ദീപിക എക്സലൻസ് അവാർഡ് സമർപ്പണം നാളെ : Deepika.com Kerala News |

കോട്ടയം: വിദ്യാഭ്യാസ, ആതുര, വിദേശ തൊഴിൽ രംഗത്തെ സമഗ്രസംഭാവനകൾക്ക് ദീപിക ഏർപ്പെടുത്തിയ ദീപിക എക്സലൻസ് അവാർഡ്ദാനവും പ്രവാസി രത്ന അവാർഡ് സമർപ്പണവും നാളെ വൈകുന്നേരം 6.30ന് കുമരകം ബായ്ക്ക് വാട്ടർ റിപ്പിൾസ് റിസോർട്ടിൽ നടക്കും.

രാഷ്ട്രദീപിക ലിമിറ്റഡ് മാനേജിംഗ് ഡയറക്‌ടർ റവ.ഡോ.മാണി പുതിയിടത്തിന്‍റെ അധ്യക്ഷതയിൽ കൂടുന്ന സമ്മേളനം മുൻമുഖ്യമന്ത്രി ഉമ്മൻചാണ്ടി ഉദ്ഘാടനം ചെയ്ത് അവാർഡുകൾ സമ്മാനിക്കും. തിരുവഞ്ചൂർ രാധാകൃഷ്ണൻ എംഎൽഎ മുഖ്യപ്രഭാഷണം നടത്തും. എംഎൽഎമാരായ കെ.സുരേഷ്കുറുപ്പ് മോൻസ് ജോസഫ് എന്നിവർ മുഖ്യാതിഥികളായിരിക്കും. മാർക്കറ്റിംഗ് ജനറൽ മാനേജർ കെ.സി. തോമസ് അവാർഡ് ജേതാക്കളെ പരിചയപ്പെടുത്തും. ചലച്ചിത്ര, സീരിയൽ താരം പ്രേം പ്രകാശ്, രാഷ്‌ട്രദീപഎക്സിക്യൂട്ടീവ് ഓഫീസർ ഫാ. റെജി വർഗീസ് മനയ്ക്കലേട്ട്, ദീപിക ഫ്രണ്ട്സ് ക്ലബ് വൈസ് പ്രസിഡന്‍റ് ബാബു വള്ളപ്പുര എന്നിവർ പ്രസംഗിക്കും. ഡെപ്യൂട്ടി മാനേജിംഗ് ഡയറക്‌ടർ ഡോ. താർസീസ് ജോസഫ് സ്വാഗതവും പിആർഒ മാത്യു കൊല്ലമലക്കരോട്ട് കൃതജ്ഞതയും രേഖപ്പെടുത്തും. തുടർന്ന് സംഗീതവിരുന്ന്.

കോളജ് വിദ്യാഭ്യാസ രംഗത്തെ സംഭാവനകൾക്കുള്ള എഡ്യൂക്കേഷണൽ എക്സലൻസ് അവാർഡ് പാലാ രാമപുരം മാർ അഗസ്തീനോസ് കോളജ് മാനേജർ റവ.ഡോ. ജോർജ് ഞാറക്കുന്നേലിനും ആതുരസേവന രംഗത്തെ സംഭാവനകൾക്കു മെഡിക്കൽ എക്സലൻസ് അവാർഡ് ചങ്ങനാശേരി ചെത്തിപ്പുഴ സെന്‍റ് തോമസ് ഹോസ്പിറ്റൽ ഡയറക്‌ടർ ഫാ. തോമസ് മംഗലത്തിനും സമ്മാനിക്കും.

വിദേശത്ത് ഒട്ടേറെ മലയാളികൾക്ക് ജോലി ലഭ്യമാക്കാൻ റിക്രൂട്ടിംഗ് രംഗത്തെ സമഗ്രസംഭാവനയ്ക്കുള്ള പുരസ്കാരം അയർലൻഡ് ഒലിവർ പ്ലേസ്മെന്‍റ് മാനേജിംഗ് ഡയറക്‌ടർ റെജി പ്രോത്താസീസിനും പ്രവാസി രത്ന അവാർഡ് വിദ്യാഭ്യാസ ജീവകാരുണ്യ രംഗത്ത് പ്രവാസികളുടെ ക്ഷേമത്തിനായി നിരവധി പദ്ധതികൾ നടപ്പാക്കിയ പ്രവാസിമലയാളി ഫെഡറേഷൻ ചെയർമാനും വാഗമണ്‍ ഇന്തോ- അമേരിക്കൻ ഇന്‍റർ നാഷണൽ സ്കൂൾ ചെയർമാനുമായ ഡോ. ജോസ് ആന്‍റണി കാനാട്ടിനും സമ്മാനിക്കും.