വിദ്യാഭ്യാസം നിഷേധിക്കാനാവില്ല: മനുഷ്യാവകാശ കമ്മീഷൻ : Deepika.com Kerala News |

Click here for detailed news of all items

വിദ്യാഭ്യാസം നിഷേധിക്കാനാവില്ല: മനുഷ്യാവകാശ കമ്മീഷൻ

Friday, January 20, 2017 4:08 PM IST

ആലുവ: വിദ്യാഭ്യാസം മൗലികാവകാശമാണെന്നും ഒരു അധ്യാപികയ്ക്കും അത് നിഷേധിക്കാനാവില്ലെന്നും സംസ്ഥാന മനുഷ്യാവകാശ കമ്മീഷൻ ആക്ടിംഗ് ചെയർമാൻ പി. മോഹൻദാസ്. ക്ലാസിൽനിന്ന് സ്ഥിരമായി പുറത്താക്കുന്നതിനെതിരേ എറണാകുളം എസ്.ആർ.വി. ബോയ്സ് ഹയർ സെക്കൻഡറി സ്കൂളിലെ ഒരു പ്ലസ്ടു വിദ്യാർഥി നൽകിയ പരാതിയിലാണ് കമ്മീഷൻ ഉത്തരവ്. മൂന്നു മാസത്തോളമായി കാരണമില്ലാതെ വിദ്യാർഥിയെ അധ്യാപിക ക്ലാസിന് പുറത്തുനിറുത്തുകയായിരുന്നു. സ്കൂളിലെ പ്ലസ്ടു ബാച്ചിൽ പെണ്‍കുട്ടികളും പഠിക്കാനെത്തിയതോടെ അവർക്കായി ശുചിമുറി വേണമെന്ന് വിദ്യാർഥി വാദിച്ചിരുന്നു. ഇതിനായി സ്കൂളിലെ മറ്റു വിദ്യാർഥികളുടെ ഒപ്പ് ശേഖരിച്ച് പ്രിൻസിപ്പലിനു നൽകുകയും ചെയ്തു.
ഇതേത്തുടർന്നു വിദ്യാർഥിയെ ക്ലാസിന് വെളിയിൽ നിറുത്തയായിരുന്നു. പിതാവിനെ വിളിച്ചു കൊണ്ടുവന്നാൽ മാത്രമേ ക്ലാസിൽ പ്രവേശിപ്പിക്കുകയുള്ളൂവെന്ന് അധ്യാപികമാർ അറിയിച്ചു.
മാസങ്ങൾ കഴിഞ്ഞിട്ടും ക്ലാസിൽ പ്രവേശിപ്പിക്കാതായതോടെയാണ് വിദ്യാർഥി മനുഷ്യാവകാശ കമ്മീഷനെ സമീപിച്ചത്. പ്ലസ് വണ്ണിൽ എല്ലാ വിഷയത്തിനും 90 ശതമാനത്തിലധികം മാർക്ക് വാങ്ങിയ സർട്ടിഫിക്കറ്റിന്‍റെ കോപ്പിയും വിദ്യാർഥി സമർപ്പിച്ചിരുന്നു. വിദ്യാർഥിയെ അടിയന്തരമായി ക്ലാസിൽ കയറ്റണമെന്നു നിർദേശിച്ച കമ്മീഷൻ വിഷയത്തിൽ രണ്ടാഴ്ചയ്ക്കകം മറുപടി നൽകണമെന്ന് സ്കൂൾ പ്രിൻസിപ്പലിനോട് ആവശ്യപ്പെട്ടു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.