റോയൽ എൻഫീൽഡും അമൽജ്യോതിയും കൈകോർത്തു; വർക്‌ഷോപ്പ് തുറക്കും : Deepika.com Kerala News |

കാഞ്ഞിരപ്പള്ളി: ഇന്ത്യയിലെ ഇരുചക്രവാഹന നിർമാണരംഗത്തെ അതികായരായ റോയൽ എൻഫീൽഡും അമൽ ജ്യോതി എൻജിനിയറിംഗ് കോളജിലെ ഓട്ടോമൊബൈൽ എൻജിനിയറിംഗ് ഡിപ്പാർട്മെന്‍റും തമ്മിൽ കൈകോർക്കും. റോയൽ എൻഫീൽഡ് ട്രെയിനിംഗ് സെന്‍റർ തുടങ്ങാൻ ധാരണാപത്രം ഒപ്പുവച്ചു.

കേരളത്തിൽ ആദ്യമായിട്ടാണ് ഒരു എൻജിനിയറിംഗ് കോളജിൽ റോയൽ എൻഫീൽഡിന്‍റെ ആധുനിക സൗകര്യങ്ങളോടെയുള്ള വർക്‌ഷോപ്പ് സ്ഥാപിക്കുന്നത്. വിദ്യാർഥികൾക്ക് ആധുനിക പരിശീലനം ലഭ്യമാക്കുന്നതിന്‍റെ ഭാഗമായിട്ടാണ് വർക്‌ഷോപ്പ്.

ഇരുചക്രവാഹന നിർമാണ മേഖലയിലെ ആധുനിക സാങ്കേതിക വിദ്യകൾ വിദ്യാർഥികളിലേക്കു പകർന്നു നൽകുന്നതിനുവേണ്ടി ഓട്ടോമൊബൈൽ ഡിപ്പാർട്മെന്‍റിന്‍റെ "നോളഡ്ജ് പാർട്ണർ’ ആയി റോയൽ എൻഫീൽഡ് സഹകരിക്കും. വാഹനനിർമാണ മേഖലയിലെ പ്രമുഖരുമായി സഹകരിച്ച് ഓട്ടോമൊബൈൽ ഡിപ്പാർട്മെന്‍റ് നടത്തിവരുന്ന വോൾവോ ഐഷർ കൊമേഴ്സ്യൽ വെഹിക്കിൾസ് ലിമിറ്റഡ് കോളജിൽ സ്ഥാപിച്ചിട്ടുള്ള ആധുനിക ലബോറട്ടറിയുടെ തുടർച്ചയായിട്ടാണ് ഈ ലബോറട്ടറിയും പ്രവർത്തിക്കുക.
ഓട്ടോമൊബൈൽ പരിശീലന മേഖലയിലെ ശ്രദ്ധേയ കേന്ദ്രമാക്കാൻ കൂടുതൽ വാഹന നിർമാതാക്കളുമായി സഹകരിക്കാനുള്ള പദ്ധതിയുമുണ്ട്. അമൽജ്യോതിയെ ഒാട്ടോമൊബൈൽ പരിശീലന ഹബ് ആക്കി മാറ്റുകയാണു ലക്ഷ്യം.

അമൽജ്യോതി മാനേജർ റവ.ഡോ. മാത്യു പായിക്കാട്ട്, റോയൽ എൻഫീൽഡ് സെയിൽസ് ആൻഡ് മാർക്കറ്റിംഗ് വൈസ്പ്രസിഡന്‍റ് ഷാജികോശി എന്നിവർ രണ്ടു സ്ഥാപനങ്ങളെയും പ്രതിനിധീകരിച്ചു ധാരണാപത്രത്തിൽ ഒപ്പുവച്ചു.

രാമകൃഷ്ണൻ എസ്. (ഹെഡ് ആഫ്റ്റർ മാർക്കറ്റ്, റോയൽ എൻഫീൽഡ്), ഇ. പശുപതി (ഗ്രൂപ്പ് മാനേജർ, ടെക് സപ്പോർട് ആൻഡ് ട്രെയിനിംഗ്), ശ്രീറാം ഒ. (അസി. പ്രഫസർ, ഡിപ്പാർട്മെന്‍റ് ഓഫ് ഓട്ടോമൊബൈൽ എൻജിനിയറിംഗ്, അമൽജ്യോതി കോളജ്) എന്നിവർ സന്നിഹിതരായിരുന്നു.