അധ്യാപക- വിദ്യാര്‍ഥി അനുപാതം സ്പെഷല്‍ സ്കൂളുകളില്‍ പുതുക്കി : Deepika.com Kerala News |

തളിപ്പറമ്പ്: സ്പെഷല്‍ സ്കൂളുകളിലെ അധ്യാപക- അനധ്യാപക-വിദ്യാര്‍ഥി അനുപാതം പുതുക്കി നിശ്ചയിച്ചും നിലവിലെ ഉത്തരവുകളില്‍ ഭേദഗതി വരുത്തിയും സര്‍ക്കാര്‍ ഉത്തരവിട്ടു.

സര്‍ക്കാര്‍-എയ്ഡഡ് മേഖലകളില്‍ പ്രവര്‍ത്തിക്കുന്ന അന്ധ-ബധിര വിദ്യാര്‍ഥികള്‍ പഠിക്കുന്ന സ്പെഷല്‍ സ്കൂളുകളിലെ നിലവിലുള്ള അധ്യാപക- വിദ്യാര്‍ഥി അനുപാതം 1: 5 2:15, 3:25 എന്നതാണ്. ഇതു യഥാക്രമം 1:5, 2:11, 3:16 എന്ന അനുപാതത്തില്‍ കുറവുചെയ്തു. മേട്രണ്‍- വിദ്യാര്‍ഥി അനുപാതം 1:50 എന്നത് 1:40 ആയും കുക്ക്-വിദ്യാര്‍ഥി അനുപാതം 1:35ല്‍നിന്നും 1 :30 ആയും കുറച്ചിട്ടുണ്ട്. നിലവിലുണ്ടായിരുന്ന ഉത്തരവില്‍ മാറ്റം വരുത്താത്ത പക്ഷം സര്‍ക്കാര്‍- എയ്ഡഡ് മേഖലയിലെ സ്പെഷല്‍ സ്കൂളുകളില്‍ ജോലിചെയ്തു വരുന്ന നിരവധി അധ്യാപക- അനധ്യാപകര്‍ തസ്തിക നഷ്ടം കാരണം പുറത്തു പോകേണ്ടിവരുമെന്നു ചൂണ്ടിക്കാണിച്ച് എയ്ഡഡ് സ്കൂള്‍ മാനേജര്‍മാരും അധ്യാപക സംഘടനകളും നല്‍കിയ നിവേദനങ്ങള്‍ പരിഗണിച്ചാണു തീരുമാനം. കേരള ഫെഡറേഷന്‍ ഓഫ് ദി ബ്ളൈന്‍ഡും അനുപാതം കുറയ്ക്കണമെന്നാവശ്യപ്പെട്ടു സര്‍ക്കാരിലേക്കു നിവേദനങ്ങള്‍ നല്‍കിയിരുന്നു. അടിസ്ഥാന അനുപാതമായ 1:5 എന്നതില്‍ മാറ്റം വരുത്തിയിട്ടില്ല.

ഒരു സ്കൂളിന് അംഗീകാരം കിട്ടണമെങ്കില്‍ ഒരു ക്ളാസില്‍ കുറഞ്ഞത് അഞ്ചു കുട്ടികള്‍ വേണം. നിലവിലുള്ള നിയമമനുസരിച്ചു പൊതുവിദ്യാലയങ്ങളില്‍ ഒരു കുട്ടിയെങ്കിലും ഉണ്െടങ്കില്‍ ഒരു ഡിവിഷന്‍ നിലനിര്‍ത്താന്‍ അനുവദിക്കുന്നുണ്ട്. ഈ ആനുകൂല്യം സ്പെഷല്‍ സ്കൂളുകള്‍ക്കും ബാധകമാക്കിയും ഉത്തരവിട്ടിട്ടുണ്ട്.

നിലവില്‍ നിയമനാംഗീകാരം ലഭിച്ചിട്ടുള്ള സ്പെഷല്‍ സ്കൂളുകളിലെ അധ്യാപകരെ സംരക്ഷിക്കാനായി അധ്യാപക- വിദ്യാര്‍ഥി അനുപാതത്തില്‍ മാറ്റം വരുത്തിയതെന്ന് ഉത്തരവില്‍ പറയുന്നുണ്ട്. പുതുതായി നിയമനം ലഭിക്കുന്നവര്‍ക്കു പഴയ അനുപാതമായ 1 :5, 2:15, 3: 25 എന്നതായിരിക്കും പരിഗണിക്കുക.