ലാത്തിയെറിഞ്ഞു വീഴ്ത്തിയ സംഭവം: പോലീസുകാരനു സസ്പെൻഷൻ : Deepika.com Kerala News |

കായംകുളം: വള്ളികുന്നം ചൂനാട് ജംഗ്ഷനു സമീപം വാഹനപരിശോധനയ്ക്കിടെ ബൈക്ക് യാത്രികനെ ലാത്തിക്ക് എറിഞ്ഞു വീഴ്ത്തിയെന്ന പരാതിയെത്തുടർന്നു സംഭവത്തിൽ പോലീസുകാരനെ സസ്പെൻഡ് ചെയ്തു. വള്ളികുന്നം പോലിസ് സ്റ്റേഷനിലെ സിവിൽ പൊലീസ് ഓഫീസർ വി. കണ്ണനെയാണ് ആലപ്പുഴ ജില്ലാ പോലീസ് മേധാവി മുഹമ്മദ് റഫീഖ് അന്വേഷണ വിധേയമായി സസ്പെൻഡ് ചെയ്തത്. ഇലിപ്പക്കുളം നാന്പുകുളങ്ങര കൊപ്പാറപടീറ്റതിൽ നിസാം (22)നാണ് ലാത്തിയേറിൽ കഴിഞ്ഞ ദിവസം ഗുരുതരമായി പരിക്കേറ്റത്. ഒന്നര മണിക്കൂറോളം അബോധാവസ്ഥയിലായിരുന്ന നിസാം ആലപ്പുഴ മെഡിക്കൽ കോളജ് ആശുപത്രിയിലെ തീവ്രപരിചരണ വിഭാഗത്തിൽ ചികിത്സയിലാണ്. ശനിയാഴ്ച രാത്രി എട്ടോടെ ചൂനാട് ജംഗ്ഷനു പടിഞ്ഞാറ് ഭാഗത്തുള്ള പെട്രോൾ പന്പിനു സമീപമായിരുന്നു സംഭവം.

മത്സ്യവ്യാപാരിയായ നിസാം ഓച്ചിറയിൽനിന്നു ബൈക്കിൽ വീട്ടിലേക്കു വരുന്നതിനിടെ വാഹനപരിശോധന നടത്തുകയായിരുന്ന പോലീസിനെകണ്ടു തിരിച്ചുപോകാൻ ശ്രമിക്കുന്നതിനിടെ പോലീസ് ലാത്തികൊണ്ട് എറിഞ്ഞുവീഴ്ത്തുകയായിരുന്നെന്നാണു പരാതി. തലയുടെ പിന്നിൽ ലാത്തികൊണ്ട നിസാം റോഡിലേക്കു തെറിച്ചുവീണതിനെത്തുടർന്ന് അബോധാവസ്ഥയിലാകുകയായിരുന്നു. ഉടൻതന്നെ നിസാമിനെ പോലീസും നാട്ടുകാരും ചേർന്നു കായംകുളം താലൂക്ക് ആശുപത്രിയിൽ എത്തിച്ചെങ്കിലും പരിക്ക് ഗുരുതരമായതിനെത്തുടർന്ന് ആലപ്പുഴ മെഡിക്കൽ കോളജ് ആശുപത്രിയിലേക്കു മാറ്റി.

ഒന്നര മണിക്കൂറിനു ശേഷമാണു ബോധം തിരിച്ചുകിട്ടിയത്. സംഭവത്തെക്കുറിച്ച് അന്വേഷിച്ച് റിപ്പോർട്ട് നൽകാൻ ചെങ്ങന്നൂർ ഡിവൈഎസ്പി കെ.ആർ. ശിവസുതൻ പിള്ളയെ ജില്ലാ പോലീസ് മേധാവി ചുമതലപ്പെടുത്തിയിട്ടുണ്ട്. സംഭവമുണ്ടായി മണിക്കൂറുകൾക്കുള്ളിൽ പ്രതിഷേധവുമായി എത്തിയ ഡിവൈഎഫ്ഐ പ്രവർത്തകർ വള്ളികുന്നം പോലീസ് സ്റ്റേഷൻ ഉപരോധിച്ചിരുന്നു. പോലീസുകാരനെ സർവീസിൽനിന്നു പുറത്താക്കാൻ സർക്കാർ തയാറാവണമെന്നു യൂത്ത് കോണ്‍ഗ്രസ് മണ്ഡലം കമ്മിറ്റി ആവശ്യപ്പെട്ടു.