സ്മാര്‍ട്ട് സിറ്റി സിഇഒ ജിജോ ജോസഫ് രാജിവച്ചു
Tuesday, June 30, 2015 12:20 AM IST
കൊച്ചി: കൊച്ചി സ്മാര്‍ട്ട്സിറ്റി സിഇഒ ജിജോ ജോസഫ് രാജിവച്ചു. വ്യക്തിപരമായ കാരണങ്ങള്‍ ചൂണ്ടിക്കാട്ടിയുള്ള രാജി സ്മാര്‍ട്ട്സിറ്റി ഡയറക്ടര്‍ ബോര്‍ഡ് അംഗീകരിച്ചതായി അദ്ദേഹം പത്രക്കുറിപ്പില്‍ അറിയിച്ചു. കഴിഞ്ഞ 23 നാണ് ഡയറക്ടര്‍ ബോര്‍ഡിന് രാജിക്കത്ത് സമര്‍പ്പിച്ചത്. 24 ന് ചേര്‍ന്ന ഡയറക്ടര്‍ ബോര്‍ഡ് യോഗം രാജി അംഗീകരിച്ചു. പദ്ധതിയുടെ ഒന്നാം ഐടി കെട്ടിടത്തിന്റെ ഉദ്ഘാടനം വരെ സ്ഥാനത്ത് തുടരാന്‍ നിര്‍ദേശിച്ചെങ്കിലും വ്യക്തിപരമായ കാരണങ്ങളാല്‍ ചുമതലകളില്‍ നിന്ന് ഉടന്‍ ഒഴിവാക്കിത്തരണമെന്ന ആവശ്യം ബോര്‍ഡ് അംഗീകരിക്കുകയായിരുന്നു.

എട്ടുവര്‍ഷമായി സ്തംഭനാവസ്ഥയിലായിരുന്ന പദ്ധതിക്ക് ജീവന്‍ നല്‍കാനായതില്‍ സന്തോഷമുണ്െടന്ന് ജിജോ പറഞ്ഞു. ചുമതലയേല്‍ക്കുമ്പോള്‍ തരിശുഭൂമി മാത്രമായിരുന്നു ഇവിടെയുണ്ടായിരുന്നത്.


പദ്ധതിക്ക് സെസ് പദവിയോ പാരിസ്ഥിതികാനുമതിയോ ലഭിച്ചിരുന്നില്ല. 24 മാസംകൊണ്ട് 6.5 ലക്ഷം ചതുരശ്ര അടി ലീഡ് പ്ളാറ്റിനം കെട്ടിടത്തിന്റെ നിര്‍മാണം പൂര്‍ത്തിയാക്കാനും അതോടനുബന്ധിച്ച് ആദ്യപാലം, 3.7 കിലോമീറ്റര്‍ ഉള്‍നാടന്‍ റോഡുകള്‍, ജലം, വൈദ്യുതി സംഭരണ-വിതരണ സംവിധാനങ്ങള്‍ തുടങ്ങിയ അടിസ്ഥാന സൌകര്യങ്ങള്‍ വികസിപ്പിക്കാനും കഴിഞ്ഞുവെന്ന് അദ്ദേഹം പറഞ്ഞു.

2013 ജൂണില്‍ കൊച്ചി സ്മാര്‍ട്ട്സിറ്റിയുടെ സിഇഒയായി ചുമതലയേല്‍ക്കുന്നതിന് മുമ്പ് രണ്ടുവര്‍ഷം കൊച്ചി ഇന്‍ഫോപാര്‍ക്കിന്റെ സിഇഒ ആയി പ്രവര്‍ത്തിക്കുകയായിരുന്നു അദ്ദേഹം.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.