ഭരണങ്ങാനം: വിശുദ്ധ അൽഫോൻസാമ്മയുടെ തിരുനാളിന് നാളെ ഭരണങ്ങാനം തീർഥാടനകേന്ദ്രത്തിൽ കൊടിയേറും. നാളെ രാവിലെ 10.45 ന് പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് തിരുനാളിന് കൊടിയേറ്റും. ദിവസവും വിവിധ സമയങ്ങളിൽ വിശുദ്ധ കുർബാന, സായാഹ്നങ്ങളിൽ ജപമാല-മെഴുകുതിരി പ്രദക്ഷിണം, വിവിധ സംഘടനകളുടെയും ഇടവകകളുടെയും നേതൃത്വത്തിലുള്ള അൽഫോൻസാ തീർഥാടനങ്ങൾ, തിരുക്കർമങ്ങൾ തുടങ്ങിയവയാണ് പ്രധാനപരിപാടികൾ.
തിരുനാൾ ദിവസങ്ങളിൽ രാവിലെ 11 ന് നടക്കുന്ന വിശുദ്ധ കുർബാനയ്ക്ക് മുഖ്യകാർമികത്വം വഹിക്കുന്നത് വിവിധ രൂപതാധ്യക്ഷ്യന്മാരാണ്. ദിവസവും പുലർച്ചെ 5.15, 6.30, 8.30,11, ഉച്ചകഴിഞ്ഞ് 2.30, 4.00, 5.00 എന്നീ സമയങ്ങളിൽ വിശുദ്ധ കുർബാന. കൊടിയേറ്റിനു ശേഷം നടക്കുന്ന വിശുദ്ധ കുർബാനയ്ക്ക് പാലാ രൂപത സഹായമെത്രാൻ മാർ ജേക്കബ് മുരിക്കൻ മുഖ്യകാർമികത്വം വഹിക്കും. വൈകുന്നേരം 6.30 ന് ജപമാല, മെഴുകുതിരി പ്രദക്ഷിണം. ഉച്ചകഴിഞ്ഞ് 3.30 നു വിശുദ്ധ അൽഫോൻസാമ്മയുടെ കബറിടം സന്ദർശിക്കുന്ന ജർമനിയിലെ കൊളോണ് രൂപതയുടെ ആർച്ച്ബിഷപ്പ് കർദിനാൾ റെയ്നർ വോൾക്കിക്ക് രൂപതാധ്യക്ഷൻ മാർ ജോസഫ് കല്ലറങ്ങാട്ടിന്റെ നേതൃത്വത്തിൽ സ്വീകരണം നൽകും.
തിരുനാൾ ദിവസങ്ങളിൽ സീറോ മലബാർ, സീറോ മലങ്കര, ലത്തീൻ റീത്തുകളിൽ വിശുദ്ധ കുർബാന അർപ്പിക്കപ്പെടും. വിവിധ ദിവസങ്ങളിൽ രാവിലെ 11 നുള്ള വിശുദ്ധ കുർബാനയ്ക്ക് ആർച്ച്ബിഷപ്പ് മാർ ജോസഫ് പെരുന്തോട്ടം, ആർച്ച്ബിഷപ് തോമസ് മാർ കുറിലോസ്, മാർ ജോസഫ് കല്ലറങ്ങാട്ട് , മാർ ജേക്കബ് മുരിക്കൻ, മാർ ജോസഫ് പള്ളിക്കാപറന്പിൽ, മാർ റെമീജിയോസ് ഇഞ്ചനാനിയിൽ, മാർ ജോസഫ് പാംപ്ലാനി, മാർ ടോണി നീലങ്കാവിൽ, മാർ ജോണ് നെല്ലിക്കുന്നേൽ, മാർ സെബാസ്റ്റ്യൻ വാണിയപ്പുരക്കൽ, ഡോ. ആന്റണി മുല്ലശേരി, ഡോ. ജയിംസ് റാഫേൽ ആനാപറന്പിൽ എന്നിവർ മുഖ്യ കാർമികരായിരിക്കും.
തിരുനാളിന്റെ ക്രമീകരണങ്ങൾ വിലയിരുത്തുന്നതിന് ഇന്നു രാവിലെ പത്തിന് ഭരണങ്ങാനം തീർഥാടന കേന്ദ്രത്തോടു ചേർന്നുള്ള സ്പിരിച്വാലിറ്റി സെന്ററിൽ കെ.എം. മാണി എംഎൽഎയുടെ നേതൃത്വത്തിൽ ഉദ്യോഗസ്ഥ സമ്മേളനം നടക്കും. സർക്കാരിന്റെ വിവിധ വകുപ്പുകളിൽനിന്നുള്ള ഉദ്യോഗസ്ഥർ പങ്കെടുക്കും.
പതിവ് പാർക്കിംഗ് സ്ഥലങ്ങൾക്കു പുറമെ പുതിയ അൽഫോൻസ സ്പിരിച്വാലിറ്റി സെന്ററിനു സമീപം പാർക്കിംഗിന് കൂടുതൽ സൗകര്യങ്ങൾ ഏർപ്പെടുത്തിയിട്ടുണ്ട്. ഭക്തജനങ്ങൾക്ക് നേർയപ്പം, നേർച്ചയെണ്ണ എന്നിവ പ്രത്യേകമായി ലഭ്യമാക്കുന്നതിനുള്ള ക്രമീകരണങ്ങൾ ഏർപ്പെടുത്തുകയും തീർഥാടകർക്കുള്ള സൗകര്യങ്ങൾ വിപുലപ്പെടുത്തുകയും ചെയ്തിട്ടുണ്ട്. തീർഥാടകർക്കു താമസ സൗകര്യത്തിനായി 9446559363 എന്ന നന്പറിൽ ബന്ധപ്പെടണം. തിരുനാൾ പ്രദുസേന്തി, ജപമാലമെഴുകുതിരി, പ്രദക്ഷിണം എന്നിവ ഏറ്റെടുത്തു നടത്താൻ നെറ്റ് ബാങ്കിംഗ് വഴിയും സൗകര്യമുണ്ട്. (www.alphonsa.net). അടിമ സമർപ്പണം, തൊട്ടിൽ നേർച്ച,വിളക്കുനേർച്ച, മുത്തുക്കുട നേർച്ച, വസ്ത്ര നേർച്ച തുടങ്ങിയവ നടത്തുവാൻ ആഗ്രഹിക്കുന്നവർക്കായി കൂടുതൽ ക്രമീകരണങ്ങൾ ഒരുക്കി. ഓഫീസുമായി ബന്ധപ്പെടേണ്ട നന്പർ: 8301065244, 04822-236244. തിരുനാളിന്റെ ഒരുക്കങ്ങളെല്ലാം പൂർത്തിയായതായി തീർഥാടനകേന്ദ്രം റെക്ടർ ഫാ. മാത്യു ചന്ദ്രൻകുന്നേൽ അറിയിച്ചു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.