വിമാനത്താവളങ്ങളിൽ അതീവ ജാഗ്രത : Deepika.com Kerala News |

തിരുവനന്തപുരം: റിപ്പബ്ലിക് ദിനാഘോഷത്തോടനുബന്ധിച്ച് രാജ്യത്തെ വിമാനത്താവളങ്ങളിൽ അതീവ സുരക്ഷാ സംവിധാനം ഒരുക്കാൻ കേന്ദ്ര ഏജൻസികൾ വിമാനത്താവള അധികൃതർക്കും സിഐഎസ്എഫിനും നിർദേശം നൽകി. അതീവ ജാഗ്രതാ നിർദേശമാണ് കേന്ദ്ര സിവിൽ ഏവിയേഷൻ സെക്യുരിറ്റി വിഭാഗവും കേന്ദ്ര ഇന്‍റലിജൻസും നൽകിയിരിക്കുന്നത്. വിവിധ ജയിലുകളിൽ കഴിയുന്ന ഭീകരരെ മോചിപ്പിക്കാൻ വിമാനം റാഞ്ചൽ ഉൾപ്പെടെയുള്ള കുറ്റകൃത്യങ്ങൾക്കു ഭീകരസംഘടനകൾ മുതിരാൻ സാധ്യതയുണ്ടെന്നാണു മുന്ന‍റിയിപ്പ്.

സംസ്ഥാനത്തെ വിമാനത്താവളങ്ങളിൽ കൂടുതൽ സിഐഎസ്എഫ് ഭടൻമാരെയും കമാൻഡോകളെയും വിന്യസിച്ചു. വിമാനത്താവളത്തിന് പുറത്ത് സായുധ കമാൻഡോ വിഭാഗത്തെ വിന്യസിച്ചു. ബോംബ് സ്ക്വാഡ്, ഡോഗ് സ്ക്വാഡ്, ഫയർഫോഴ്സ് എന്നീ വിഭാഗങ്ങൾക്കും ജാഗ്രത നിർദേശം നൽകിയിട്ടുണ്ട്. ഇന്നു മുതൽ വിമാനത്താവളങ്ങളിൽ യാത്രക്കാരെ രണ്ടു തവണ വിശദമായി പരിശോധിച്ച ശേഷമാകും വിമാനത്തിൽ കയറാൻ അനുവദിക്കുക. ലഗേജുകൾ സസൂക്ഷ്മം പരിശോധിക്കാൻ നിർദേശം നൽകിയിട്ടുണ്ട്.

വിമാനത്താവള പരിസരത്തേക്ക് കടക്കുന്ന വാഹനങ്ങളെ പ്രത്യേകം നിരീക്ഷിക്കും സംശയകരമായ വാഹനങ്ങൾ തടയും. വിമാനത്താവളങ്ങളുടെ സുരക്ഷയ്ക്ക് സിഐഎസ്എഫിന് പുറമെ കരസേന, വ്യോമസേന, സംസ്ഥാന പോലീസ് വിഭാഗങ്ങളും അതീവ ജാഗ്രത പുലർത്താൻ സിവിൽ ഏവിയേഷൻ സെക്യൂരിറ്റി വിഭാഗത്തിന്‍റെ നിർദേശമുണ്ട്.
റിപ്പബ്ലിക് ദിനാഘോഷത്തോടനുബന്ധിച്ച് രാജ്യത്ത് ഭീകര ആക്രമണങ്ങളോ വിമാന റാഞ്ചൽ ഉൾപ്പെടെയുള്ള സംഭവങ്ങളോ ഉണ്ടാകാൻ സാധ്യതയുണ്ടെന്ന കേന്ദ്ര ഇന്‍റലിജൻസിന്‍റെ റിപ്പോർട്ടിന്‍റെ അടിസ്ഥാനത്തിലാണ് വിമാനത്താവളങ്ങളിൽ സുരക്ഷാ സംവിധാനം കൂടുതൽ ശക്തമാക്കിയിരിക്കുന്നത്. വിമാനത്താവളങ്ങൾക്ക് പുറമെ ഐഎസ്ആർഒ , പ്രധാനപ്പെട്ട റെയിൽവെ സ്റ്റേഷനുകളിലും സുരക്ഷാ സംവിധാനം ശക്തമാക്കിയിട്ടുണ്ട്.