എംഎസ്‌ടി സുവർണ ജൂബിലി ആഘോഷങ്ങൾക്ക് ഇന്ന് മൈലാപ്പൂരിൽ തുടക്കമാകും : Deepika.com Kerala News |

Click here for detailed news of all items

എംഎസ്‌ടി സുവർണ ജൂബിലി ആഘോഷങ്ങൾക്ക് ഇന്ന് മൈലാപ്പൂരിൽ തുടക്കമാകും

Sunday, February 19, 2017 1:56 PM IST

കൊച്ചി: സീറോമലബാർ സഭയുടെ പ്രേഷിതമുന്നണിയായ സെന്‍റ് തോമസ് മിഷനറി സൊസൈറ്റി (എംഎസ്ടി) സുവർണ ജൂബിലി ആഘോഷങ്ങൾക്ക് ഇന്നു തുടക്കമാകും. അതിന്‍റെ ഭാഗമായി മൈലാപ്പൂരിലെ സെന്‍റ് തോമസ് ബസിലിക്കയിൽ ഇന്ന് 50 എംഎസ്ടി വൈദികർ ഒരുമിച്ച് സമൂഹബലി അർപ്പിക്കും.

കഴിഞ്ഞ 50 വർഷത്തെ ചരിത്രത്തിൽ ഓരോ വർഷവും പട്ടം സ്വീകരിച്ച ബാച്ചുകളിൽനിന്ന് ഓരോ വൈദികർ വീതമാണ് ഈ സമൂഹബലിയിൽ പങ്കുചേരുന്നത്.
വിശുദ്ധ തോമാശ്ലീഹായുടെ നാമത്തിൽ സ്ഥാപിതമായ പ്രേഷിത മുന്നണിയായതിനാൽ ആ വിശുദ്ധനായ ക്രിസ്തുശിഷ്യന്‍റെ കബറിടത്തിൽ ദിവ്യബലിയർപ്പിച്ചാണു സുവർണജൂബിലിയാഘോഷങ്ങളിലേക്കു പ്രവേശിക്കുന്നത്.

എംഎസ്ടി സഭാംഗവും മധ്യപ്രദേശിലെ ഉജ്ജൈൻ രൂപതാധ്യക്ഷനുമായ മാർ സെബാസ്റ്റ്യൻ വടക്കേൽ സമൂഹബലിക്കു മുഖ്യകാർമികത്വം വഹിക്കും. മൈലാപ്പൂർ ആർച്ച്ബിഷപ് ഡോ.അന്തോണിസാമി വി. തോമാശ്ലീഹായുടെ കബറിടത്തിൽ വച്ച് തെളിച്ചു നൽകുന്ന ദീപം എംഎസ്ടി ജനറാളായ ഫാ.കുര്യൻ അമ്മനത്തുകുന്നേൽ ഏറ്റുവാങ്ങും. അണയാതെ കേരളത്തിൽ എത്തിക്കുന്ന ഈ ദീപം ഭരണങ്ങാനത്തിനടുത്ത് മേലന്പാറയിലുള്ള ദീപ്തിഭവനിൽ സ്വീകരിച്ചു സീറോ മലബാർ സഭ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരി ജൂബിലിദീപം തെളിക്കും.

ഒരു വർഷം നീണ്ടുനിൽക്കുന്ന ജൂബിലിയാഘോഷങ്ങളുടെ ക്രമീകരണത്തിനായി നിരവധി കമ്മിറ്റികൾ രൂപീകരിച്ചു പ്രവർത്തനം നടന്നുകൊണ്ടിരിക്കുകയാണെന്നു ജൂബിലിയാഘോഷങ്ങളുടെ കോ-ഓർഡിനേറ്ററായ ഫാ. ജോസ് അയ്യങ്കനാൽ അറിയിച്ചു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.