണിയാടന്‍ നേരിടുന്ന പ്രധാന പ്രതിസന്ധി.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.