ബിയർ കുപ്പിക്കു തലയ്ക്കടിയേറ്റ യുവാവ് മരിച്ചു : Deepika.com Kerala News |

Click here for detailed news of all items

ബിയർ കുപ്പിക്കു തലയ്ക്കടിയേറ്റ യുവാവ് മരിച്ചു

Thursday, January 19, 2017 3:04 PM IST

തൊടുപുഴ: വാക്കേറ്റത്തെത്തുടർന്ന് ബിയർ കുപ്പിക്കു തലയ്ക്കടിയേറ്റ യുവാവ് മരിച്ചു. കോടിക്കുളം വണ്ടമറ്റം അമ്പാട്ട് സോമന്‍റെ മകൻ അർജുൻ (20) ആണ് മരിച്ചത്. തൊടുപുഴയിലെ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിൽ കഴിയവേ ഇന്നലെ ഉച്ചയ്ക്ക് 12.20ഓടെ മരണം സംഭവിക്കുകയായിരുന്നു. തലയ്ക്കു ഗുരുതര പരിക്കേറ്റ അർജുൻ രണ്ടു ദിവസമായി വെന്‍റിലേറ്ററിലായിരുന്നു. ചൊവ്വാഴ്ച രാത്രി ഒമ്പതോടെ കോടിക്കുളം ഐരാമ്പിള്ളിയിലാണു സംഭവം. പ്രായപൂർത്തിയാകാത്ത പ്ലസ്ടു വിദ്യാർഥിയാണ് അർജുനന്‍റെ തലക്കടിച്ചതെന്നു പോലീസ് പറയുന്നു.
പോലീസ് പറയുന്നതിങ്ങനെ: പ്ലസ്ടു വിദ്യാർഥിയുടെ സഹോദരിയും അർജുനനും ഒരേ കോളജിലാണു പഠിക്കുന്നത്.

അർജുൻ പ്ലസ്ടു വിദ്യാർഥിയുടെ സഹോദരിയോട് മോശമായി സംസാരിച്ചിരുന്നതായി ആക്ഷേപമുണ്ടായിരുന്നു. ഈ പ്രശ്നം പരിഹരിക്കാനാണു പെണ്‍കുട്ടിയുടെ വീട്ടിലേക്ക് യുവാവിനെ വിളിപ്പിച്ചത്. വീട്ടിലിരുന്നു സംസാരിക്കുമ്പോൾ ഉണ്ടായ വാക്കേറ്റത്തിനിടയിലാണു ബിയർ കുപ്പികൊണ്ട് അടിയേറ്റതെന്നു കാളിയാർ സിഐ അഗസ്റ്റ്യൻ മാത്യു പറഞ്ഞു.

സംഭവത്തിനു ശേഷം ബൈക്കിൽ ഒരു കിലോമീറ്ററോളം സഞ്ചരിച്ച അർജുൻ റോഡിൽ തലചുറ്റി വീഴുകയായിരുന്നു. തുടർന്നു നാട്ടുകാർ ചേർന്ന് ആശുപത്രിയിൽ പ്രവേശിപ്പിച്ചെങ്കിലും തലയ്ക്കുള്ളിലെ പരിക്ക് ഗുരുതരമായതിനാൽ മരണത്തിനു കീഴടങ്ങി.
സുഹൃത്തുക്കൾ വിളിച്ചുവെന്നു പറഞ്ഞാണ് അർജുൻ വീട്ടിൽനിന്നു പോയതെന്നു കേസുമായി ബന്ധപ്പെട്ടു പ്ലസ്ടു വിദ്യാർഥിയെ കാളിയാർ പോലീസ് കസ്റ്റഡിയിലെടുത്തു.
അർജുന്‍റെ പിതാവ് സോമൻ (തങ്കച്ചൻ) ടിപ്പർ ഡ്രൈവറാണ്. മാതാവ് വിലാസിനി.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.