സീറോ മലബാർ സഭ കമ്മീഷൻ സെക്രട്ടറിമാരെ നിയമിച്ചു : Deepika.com Kerala News |

കൊച്ചി: സീറോ മലബാർ മേജർ ആർക്കി എപ്പിസ്കോപ്പൽ സഭയുടെ കുടുംബങ്ങൾക്കും അല്മായർക്കും ജീവനും വേണ്ടിയുള്ള കമ്മീഷന്‍റെ ജനറൽ സെക്രട്ടറിയായി റവ.ഡോ. ആന്‍റണി (ജോബി) മൂലയിലിനെ നിയമിച്ചു. ഈ കമ്മീഷനുകീഴിലുള്ള വിവിധ സംഘടനകളുടെയും പ്രസ്ഥാനങ്ങളുടെയും സെക്രട്ടറിമാരെ ഏകോപിപ്പിച്ച് പ്രവർത്തനം നടത്തുന്നതിനുവേണ്ടിയാണ് നിയമനം.

ചങ്ങനാശേരി അതിരൂപതയിലെ തുരുത്തിയിലുള്ള കാനാ സെന്‍റ് ജോണ്‍ പോൾ രണ്ടാമൻ പൊന്തിഫിക്കൽ ഇൻസ്റ്റിറ്റ്യൂട്ടിന്‍റെ രജിസ്ട്രാറും പ്രഫസറുമാണ് റവ.ഡോ. ആന്‍റണി മൂലയിൽ. റോമിൽ നിന്നു കുടുംബദൈവശാസ്ത്രത്തിൽ ഡോക്ടറേറ്റു നേടിയ ഇദ്ദേഹം അതിരൂപത പ്രസ്ബിറ്ററൽ കൗണ്‍സിൽ സെക്രട്ടറിയാണ്.

കമ്മീഷനു കീഴിൽ പുതിയതായി രൂപം കൊണ്ട പ്രോലൈഫ് അപ്പോസ്തലേറ്റിന്‍റെ സെക്രട്ടറിയായി സാബു ജോസിനെയും നിയമിച്ചിട്ടുണ്ട്. എറണാകുളം -അങ്കമാലി അതിരൂപതയിലെ പാലാരിവട്ടം ഇടവകാംഗമായ സാബു ജോസ് കെസിബിസി പ്രോലൈഫ് സമിതി ജനറൽ സെക്രട്ടറി, സഭയുടെ പബ്ലിക് അഫയേഴ്സ് സമിതി അംഗം, അതിരൂപത പാസ്റ്ററൽ കൗണ്‍സിലിലെ പബ്ലിക് അഫയേഴ്സ് കമ്മീഷൻ കണ്‍വീനർ, ജീവകാരുണ്യപ്രസ്ഥാനങ്ങളായ ലൗ ആൻഡ് കെയറിന്‍റെ ഡയറക്ടർ, കനിവിന്‍റെ പിആർഒ ന്യൂമാൻസ് അസോസിയേഷൻ ഓഫ് ഇന്ത്യ കേരള ചാപ്റ്ററിന്‍റെ വൈസ് പ്രസിഡന്‍റ്, ഗുഡ്ന്യൂസ് കമ്യൂണിക്കേഷൻസ് ഡയറക്ടർ, റാണി മരിയ ഫൗണ്ടേഷൻ ജനറൽ സെക്രട്ടറി, മദ്യവിരുദ്ധ സമിതി ഇടപ്പള്ളി ഫൊറോന പ്രസിഡന്‍റ് എന്നീ നിലകളിൽ പ്രവർത്തിക്കുന്നു.

കമ്മീഷനിലെ മറ്റു സെക്രട്ടറിമാർ : ജോസ് വിതയത്തിൽ (അല്മായ ഫോറങ്ങൾ), ബിജു പറയന്നിലം (കത്തോലിക്കാ കോണ്‍ഗ്രസ്), ജിജി ജേക്കബ് പുളിയംകുന്നേൽ (മാതൃവേദി), ഫാ. ജോസഫ് കൊല്ലക്കൊന്പിൽ (ഫാമിലി അപ്പോസ്തലേറ്റ്) ഫാ. ലോറൻസ് തൈക്കാട്ടിൽ (കുടുംബകൂട്ടായ്മ).

കുടുംബങ്ങൾക്കും അല്മായർക്കും ജീവനും വേണ്ടിയുള്ള കമ്മീഷന്‍റെ ചെയർമാൻ ബിഷപ് മാർ മാത്യു അറയ്ക്കലാണ്. ബിഷപ് മാർ റെമിജിയോസ് ഇഞ്ചനാനിയിലും ബിഷപ് മാർ ജോസ് പുളിക്കലുമാണ് കമ്മീഷനിലെ അംഗങ്ങൾ.