തിയറ്റർ സമരം പിൻവലിച്ചു : Deepika.com Kerala News |

കൊച്ചി: മലയാള ചലച്ചിത്ര മേഖലയെ പിടിച്ചുലച്ച ഒരു മാസത്തോളം നീണ്ട തിയറ്റർ സമരം പിൻവലിച്ചു. അടച്ചിട്ട തിയറ്ററുകൾ തുറക്കാൻ ഫിലിം എക്സിബിറ്റേഴ്സ് ഫെഡറേഷൻ തീരുമാനിച്ചതോടെയാണ് സമരത്തിന് അന്ത്യമായത്. മന്ത്രി എ.കെ. ബാലൻ വഴി മുഖ്യമന്ത്രി പിണറായി വിജയൻ നടത്തിയ ഇടപെടലിനെത്തുടർന്നാണ് സമരം പിൻവലിക്കാൻ കളമൊരുങ്ങിയത്.

അതേസമയം, സിനിമാ പ്രദർശനം എന്നു മുതൽ ആരംഭിക്കുമെന്ന കാര്യത്തിൽ വ്യക്തത കൈവന്നിട്ടില്ല. എന്നു മുതൽ സിനിമ പ്രദർശനത്തിനു ലഭിക്കുമെന്നതനുസരിച്ചിരിക്കും പ്രദർശനം. 25നു സർക്കാർ വിളിച്ചിരിക്കുന്ന ചലച്ചിത്ര മേഖലയിലെ സംഘടനകളുടെ സംയുക്ത യോഗത്തിനുശേഷം മാത്രമേ ഇക്കാര്യത്തിൽ വ്യക്തത കൈവരൂ.

സർക്കാർ ചർച്ചയ്ക്കു വിളിച്ച സാഹചര്യത്തിലാണ് സമരം പിൻവലിക്കാനുള്ള തീരുമാനമെന്നും 25നു വിളിച്ചിരിക്കുന്ന ചർച്ചയിൽ പ്രതീക്ഷയുണ്ടെന്നും എക്സിബിറ്റേഴ്സ് ഫെഡറേഷൻ പ്രസിഡന്‍റ് ലിബർട്ടി ബഷീർ പറഞ്ഞു. ഒരു വിഭാഗം തിയറ്റർ ഉടമകളുടെ പുതിയ സംഘടന ഫെഡറേഷന് ഭീഷണിയല്ല. പുതിയ സംഘടനയിൽ ചേർന്നെന്നു പറയുന്ന പലരും ഫെഡറേഷനിൽനിന്ന് പുറത്താക്കപ്പെട്ടവരാണ്. ഒരാൾ മാത്രമാണ് സംഘടനയിൽ ഔദ്യോഗിക അംഗത്വമുള്ളയാൾ. ആന്‍റണി പെരുമ്പാവൂരിനു പോലും ഫെഡറേഷൻ അംഗത്വമില്ലെന്നും ലിബർട്ടി ബഷീർ പറഞ്ഞു.പുതിയ സംഘടനകൾ രൂപീകരിക്കാൻ എല്ലാവർക്കും സ്വാതന്ത്ര്യമുണ്ടെന്നും ഇപ്പോൾ രൂപീകരിക്കപ്പെട്ട സംഘടന തങ്ങളുടെ പ്രവർത്തനങ്ങളെ ഒരു തരത്തിലും ബാധിക്കില്ലെന്നും ഫെഡറേഷൻ സെക്രട്ടറി ഷാജു അക്കര പ്രതികരിച്ചു. 25ന് ചലച്ചിത്രമേഖലയിലെ സംഘടനകളെ എല്ലാവരെയും സർക്കാർ ചർച്ചയ്ക്ക് ക്ഷണിച്ചിട്ടുണ്ടെന്നാണ് അറിയാൻ സാധിക്കുന്നത്. ഫെഡറേഷനെ പ്രതിനിധീകരിച്ച് താനും പ്രസിഡന്‍റ് ലിബർട്ടി ബഷീറുമാകും പങ്കെടുക്കുകയെന്നും ഷാജു പറഞ്ഞു.

സിനിമാരംഗത്തുനിന്നുള്ള രാഷ്‌ട്രീയ നേതാക്കളായ ഇന്നസെന്‍റ് എംപി, എംഎൽഎമാരായ മുകേഷ്, കെ.ബി. ഗണേഷ് കുമാർ എന്നിവരും ചർച്ചയിൽ പങ്കെടുക്കും. സിനിമാ സമരം ഉപാധികളില്ലാതെ പിൻവലിക്കണമെന്നു മുഖ്യമന്ത്രി പിണറായി വിജയൻ ഫേസ്ബുക്കിലൂടെ ആവശ്യപ്പെട്ടതും‌ ഫെഡറേഷന് തിരിച്ചടിയായിട്ടുണ്ടെന്നാണ് പൊതുവിലയിരുത്തൽ.