ഫേസ്ബുക്കിനു വെല്ലുവിളി ഉയർത്തി മലയാളിയുടെ പേബുക്ക് : Deepika.com Kerala News |

കൊച്ചി: സാമൂഹ‌മാധ്യമമായ ഫേസ്ബുക്കിനു വെല്ലുവിളി ഉയർത്തി മലയാളി സംരംഭകന്‍റെ പേബുക്ക് ക്ലബ് ആപ്ലിക്കേഷൻ വരുന്നു. അംഗങ്ങൾക്ക് കാഷ് റിവാർഡ് ഉൾപ്പെടെയുള്ള ആനുകൂല്യങ്ങളുമായാണ് പേബുക്ക് ക്ലബ് മലയാളിയായ ശ്രീധരൻ പിള്ള അവതരിപ്പിച്ചിരിക്കുന്നത്. പേബുക്കിൽ അംഗങ്ങളാകുന്ന ഓരോരുത്തരുടെയും പോസ്റ്റുകൾക്കു ലഭിക്കുന്ന ലൈക്ക്, കമന്‍റ്, ഷെയർ എന്നിവയ്ക്ക് പണം നൽകുമെന്നു പേബുക്ക് ക്ലബ് സിഇഒ ശ്രീധരൻപിള്ള പത്രസമ്മേളനത്തിൽ അറിയിച്ചു.

ഫേസ്ബുക്ക് പോലെയുള്ള മാധ്യമങ്ങളിൽ വെറുതെ സമയം ചെലവഴിക്കുന്നവർക്ക് ഒരു വരുമാനമാർഗമാണ് പേബുക്ക് ക്ലബ് നൽകുന്നതെന്നും ഇവരുടെ ബാങ്ക് അക്കൗണ്ടുകളിലേക്ക് പണം എത്തുമെന്നും അദ്ദേഹം പറഞ്ഞു. തുടക്കത്തിൽ സൗജന്യ രജിസ്ട്രേഷനിലൂടെ പരമാവധി മലയാളികളെ അംഗങ്ങളാക്കാൻ സൈൻ അപ്പ് പ്രചാരണം പേബുക്ക് ക്ലബ് ആരംഭിച്ചിട്ടുണ്ട്. ആദ്യ അംഗങ്ങൾക്ക് ലോയൽറ്റി ബോണസും കമ്പനിയിൽ ഷെയറും മറ്റ് ആനുകൂല്യങ്ങളും ലഭിക്കും. ഗൂഗിൾ പ്ലേ സ്റ്റോറിൽ നിന്നോ ആപ്പ് സ്റ്റോറിൽ നിന്നോ പേബുക്ക് ക്ലബ് കാഷ് ഫോർ കണ്ടെന്‍റ് ആപ്പ് എന്ന ആപ്ലിക്കേഷൻ സൗജന്യമായി ഡൗണ്‍ലോഡ് ചെയ്യാവുന്നതാണ്. വെസ്റ്റ് മിഡ്‌ലാൻഡ്സ് ആസ്ഥാനമായുള്ള കാപ്പെക്സെയിൽസ് ലിമിറ്റഡ് എന്ന കന്പനിയാണ് പേബുക്ക് ക്ലബ് ആപ്ലിക്കേഷൻ രൂപകല്പന ചെയ്തിരിക്കുന്നത്.

ഫേസ്ബുക്കിനെ അപേക്ഷിച്ച് പൂർണ സുരക്ഷിതത്വവും സ്വകാര്യതയുമാണ് പേബുക്ക് ക്ലബ് വാഗ്ദാനം ചെയ്യുന്നതെന്ന് പേബുക്ക് സാങ്കേതിക പങ്കാളി ഇന്നൊവലന്‍റ് ടെക്നോളജീസ് സിഇഒ അമിത് വർമ പറഞ്ഞു. എറണാകുളം പ്രസ് ക്ലബിൽ നടന്ന ചടങ്ങിൽ ശ്രീധരൻപിള്ളയും അമിത് വർമയും ചേർന്ന് പേബുക്ക് ക്ലബ് പുറത്തിറക്കി. കൂടുതൽ വിവരങ്ങൾക്കും അംഗത്വത്തിനും www.paybook.club എന്ന വെബ്സൈറ്റ് സന്ദർശിക്കുക. ആൻഡ്രോയിഡ് പ്ലേ സ്റ്റോറിലും ഐഒഎസിലും ആപ്ലീക്കേഷൻ ലഭ്യമാണ്.