ബിസിനസ് ദീപിക എക്സലൻസ് പുരസ്കാര വിതരണം ഇന്ന് : Deepika.com Kerala News |

കൊച്ചി: മലയാളത്തിലെ ഏറ്റവും പ്രചാരമുള്ള ബിസിനസ് വാരികയായ ബിസിനസ് ദീപികയുടെ 2017ലെ പുരസ്കാര ദാന ചടങ്ങ് ഇന്നു നടക്കും. വൈകുന്നേരം അഞ്ചിന് കൊച്ചി ലുലു മാരിയട്ട് ഹോട്ടലിൽ നടക്കുന്ന ചടങ്ങിൽ ബിസിനസ് മേഖലയിൽ ശ്രദ്ധേയ സംഭാവനകൾ നൽകിയ അഞ്ചു പ്രമുഖരെ ബിസിനസ് ദീപിക എക്സലൻസ് അവാർഡുകൾ നൽകി ആദരിക്കും.

ശോഭാ ഗ്രൂപ്പ് സ്ഥാപകനും ചെയർമാനുമായ പി.എൻ.സി. മേനോന് ബിസിനസ് ദീപിക ലൈഫ്ടൈം ബിസിനസ് അച്ചീവ്മെന്‍റ് പുരസ്കാരവും ഗ്രാൻഡ്മാസ് ഫുഡ് പ്രൊഡക്ട്സ് മാനേജിംഗ് ഡയറക്ടർ ജിമി രാജുവിന് ഔട്ട്സ്റ്റാൻഡിംഗ് വിമൻ ഓൺട്രപ്രണർ പുരസ്കാരവും പ്രിസ് ട്രേഡിംഗ് കമ്പനി മാനേജിംഗ് ഡയറക്ടർ സുനിൽ ഏബ്രഹാമിനു ബിസിനസ് എക്സലൻസ് പുരസ്കാരവും യുഡിഎസ് ഗ്രൂപ്പ് ചെയർമാനും മാനേജിംഗ് ഡയറക്ടറുമായ രാജശേഖരൻ നായർക്ക് എക്സലൻസ് ഇൻ ഹോസ്പിറ്റാലിറ്റി സർവീസസ് പുരസ്കാരവും പ്രമുഖ വിമാന കമ്പനിയായ സിൽക്ക് എയറിന്‍റെ ഇന്ത്യ ജനറൽ മാനേജർ ജഗ്ദീഷ് റാം ഭോജ്‌വാനിക്ക് എയർലൈൻസ് സർവീസ് ഓഫ് ദി ഇയർ പുരസ്കാരവും സമ്മാനിക്കും.
സാമൂഹ്യ സാംസ്ക്കാരിക രാഷ്‌ട്രീയ മേഖലകളിലെ പ്രമുഖരുടെ സാന്നിധ്യത്തിൽ നടക്കുന്ന പുരസ്കാര സമർപ്പണ സമ്മേളനം വിദ്യാഭ്യാസ മന്ത്രി സി. രവീന്ദ്രനാഥ് ഉദ്ഘാടനം ചെയ്യും. എംപിമാരായ പ്രഫ. കെ.വി. തോമസും ഇന്നസെന്‍റും മുഖ്യാതിഥികളായിരിക്കും. രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടർ റവ. ഡോ. മാണി പുതിയിടം അധ്യക്ഷത വഹിക്കും. ദീപിക ചീഫ് എഡിറ്റർ ഫാ. ബോബി അലക്സ് മണ്ണംപ്ലാക്കൽ ആമുഖ പ്രസംഗം നടത്തും.

ഹൈബി ഈഡൻ എംഎൽഎ, ചലച്ചിത്രതാരം മിയ, രാഷ്‌ട്രദീപിക ഡയറക്ടർ പി.പി. സണ്ണി, കെത്രിഎ കൊച്ചി സോണ്‍ സെക്രട്ടറി സന്ദീപ് നായർ എന്നിവർ പ്രസംഗിക്കും.
രാഷ്‌ട്രദീപിക മാർക്കറ്റിംഗ് വിഭാഗം ജനറൽ മാനേജർ കെ.സി. തോമസ് സ്വാഗതവും ദീപിക കൊച്ചി സീനിയർ മാർക്കറ്റിംഗ് മാനേജർ റെബി ജോർജ് നന്ദിയും പറയും. തുടർന്നു കലാവിരുന്നും ഉണ്ടാകും.

കൊച്ചിയിലെ സാൽ കൊമേഴ്സ്യൽ പ്രൈവറ്റ് ലിമിറ്റഡാണ് പരിപാടിയുടെ മുഖ്യസ്പോണ്‍സർ. എഡക്സ് സ്റ്റഡി എബ്രോഡ് കൊച്ചി, എൽസണ്‍സ് ബോംബെ ഡൈയിംഗ് കൊച്ചി, ആഷർ സിസ്റ്റംസ് കൊച്ചി എന്നിവയാണു സഹസ്പോണ്‍സർമാർ.