പുറ്റിംഗലിലെ പോലീസിന്‍റെ വീഴ്ച: തുടരന്വേഷണം വേണമെന്ന് ആഭ്യന്തര സെക്രട്ടറി : Deepika.com Kerala News |

തിരുവനന്തപുരം: പുറ്റിംഗൽ വെടിക്കെട്ട് ദുരന്തത്തിൽ പോലീസിന്‍റെ ഭാഗത്തു നിന്നുണ്ടായ വീഴ്ചയെക്കുറിച്ച് തുടരന്വേഷണം നടത്തണമെന്നാവശ്യപ്പെട്ട് ആഭ്യന്തര സെക്രട്ടറി നളിനി നെറ്റോ സംസ്ഥാന പോലീസ് മേധാവി ലോക്നാഥ് ബെഹ്റക്കു കത്ത് നൽകി.

പുറ്റിംഗൽ വെടിക്കെട്ടപകടത്തിൽ പോലീസിന് സംഭവിച്ച വീഴ്ചകളെപ്പറ്റി അക്കമിട്ട് ചോദിച്ചിട്ടുണ്ട്. കഴിഞ്ഞ യുഡിഎഫ് സർക്കാരിന്‍റെ അവസാനകാലത്താണ് പുറ്റിംഗൽ വെടിക്കെട്ട് ദുരന്തം സംഭവിച്ചത്. ജില്ലാ ഭരണകൂടം അനുമതി നിഷേധിച്ച വെടിക്കെട്ട് പോലീസ് എന്തുകൊണ്ട് തടഞ്ഞില്ലെന്നും പോലീസ് അതിന് ഒത്താശ ചെയ്തതുകൊണ്ടാണ് ദുരന്തം ഉണ്ടായതെന്നും പോലീസീന്‍റെ ഭാഗത്തു നിന്നുണ്ടായ വീഴ്ച വിശദമായി അന്വേഷിച്ച് ഉദ്യോഗസ്ഥർക്കെതിരേ നടപടിയെടുക്കണമെന്നുമാണ് ആഭ്യന്തര സെക്രട്ടറിയുടെ കത്തിൽ പ്രതിപാദിക്കുന്നത്.

പുറ്റിംഗൽ വെടിക്കെട്ട് ദുരന്തം നടന്നപ്പോൾ സംഭവസ്ഥലം സന്ദർശിച്ച നളിനി നെറ്റൊ പോലീസിന് വീഴ്ച സംഭവിച്ചതായി ചൂണ്ടിക്കാട്ടി സർക്കാരിനു റിപ്പോർട്ട് സമർപ്പിച്ചിരുന്നു. അന്നത്തെ മുഖ്യമന്ത്രി ഉമ്മൻ ചാണ്ടി ആ റിപ്പോർട്ട് പരിശോധിക്കാൻ ഡിജിപി സെൻകുമാറിനോട് നിർദേശിച്ചിരുന്നു. എന്നാൽ, താൻ സർക്കാരിനു നൽകിയ റിപ്പോർട്ട് തന്‍റെ കീഴ് ഉദ്യോഗസ്ഥനായ സെൻകുമാർ പരിശോധിക്കുന്നതിൽ നളിനി നെറ്റൊ സർക്കാരിനോട് നീരസം പ്രകടിപ്പിച്ചു.

ഇതേത്തുടർന്നു മുഖ്യമന്ത്രി ദുരന്തത്തെക്കുറിച്ച് അന്വേഷിക്കാൻ പോലീസ് മേധാവി സെൻകുമാറിനോട് നിർദേശിച്ചിരുന്നു. എന്നാൽ, പോലീസീനു മാത്രമല്ല റവന്യു വകുപ്പിനും വീഴ്ച സംഭവിച്ചുവെന്ന് സെൻകുമാർ സർക്കാരിന് റിപ്പോർട്ട് സമർച്ചു.
ഈ റിപ്പോർട്ടിന്‍റെ അടിസ്ഥാനത്തിൽ സർക്കാർ മറ്റു നടപടികളിലേക്കു കടന്നില്ല. ഇതേച്ചൊല്ലി ടി.പി. സെൻകുമാറും ആഭ്യന്തര സെക്രട്ടറിയും തമ്മിൽ അഭിപ്രായ വ്യത്യാസം ഉണ്ടാകുകയും ചെയ്തിരുന്നു.