കോഴിക്കോട്: കേന്ദ്ര-സംസ്ഥാന സർക്കാരുകളുടെ ജനവഞ്ചനക്കെതിരെ പ്രതിപക്ഷ നേതാവ് രമേശ് ചെന്നിത്തല നയിക്കുന്ന ‘പടയൊരുക്കം’ജാഥയ്ക്ക് നവംബർ ഒന്നിന് തുടക്കമാകും. ജാഥ വിജയിപ്പിക്കുന്നതിന്‍റെ മുന്നോടിയായി ഇന്നലെ ലീഗ് ഹൗസിൽ നടന്ന യോഗത്തിൽ കാസർഗോഡ് മുതൽ തൃശൂർ വരെയുള്ള ജില്ലകളിൽ നിന്നുള്ള യുഡിഎഫ് നേതാക്കൾ പങ്കെടുത്തു.
കേന്ദ്ര-സംസ്ഥാന സർക്കാരുകളുടെ ജനവിരുദ്ധ നയങ്ങൾക്കെതിരെ നടത്തുന്ന യാത്ര കേരളത്തിൽ യുഡിഎഫി ന്‍റെ അതിശക്തമായ സ്വാധീനം കാണിക്കുന്നതായിരിക്കുമെന്ന് രമേശ് ചെന്നിത്തല പറഞ്ഞു. നവംബർ ഒന്നിനു വൈകുന്നേരം നാലിന് കാസർഗോഡ് നിന്നാരംഭിക്കുന്ന യാത്ര കോണ്ഗ്രസ് പ്രവർത്തകസമിതി അംഗം എ.കെ.ആന്‍റണി ഉദ്ഘാടനം ചെയ്യും. കെപിസിസി പ്രസിഡന്‍റ് എം.എം. ഹസൻ, മുസ്‌ലിംലീഗ് അഖിലേന്ത്യാ ജനറൽ സെക്രട്ടറി പി.കെ. കുഞ്ഞാലിക്കുട്ടി എംപി, മുൻ മുഖ്യമന്ത്രി ഉമ്മൻചാണ്ടി തുടങ്ങിയവർ പങ്കെടുക്കും.
ജാഥയ്ക്ക് നൽകുന്ന സ്വീകരണത്തിന്‍റെ ഭാഗമായി അടുത്ത മാസം എട്ടിന് വൈകുന്നേരം കോഴിക്കോട് കടപ്പുറത്ത് കാസർഗോഡ്,വയനാട്,മലപ്പുറം,കോഴിക്കോട് ജില്ലകളിൽ നിന്നുള്ള പ്രവർത്തകരെ പങ്കെടുപ്പിച്ച് വൻ റാലി സംഘടിപ്പിക്കും. മുസ്‌ലിംലീഗ് സംസ്ഥാന പ്രസിഡന്‍റ് പാണക്കാട് ഹൈദരലി ശിഹാബ് തങ്ങൾ ഉദ്ഘാടനം ചെയ്യും. കോണ്ഗ്രസ് നേതാവ് ഗുലാംനബി ആസാദ്, ജനതാദൾ നേതാവ് ശരത് യാദവ് തുടങ്ങിയവർ പങ്കെടുക്കും. കൊച്ചിയിൽ നടക്കുന്ന റാലിയിൽ മുൻ പ്രധാനമന്ത്രി മൻമോഹൻ സിംഗ് പങ്കെടുക്കും.
ഡിസംബർ ഒന്നിന് തിരുവനന്തപുരം ശംഖുമുഖത്ത് നടക്കുന്ന സമാപന റാലിയിൽ എഐസിസി വൈസ് പ്രസിഡന്‍റ് രാഹുൽഗാന്ധി പങ്കെടുക്കും. ജാഥയുടെ വിവിധ സ്വീകരണ സമ്മേളനങ്ങളിൽ പഞ്ചാബ് മുഖ്യമന്ത്രി ക്യാപ്റ്റൻ അമരീന്ദർസിംഗ്, കർണാടക മുഖ്യമന്ത്രി സിദ്ധരാമയ്യ, പോണ്ടിച്ചേരി മുഖ്യമന്ത്രി വി. നാരായണ സ്വാമി തുടങ്ങിയവരും ഘടക കക്ഷികളുടെ ദേശീയ നേതാക്കളും പങ്കെടുക്കും.കേന്ദ്ര സംസ്ഥാന സർക്കാരുകൾക്കെതിരായ ജനവികാരം ഉയർത്തുന്നതിനായി ഒരു കോടി ഒപ്പുകൾ ശേഖരിക്കും.
ഓരോ ബൂത്തിൽ നിന്നും ശേഖരിക്കുന്ന ഒപ്പുകൾ നിയോജക മണ്ഡലംതല സ്വീകരണങ്ങളിൽ നിന്ന് ഏറ്റുവാങ്ങും.ഇതിനായി ഭവന സന്ദർശനം നടത്തും.യുഡിഎഫ് കണ്‍വീനർ പി.പി. തങ്കച്ചൻ, കെപിസിസി പ്രസിഡന്‍റ് എം.എം. ഹസൻ, മുസ്‌ലിംലീഗ് അഖിലേന്ത്യാ ജനറൽ സെക്രട്ടറി പി.കെ. കുഞ്ഞാലിക്കുട്ടി എംപി, സംസ്ഥാന ജനറൽ സെക്രട്ടറി കെ.പി.എ. മജീദ്, ആർഎസ്പി നേതാവ് ഷിബു ബേബി ജോണ്, പ്രതിപക്ഷ ഉപനേതാവ് ഡോ എം. കെ. മുനീർ, കേരള കോണ്ഗ്രസ് ജേക്കബ് വിഭാഗം ചെയർമാൻ ജോണി നെല്ലൂർ, സിഎംപി സംസ്ഥാന സെക്രട്ടറി സി. പി. ജോണ്,ഫോർവേഡ് ബ്ലോക് സംസ്ഥാന പ്രസിഡന്‍റ് റാംമോഹൻ, ജനതാദൾ യു നേതാവ് കെ.പി. മോഹനൻ, പി.വി. അബ്ദുൾ വഹാബ് എംപി, എം.കെ. രാഘവൻ എംപി തുടങ്ങിയവർ യോഗത്തിൽ പങ്കെടുത്തു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.