1104 മെഗാവാട്ട് സൗരോർജം വൈദ്യുതി ഉത്പാദിപ്പിക്കും : Deepika.com Kerala News |

വൈ.എസ്. ജയകുമാർ

തിരുവനന്തപുരം: സംസ്ഥാനത്ത് 1104 മെഗാവാട്ട് സൗരോർജം വൈദ്യുതി ഉത്പാദിപ്പിക്കാൻ വൈദ്യുതി ബോർഡ് പദ്ധതി നടപ്പാക്കുന്നു. കേന്ദ്ര, സംസ്ഥാന സർക്കാരുകളുടെ സബ്സിഡിയോടെ വീടുകൾ, സ്വകാര്യ സ്ഥാപനങ്ങൾ, സർക്കാർ ഓഫീസുകൾ എന്നിവിടങ്ങളിൽ സൗരോർജ പാനലുകൾ സ്ഥാപിച്ച് 2020 ഓടെ 1104 മെഗാവാട്ട് വൈദ്യുതിയുടെ സ്ഥാപിതശേഷിയാണു ലക്ഷ്യമിടുന്നത്.

ഇതിനു പുറമേ കടൽത്തീരങ്ങളിലും മലമ്പ്രദേശങ്ങളിലും കാറ്റാടി യന്ത്രങ്ങൾ സ്ഥാപിച്ച് കാറ്റിൽ നിന്നു വൈദ്യുതി ഉത്പാദനം വർധിപ്പിക്കും. പതിനായിരം വീടുകളുടെ മുകളിൽ സോളാർ പാനൽ സ്ഥാപിക്കാനുള്ള പദ്ധതിക്ക് അനർട്ട് 2013-14 സാമ്പത്തിക വർഷമാണ് തുടക്കം കുറിച്ചത്. ഈ പദ്ധതിവഴി കഴിഞ്ഞ സർക്കാരിന്‍റെ കാലത്ത് ഒരു കിലോവാട്ടിന്‍റെ 8391 സോളാർ പാനൽ സ്ഥാപിച്ചു.

ഇതിൽ 64 മേൽക്കൂരകളിൽ സ്ഥാപിച്ച പാനലുകളിൽനിന്നുള്ള 1,340 കിലോവാട്ട് വൈദ്യുതി വൈദ്യുതി ബോർഡിന്‍റെ ശൃംഖലയുമായി ബന്ധിപ്പിച്ചു. ഈ സർക്കാരിന്‍റെ കാലത്ത് 215 മേൽക്കൂരകളിൽ സ്ഥാപിച്ച ഗ്രിഡിൽ നിന്ന് 2,686 കിലോവാട്ട് വൈദ്യുതി വൈദ്യുതി ബോർഡ് ശൃംഖലയുമായി ബന്ധിപ്പിച്ചു. ഇതിലൂടെ വൈദ്യുതി ബോർഡിന് പ്രതിദിനം 29,674 കിലോവാട്ടിന്‍റെ വൈദ്യുതി ലാഭമുണ്ടായി.

ഒരു വീടിനു മുകളിൽ സോളാർ പാനൽ സ്ഥാപിക്കുന്നതിന് ലഭിക്കുന്ന സബ്സിഡി 92,262 രൂപയാണ്. ഇതിൽ കേന്ദ്ര സർക്കാർ വിഹിതം 53,262 രൂപയും സംസ്ഥാന സർക്കാർ വിഹിതം 39000 രൂപയുമാണ്. സോളാർ പാനൽ സ്ഥാപിക്കുന്നതിനുള്ള സംസ്ഥാനത്തെ നോഡൽ ഏജൻസിയായ അനർട്ടിന് 2015-16 സാമ്പത്തിക വർഷത്തിൽ 10.2 കോടി രൂപയും 2016-17 സാമ്പത്തിക വർഷത്തിൽ 27.63 കോടി രൂപയും കേന്ദ്ര സർക്കാർ സഹായമായി ലഭിച്ചിട്ടുണ്ട്.കാസർഗോഡ് ജില്ലയിലാണ് സംസ്ഥാനത്തെ വലിയ സൗരോർജ പദ്ധതികൾ വിഭാവന ചെയ്യുന്നത്. കാസർഗോഡ് നിലവിൽ 200 മെഗാവാട്ടിന്‍റെ പദ്ധതി നടപ്പിലാക്കിവരുന്നു. ചീമേനിയിലെ സൗരോർജ പാർക്ക് പരിഗണനയിലാണ്.