സഹോദരിയുടെ സംസ്‌കാരത്തില്‍ പങ്കെടുത്തു മടങ്ങുന്പോൾ കാറും ബസും കൂട്ടിയിടിച്ചു സഹോദരനും ബന്ധുവും മരിച്ചു : Deepika.com Kerala News |

Click here for detailed news of all items

സഹോദരിയുടെ സംസ്‌കാരത്തില്‍ പങ്കെടുത്തു മടങ്ങുന്പോൾ കാറും ബസും കൂട്ടിയിടിച്ചു സഹോദരനും ബന്ധുവും മരിച്ചു

Sunday, February 26, 2017 12:45 PM IST

ചാരുംമൂട്(ആലപ്പുഴ): സഹോദരിയുടെ സംസ്‌കാരത്തില്‍ പങ്കെടുത്തു മടങ്ങിയ സഹോദരനും ബന്ധുവും വാഹനാപകടത്തില്‍ മരിച്ചു. കാറും കെഎസ്ആര്‍ടിസി ബസും കൂട്ടിയിടിച്ചാണ് അപകടം. അപകടത്തില്‍ മൂന്നുപേര്‍ക്കു ഗുരുതരപരിക്കേറ്റു. മാവേലിക്കര തഴക്കര വാഴുവാടി ജയ നിവാസില്‍ റിട്ട. ഡെപ്യുട്ടി തഹസീല്‍ദാര്‍ ശങ്കരനാരായണന്‍(69), അയല്‍വാസിയും ബന്ധുവുമായ തഴക്കര വഴുവാടി കുറ്റിയില്‍ എന്‍.കെ. പ്രസാദ്(50) എന്നിവരാണു മരിച്ചത്.

കാറില്‍ സഞ്ചരിച്ച ശങ്കരനാരായണന്‍റെ ഭാര്യ റിട്ട. ഇറിഗേഷന്‍ ഉദ്യോഗസ്ഥ ഓമന (60 ), ഇവരുടെ മരുമകന്‍ അധ്യാപകനായ മാന്നാര്‍ സ്വദേശി സുനില്‍കുമാര്‍ (40), മാവേലിക്കര ബ്ലോക്കു പഞ്ചായത്ത് പ്രസിഡന്‍റ് കെ. രഘുപ്രസാദിന്‍റെ ഭാര്യയും മാവേലിക്കര കല്ലുമല കാര്‍ഷികസഹകരണ ബാങ്കിലെ ഉദ്യോഗസ്ഥയുമായ തഴക്കര വാഴുവാടി ഏവൂരേത്ത് സുധാദേവി(40) എന്നിവര്‍ക്കാണ് ഗുരുതര പരിക്കേറ്റത്. ഇവരെ ആലപ്പുഴ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

ഇന്നലെ ഉച്ചകഴിഞ്ഞു 3.30ഓടെ കായംകുളം -പുനലൂര്‍ കെപി റോഡില്‍ നൂറനാട് ഐടിബിപി ജംഗ്ഷനിലായിരുന്നു അപകടം. പുനലൂര്‍ ഭാഗത്തേക്കു പോകുകയായിരുന്ന കെഎസ് ആര്‍ടിസി വേണാട് ബസുമായി ഇവര്‍ സഞ്ചരിച്ച ടാറ്റ ഇന്‍ഡിഗോ കാര്‍ കൂട്ടിയിടിക്കുകയായിരുന്നു. ഇടിയുടെ ആഘാതത്തില്‍ കാര്‍ പൂര്‍ണമായി തകര്‍ന്നു.
കാര്‍ വെട്ടിപ്പൊളിച്ചാണു പരിക്കേറ്റവരെ പുറത്തെടുത്തത്. ഇവരെ ഉടന്‍തന്നെ കായംകുളം താലൂക്കാശുപത്രിയില്‍ എത്തിച്ചെങ്കിലും ശങ്കരനാരായണന്‍റെയും പ്രസാദിന്‍റെയും ജീവന്‍ രക്ഷിക്കാനായില്ല. ശങ്കരനാരായണന്‍റെ സഹോദരിയുടെ സംസ്‌കാര ചടങ്ങില്‍ പങ്കെടുക്കാന്‍ പത്തനാപുരം കുന്നിക്കോടുപോയി മടങ്ങി വരികയായിരുന്നു കാറില്‍ സഞ്ചരിച്ചവര്‍.
രാവിലെ കുന്നിക്കോടിനു ബസില്‍ പോയ പ്രസാദ് തിരികെ വീട്ടിലേക്കു വരാന്‍ ബന്ധുക്കള്‍ക്കൊപ്പം കാറില്‍ കയറുകയായിരുന്നു. മൃതദേഹങ്ങള്‍ കായംകുളം സര്‍ക്കാര്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.

മാവേലിക്കര ചെറുകോല്‍ മോഡല്‍ യുപി സ്‌കൂളിലെ ജീവനക്കാരനാണു പ്രസാദ്.
ഭാര്യ: ഷീബ (അധ്യാപിക, എണ്ണയ്ക്കാട് യുപി സ്‌കൂള്‍) മക്കള്‍: അമല്‍, കണ്ണന്‍. ശങ്കരനാരായണന്‍റെ മക്കള്‍: ജയപ്രകാശ് (ബിഎസ്എന്‍എല്‍ ) ജയപ്രഭ (അധ്യാപിക) ജയലക്ഷ്മി (അധ്യാപിക). മരുമക്കള്‍: പരിക്കേറ്റ സുനില്‍കുമാര്‍, ശ്യാംപ്രസാദ്, ലക്ഷ്മി.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.