കൊച്ചി: സമൂഹത്തിലെ എല്ലാവിഭാഗം ജനങ്ങളെയും ഉൾക്കൊള്ളുന്ന മതേതരമുഖം മാധ്യമപ്രവർത്തനങ്ങൾക്ക് ആവശ്യമാണെന്നു സീറോ മലബാർ സഭ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരി. ദീപിക ഫ്രണ്ട്സ് ക്ലബ് (ഡിഎഫ്സി) എറണാകുളം-അങ്കമാലി അതിരൂപത ദ്വിദിന നേതൃത്വപരിശീലന ക്യാന്പ് കലൂർ റിന്യൂവൽ സെന്‍ററിൽ ഉദ്ഘാടനം ചെയ്യുകയായിരുന്നു അദ്ദേഹം.
സമൂഹത്തിന്‍റെ സമസ്തതലങ്ങളിലെയും ക്രിയാത്മകമായ ഇടപെടലുകളാണു ദീപികയെ കേരളചരിത്രത്തിൽ ശ്രദ്ധേയമാക്കിയത്. സത്യത്തിന്‍റെ ഉപാസനയായ മാധ്യമശുശ്രൂഷകളിൽ സമഭാവനയോടെയാണു ദീപിക വിഷയങ്ങളെ സമീപിക്കുന്നത്. ക്രിസ്തീയ, സാമൂഹ്യമൂല്യങ്ങളെ സമന്വയിപ്പിച്ചു സമൂഹത്തിന്‍റെ പൊതു ആവശ്യങ്ങളെ ആവിഷ്കരിക്കാനും ശബ്ദമുയർത്താനും ദീപികയ്ക്കു സാധിച്ചു.
സത്യസന്ധത, നീതിബോധം, മാനവഐക്യം എന്നിവ മുറുകെപ്പിടിച്ചുകൊണ്ടായിരുന്നു ദീപികയുടെ സഞ്ചാരം. മാധ്യമങ്ങൾക്കുള്ള പ്രാധാന്യം വർധിക്കുന്ന പുതിയ കാലഘട്ടത്തിൽ ദീപികയുടെ വളർച്ച അനിവാര്യമാണെന്നും മാർ ആലഞ്ചേരി പറഞ്ഞു. രാഷ്ട്രദീപിക ലിമിറ്റഡ് മാനേജിംഗ് ഡയറക്ടർ മോണ്. ഡോ. മാണി പുതിയിടം, ഡിഎംഡി ഡോ. താർസീസ് ജോസഫ്, ദീപിക കൊച്ചി റസിഡന്‍റ് മാനേജർ ഫാ. മാത്യു കിലുക്കൻ, ഡിഎഫ്സി സംസ്ഥാന പ്രസിഡന്‍റ് ഡോ. സണ്ണി സഖറിയ എന്നിവർ പ്രസംഗിച്ചു.
മനുഷ്യജീവിതവുമായി ബന്ധപ്പെട്ടുള്ള പ്രശ്നങ്ങളെ അഭിമുഖീകരിക്കാനും അതിന്‍റെ പരിഹാരത്തിനായി കാര്യക്ഷമമായ നിലപാടുകളെടുക്കാനും ചെയ്യുന്നതാണു ദീപികയുടെ അനന്യതയെന്നു ക്യാന്പിനെ അഭിസംബോധന ചെയ്ത അതിരൂപത സഹായമെത്രാൻ മാർ സെബാസ്റ്റ്യൻ എടയന്ത്രത്ത് പറഞ്ഞു. മനുഷ്യമനസുകളിൽ ആന്തരിക വെളിച്ചം പകരുന്ന മാധ്യമശക്തിയായി ദീപിക വളർന്നു വരേണ്ടത് ആവശ്യമാണെന്നും അദ്ദേഹം പറഞ്ഞു.
ദീപികയുടെ സ്ഥാപക പത്രാധിപർ നിധീരിക്കൽ മാണി കത്തനാരുടെ 175-ാം ജന്മവാർഷികത്തോടനുബന്ധിച്ച് അദ്ദേഹത്തിന്‍റെ ഛായചിത്രത്തിൽ മാർ എടയന്ത്രത്ത് പുഷ്പാർച്ച നടത്തി. ബിഷപ് മാർ ജോസ് പുത്തൻവീട്ടിലും ക്യാന്പ് അംഗങ്ങളുമായി ആശയവിനിമയം നടത്തി.
ആശയ വിനിമയത്തിന്‍റെ മഹത്തായ പ്രകാശനമാണു മാധ്യമങ്ങളിലൂടെ സാധ്യമാകുന്നതെന്നു മാർ ജോസ് പുത്തൻവീട്ടിൽ ചൂണ്ടിക്കാട്ടി. ആധുനിക കാലഘട്ടത്തിൽ സത്യത്തിന്‍റെ വാഹകരാകാൻ മാധ്യമങ്ങൾക്കും മാധ്യമപ്രവർത്തകർക്കും സാധ്യമാകണമെന്നും അദ്ദേഹം പറഞ്ഞു.
കെ.വി. തോമസ് എംപി, ഡിഎഫ്സി സംസ്ഥാന ഡയറക്ടർ ഫാ. റോയി കണ്ണൻചിറ, ന്യൂസ് എഡിറ്റർമാരായ റോയി ജോണ്, ജോണ്സണ് പൂവന്തുരുത്ത്, മാർക്കറ്റിംഗ് ജനറൽ മാനേജർ കെ.സി. തോമസ്, ചീഫ് ഫിനാൻസ് മാനേജർ എം.എം. ജോർജ്, സർക്കുലേഷൻ ഡപ്യൂട്ടി ജനറൽ മാനേജർ ജോസഫ് ഓലിക്കൻ, കൊച്ചി ലേഖകൻ സിജോ പൈനാടത്ത് എന്നിവർ വിവിധ സെഷനുകളിൽ പ്രസംഗിച്ചു.
ഡിഎഫ്സി അതിരൂപത കോ ഓർഡിനേറ്റർ ഫാ. ഷാൻലി ചിറപ്പണത്ത് പതാക ഉയർത്തി. ഡിഎഫ്സി അതിരൂപതാ സമിതി ഭാരവാഹികളുടെ തെരഞ്ഞെടുപ്പ് ഇന്നലെ നടന്നു.
ദീപിക ചീഫ് എഡിറ്റർ ഫാ. ബോബി അലക്സ് മണ്ണംപ്ലാക്കൽ, ഡിഎഫ്സി കോതമംഗലം രൂപത കോ ഓർഡിനേറ്റർ ഫാ. ജിനോ പുന്നമറ്റം എന്നിവർ ഇന്നത്തെ വിവിധ സെഷനുകൾ നയിക്കും. ബിഷപ് മാർ തോമസ് ചക്യത്ത് ക്യാന്പിനെ അഭിസംബോധന ചെയ്യും.
ഉച്ചകഴിഞ്ഞു 2.30നു നടക്കുന്ന കണ്‍വൻഷൻ രാജ്യസഭാ ഡപ്യൂട്ടി ചെയർമാൻ പ്രഫ. പി.ജെ. കുര്യൻ ഉദ്ഘാടനം ചെയ്യും. സീറോ മലബാർ സഭ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരി അധ്യക്ഷത വഹിക്കും. പിഎസ് സി മുൻ ചെയർമാൻ ഡോ. കെ.എസ്. രാധാക്യഷ്ണൻ മുഖ്യപ്രഭാഷണം നടത്തും.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.