കോട്ടയം: സിഎംഐ കോട്ടയം സെന്റ് ജോസഫ്സ് പ്രൊവിൻസ് അംഗങ്ങളായ ഫാ. അലക്സാണ്ടർ പൈകട, ഫാ. ജോസഫ് കാഞ്ഞിരമറ്റം, ഫാ.ജോസഫ് മഞ്ഞനാനിക്കൽ, ഫാ.മോഡസ്റ്റ് പുറത്തയിൽ, ഫാ.കുര്യാക്കോസ് ഏലിയാ വടക്കേത്ത് എന്നിവരുടെ പൗരോഹിത്യ സുവർണ ജൂബിലിയും ഫാ.മാത്യു കട്ടക്കയം, ഫാ. ചാണ്ടി കിഴക്കയിൽ, ഫാ.ജെയിംസ് നെടുംപറമ്പിൽ, ഫാ. ജോസ് തടവനാൽ എന്നിവരുടെ നിത്യവ്രത വാഗ്ദാന സുവർണജൂബിലിയും നാളെ മുത്തോലി സെന്റ് ജോണ്സ് ആശ്രമത്തിൽ ആഘോഷിക്കും. രാവിലെ 9.30ന് ജൂബിലി കുർബാനയ്ക്കു ശേഷം 11ന് അനുമോദന സമ്മേളനം നടക്കും.
ഫാ. അലക്സാണ്ടർ പൈകട
1939 ജൂലൈ 27ന് പൈകയിൽ ജനനം. ഇടമറുക് ഇടവക. 1968-84, 1987-90 വർഷങ്ങളിൽ ദീപികയിൽ സേവനം. തുടർന്ന് അമേരിക്ക, പാപ്പുവാന്യുഗിനിയാ എന്നിവിടങ്ങളിൽ അജപാലന ശുശ്രൂഷ. 1996ൽ വികാർ പ്രൊവിൻഷ്യൽ. 2005ൽ മുത്തോലി ആശ്രമം പ്രിയോർ. 2008 മുതൽ 2014 വരെ ദീപിക ചീഫ് എഡിറ്റർ. ഇപ്പോൾ പാലാ സെന്റ് വിൻസെന്റ് ആശ്രമം പ്രിയോർ.
ഫാ. ജോസഫ് മഞ്ഞനാനിക്കൽ
1938 ഒക്ടോബർ നാലിനു വഞ്ചിമലയിൽ ജനനം. കപ്പാട് ഇടവക. പൂന സർവകലാശാലയിൽ ഉപരിപഠനം. 1968 മുതൽ 1980 വരെ ദീപികയിൽ ജനറൽ മാനേജർ. കുര്യനാട്, ആനിക്കാട്, മുണ്ടിയെരുമ, പാലമ്പ്ര, ചക്കുപള്ളം, പരപ്പ്, മൂലമറ്റം, കുറുമ്പനാടം, കുമളി എന്നിവിടങ്ങളിൽ വിവിധ പള്ളികളിലും ആശ്രമങ്ങളിലും ശുശ്രൂഷ ചെയ്തു. 1990ൽ വികാർ പ്രൊവിൻഷ്യൽ, സുപ്പീരിയർ, വികാർ തലങ്ങളിലും പ്രവർത്തിച്ചു.
ഫാ. ജോസഫ് കാഞ്ഞിരമറ്റം
1937 ഡിസംബർ എട്ടിനു രാമപുരത്തു ജനിച്ചു. റോമിലെ ലാറ്ററൻ സർവകലാശാലയിൽ ഉപരിപഠനം.ബംഗളൂർ ധർമാരാമിൽ ദീർഘകാലം അധ്യാപകനായിരുന്നു.
ഫാ.മോഡസ്റ്റ് പുറത്തയിൽ
1938 മാർച്ച് നാലിനു ചെമ്മലമറ്റത്തു ജനനം. തുലാപ്പള്ളി ഇടവക. മാന്നാനം പ്രസ് മാനേജർ, ഗുജറാത്തിൽ മിഷൻ സുപ്പീരിയർ, മുത്തോലി ആശ്രമം പ്രിയോർ, ഭാവനഗർ സബ് റീജിയണൽ സുപ്പീരിയർ, കാഞ്ഞിരപ്പള്ളി മേരിക്വീൻസ് ഡയറക്ടർ, വെട്ടിമുകൾ സേവാഗ്രാം ഡയറക്ടർ, കുമളി ഗിരിജ്യോതി ആശ്രമം പ്രിഫെക്റ്റ്, ബ്രിട്ടനിലും സേവനം അനുഷ്ഠിച്ചു. പാലാ ആശ്രമം പ്രിയോറായിരുന്നു.
ഫാ. കുര്യാക്കോസ് വടക്കേത്ത്
1937 ഡിസംബർ 13ന് ആനകുത്തിമലയിൽ ജനിച്ചു. ചെങ്കൽ ഇടവക. സെന്റ് ജോസഫ്സ് പ്രൊവിൻസ് വൊക്കേഷണൽ ഡയറക്ടർ, ചങ്ങനാശേരി മാർത്തോമ വിദ്യാനികേതനിലെ അധ്യാപകൻ തുടങ്ങിയ നിലകളിലും ദീർഘകാലം മതാധ്യാപന, അജപാലന രംഗത്തും സേവനമനുഷ്ഠിച്ചു.
ഫാ. മാത്യു കട്ടക്കയം
1946 സെപ്റ്റംബർ അഞ്ചിനു പാലായിൽ ജനനം. മാന്നാനം കെഇ കോളജ്, മൂലമറ്റം സെന്റ് ജോസഫ്സ് കോളജ് എന്നിവിടങ്ങളിൽ അധ്യാപകൻ, അറക്കുളം സെന്റ് ജോസഫ് മൊണാസ്ട്രി പ്രിയോർ.
ഫാ. ചാണ്ടി കിഴക്കയിൽ
1947 ഡിസംബർ 25ന് ഉരുളികുന്നത്ത് ജനനം. മാന്നാനം കെഇ കോളജ്, മൂലമറ്റം സെന്റ് ജോസഫ്സ് കോളജ് എന്നിവിടങ്ങളിൽ അധ്യാപകൻ. മൂലമറ്റം സെന്റ്ജോസഫ്സ് കോളജ് പ്രിൻസിപ്പൽ, കൂത്താട്ടുകുളം മേരിഗിരി ആശ്രമം സുപ്പീരിയർ, കൂത്താട്ടുകുളം മേരിഗിരി പബ്ലിക് സ്കൂൾ പ്രിൻസിപ്പൽ, കറിക്കാട്ടൂർ, കുമളി,പൂഞ്ഞാർ ആശ്രമങ്ങളിലും സേവനം അനുഷ്ഠിച്ചു.
ഫാ. ജയിംസ് നെടുംപറമ്പിൽ
1947 ഫെബ്രുവരി 21ന് കറിക്കാട്ടൂരിൽ ജനനം. കാഞ്ഞിരപ്പള്ളി മേരിക്വീൻസ് അസിസ്റ്റന്റ് ഡയറക്ടർ, റോമിൽ ഉപരിപഠനം നേടിയ ശേഷം ഗുജറാത്ത് മിഷൻ, കപ്പാട്, മുത്തോലി ആശ്രമങ്ങളിലും പെറു മിഷനിലും സേവനം അനുഷ്ഠിച്ചു.
ഫാ. ജോസ് തടവനാൽ
1949 മേയ് 15ന് പൂഞ്ഞാറിൽ ജനനം. മാന്നാനം കെഇ കോളജ്, ബംഗളൂർ ക്രൈസ്റ്റ് കോളജ്, ബംഗളൂർ ഡിബികെ കോളജ് എന്നിവിടങ്ങളിൽ അധ്യാപകൻ. അമേരിക്കയിൽ അജപാലന ശുശ്രൂഷ.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.