സദാചാര പോലീസ് ചമഞ്ഞ് കെഎസ്ആര്‍ടിസി ജീവനക്കാരെ മര്‍ദിക്കുന്ന വീഡിയോ പുറത്ത്
സദാചാര പോലീസ് ചമഞ്ഞ് കെഎസ്ആര്‍ടിസി ജീവനക്കാരെ മര്‍ദിക്കുന്ന വീഡിയോ പുറത്ത്
Monday, November 30, 2015 12:58 AM IST
കാസര്‍ഗോഡ്: കാസര്‍ഗോഡ് കെഎസ്ആര്‍ടിസി ഡിപ്പോയില്‍ പൂജ വിവാദത്തിന്റെ തുടര്‍ച്ചയായി കെഎസ്ആര്‍ടിസിയിലെ മൂന്നു ജീവനക്കാരെ ബദിയഡുക്കയില്‍വച്ചു സദാചാര പോലീസ് ചമഞ്ഞു ചിലര്‍ മര്‍ദിക്കുന്നതിന്റെ വീഡിയോ ദൃശ്യവും പുറത്തായി. ഏതാനും ദിവസങ്ങള്‍ക്ക് മുമ്പാണു മൂന്നു കെഎസ്ആര്‍ടിസി ജീവനക്കാരെ സദാചാര പോലീസ് ചമഞ്ഞു ചിലര്‍ മര്‍ദിച്ചത്.

ഈ സംഭവവുമായി ബന്ധപ്പെട്ടു നാട്ടുകാരുടെ പരാതിയില്‍ മദ്യപിച്ചു ബഹളം വച്ചതിനു കെഎസ്ആര്‍ടിസി ജീവനക്കാര്‍ക്കെതിരേ ബദിയഡുക്ക പോലീസ് കേസെടുത്തിരുന്നു. സല്‍ക്കാരത്തിനു വിളിച്ചു ജീവനക്കാര്‍ക്കു മദ്യം നല്‍കി മയക്കിയ ശേഷം ഒരു സ്ത്രീയുമായി ബന്ധപ്പെടുത്തി ഭീഷണിപ്പെടുത്തി ഇവരില്‍നിന്നു പണം ആവശ്യപ്പെടുകയായിരുന്നുവത്രെ. പണം നല്‍കാന്‍ തയാറാകാത്തതിനെത്തുടര്‍ന്നു ജീവനക്കാരെ കെട്ടിയിട്ടു മര്‍ദിക്കുകയായിരുന്നുവെന്നാണു പരാതി. കെഎസ്ആര്‍ടിസിയില്‍ നടന്ന പൂജ വിവാദം പുറത്തുവന്നതിനു പ്രധാന കാരണവും ബദിയഡുക്കയില്‍ നടന്ന ഈ വിഷയമാണെന്നാണു ചൂണ്ടിക്കാണിക്കപ്പടുന്നത്.


ഈ സംഭവത്തിനുശേഷം മര്‍ദിച്ച സംഘത്തില്‍പ്പെട്ട ഒരു സ്ത്രീ ബദിയഡുക്ക പോലീസ് സ്റേഷനിലും കെഎസ്ആര്‍ടിസി ജില്ലാ ഓഫീസിലും ജീവനക്കാര്‍ക്കെതിരേ പരാതി നല്‍കിയിരുന്നു. ഇതിനുശേഷം ഇവരുടെ പരാതിയില്‍ ഭയന്ന് ഒരു ലക്ഷം രൂപ നല്‍കി സംഭവം ഒത്തുതീര്‍പ്പാക്കുകയായിരുന്നുവെന്നാണ് സംസാരം. പിന്നീടു സ്ത്രീ ഈ പരാതി പിന്‍വലിക്കുകയും ചെയ്തു.

ഈ സംഭവത്തില്‍ സംശയം തോന്നിയെങ്കിലും കേസ് പിന്‍വലിച്ചതിനാല്‍ അന്വേഷണം നിര്‍ത്തിവയ്ക്കുകയായിരുന്നുവെന്നു പോലീസ് പറഞ്ഞു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.