രാജ്യത്തെ ആദ്യ സമ്പൂര്‍ണ ഭക്ഷ്യസുരക്ഷാ ജില്ലയായി കൊല്ലം; പ്രഖ്യാപനം ഇന്ന് : Deepika.com Kerala News |

Click here for detailed news of all items

രാജ്യത്തെ ആദ്യ സമ്പൂര്‍ണ ഭക്ഷ്യസുരക്ഷാ ജില്ലയായി കൊല്ലം; പ്രഖ്യാപനം ഇന്ന്

Monday, March 19, 2018 1:58 AM IST

തിരുവനന്തപുരം: ഭക്ഷ്യ സുരക്ഷാ ലൈസന്‍സ് എല്ലാ ഭക്ഷ്യ ഉത്പാദക വിതരണ സംഭരണ മേഖലകളിലും പൂര്‍ത്തിയാക്കിയ രാജ്യത്തെ ആദ്യ ഭക്ഷ്യസുരക്ഷാ ജില്ലയുടെ ഔദ്യോഗിക പ്രഖ്യാപനം ഇന്നു വൈകുന്നേരം ആറിന് കൊല്ലം സോപാനം ഓഡിറ്റോറിയത്തില്‍ മന്ത്രി കെ.കെ. ശൈലജ നിര്‍വഹിക്കും എം. നൗഷാദ് എംഎല്‍എ അധ്യക്ഷനായിരിക്കും.

രാജ്യത്തിനുതന്നെ മാതൃകയായി ഭക്ഷ്യസുരക്ഷ ലൈസന്‍സ്/രജിസ്‌ട്രേഷന്‍ പൂര്‍ത്തീകരിച്ച ആദ്യ ജില്ലയാണു കൊല്ലം. വളരെക്കുറച്ചു ജീവനക്കാര്‍ മാത്രമാണ് കൊല്ലം ജില്ലയിലുള്ളതെങ്കിലും അവര്‍ മുഴുവനും വിവര ശേഖരണത്തിനായി യുദ്ധകാലാടിസ്ഥാനത്തില്‍ മുന്നിട്ടിറങ്ങിയാണ് ഈ സംരംഭം വിജയിപ്പിച്ചത്. ഭക്ഷ്യ ഉത്പാദക വിതരണ- വില്‍പ്പന മേഖലയിലെ മുഴുവന്‍ വിവരങ്ങള്‍ ശേഖരിക്കുകയും ഇവര്‍ക്കെല്ലാംതന്നെ ലൈസന്‍സ്/രജിസ്‌ട്രേഷന്‍ നല്‍കുകയും ചെയ്തു.

2006ലെ ഭക്ഷ്യസുരക്ഷാ ഗുണനിലവാര നിയമത്തിന്‍റെ പ്രാധാന്യം ഉള്‍ക്കൊണ്ട് ഭക്ഷ്യസുരക്ഷ വിഭാഗം രൂപീകരിച്ച ആദ്യ സംസ്ഥാനങ്ങളില്‍ ഒന്നാണു കേരളം. ഈ നിയമം നിലവില്‍ വന്നതോടെ ഭക്ഷ്യമേഖലയിലെ ഉത്പാദക, വിതരണ, വില്്പന മേഖലയില്‍ പ്രവര്‍ത്തിക്കുന്ന മുഴുവന്‍ ആളുകളും സംരംഭകരും ഭക്ഷ്യസുരക്ഷ ലൈസന്‍സ്/രജിസ്‌ട്രേഷന്‍ കരസ്ഥമാക്കേണ്ടത് നിയമപരമായ വ്യവസ്ഥയായി മാറി. എന്നാല്‍, ഇതു നേടുന്നതിനുള്ള സമയം ഫുഡ് സേഫ്റ്റി സ്റ്റാന്‍ഡേര്‍ഡ് അഥോറിറ്റി ഓഫ് ഇന്ത്യ പലതവണ നീട്ടി നല്‍കിയിരുന്നുവെങ്കിലും ഭക്ഷ്യസുരക്ഷ ലൈസന്‍സ്/രജിസ്‌ട്രേഷന്‍ ഇല്ലാതെ സ്ഥാപനങ്ങള്‍ പ്രവര്‍ത്തിക്കുന്നതായി കണ്ടെത്തിയിരുന്നു. ഇതേത്തു ടര്‍ന്നാണ് എത്രയും പെട്ടെന്ന് ഇവയുടെ ലൈസന്‍സ് പൂര്‍ത്തീകരിക്കണമെന്ന് ഫുഡ് സേഫ്റ്റി സ്റ്റാന്‍ഡേര്‍ഡ് അഥോറിറ്റി ഓഫ് ഇന്ത്യ നിര്‍ദേശിച്ചിരിക്കുന്നത്.

ഇതിന്‍റെ അടിസ്ഥാനത്തില്‍ ഭക്ഷ്യ സുരക്ഷാ കമ്മീഷണര്‍ അസിസ്റ്റന്‍റ് കമ്മീഷണര്‍മാരുടെ യോഗം വിളിച്ചു ചേര്‍ത്താണ് ലൈസന്‍സ് പൂര്‍ത്തിയാക്കാനുള്ള നടപടിക്രമങ്ങള്‍ ചെയ്തത്. ജില്ലാ കളക്ടറുടെയും ജില്ലാ വികസന സമിതികളുടെയും സഹായത്തോടെയാണ് കൊല്ലം ജില്ല ആദ്യമായി ഇതു പൂര്‍ത്തിയാക്കിയത്. ജൂണ്‍ മാസത്തോടെ എല്ലാ ജില്ലകളിലും ഈ ലക്ഷ്യം കൈവരിക്കാനുള്ള ശ്രമങ്ങളാണ് നടന്നുവരുന്നത്. അതോടുകൂടി സമ്പൂര്‍ണ ഭക്ഷ്യസുരക്ഷാ ലൈസന്‍സ്/രജിസ്‌ട്രേഷന്‍ ഉള്ള ആദ്യ സംസ്ഥാനമായി കേരളം മാറും.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.