ഗഡ്കരിയെ നേരിടാന്‍ മഹേഷ് ജെത്മലാനി
സ്വന്തം ലേഖകന്‍

ന്യൂഡല്‍ഹി: ബിജെപി അധ്യക്ഷനായി നിതിന്‍ ഗഡ്കരിക്കു രണ്ടാമൂഴം നല്‍കിയാല്‍ എതിര്‍സ്ഥാനാര്‍ഥിയായി മത്സരിക്കുമെന്നു പാര്‍ട്ടി നേതാവ് മഹേഷ് ജെത്മലാനി. ഗഡ്കരിക്കു പകരം സുഷമ സ്വരാജിനെയോ നരേന്ദ്ര മോഡിയെയോ പ്രസിഡന്റ്സ്ഥാനത്തേക്കു പരിഗണിക്കണമെന്നു മുതിര്‍ന്ന നേതാവ് എല്‍.കെ. അഡ്വാനി ആവശ്യപ്പെട്ടതിനു പിന്നാലെയാണു മുതിര്‍ന്ന നേതാവ് റാം ജെത്മലാനിയുടെ മകനും അഭിഭാഷകനുമായ മഹേഷ് ജെത്മലാനി രംഗത്തെത്തിയത്.

അഴിമതിയാരോപണ വിധേയനായ ഗഡ്കരിക്കൊപ്പം പ്രവര്‍ത്തിക്കാനാവില്ലെന്നു ചൂണ്ടിക്കാട്ടി അടുത്തിടെയാണു പാര്‍ട്ടി ദേശീയ എക്സിക്യൂട്ടീവില്‍നിന്നു മഹേഷ് ജെത്മലാനി രാജിവച്ചത്. ഗഡ്കരിക്കെതിരേ കടുത്ത വിമര്‍ശനം നടത്തിയ റാം ജെത്മലാനിയെ പാര്‍ട്ടി സസ്പെന്‍ഡ് ചെയ്തിരുന്നു. റാം ജെത്മലാനിയെ വീണ്ടും പാര്‍ട്ടിയില്‍ തിരിച്ചെടുത്തേക്കുമെന്ന റിപ്പോര്‍ട്ടുകള്‍ പുറത്തുവരുന്നതിനിടയിലാണു ഗഡ്കരിക്കെതിരേ മത്സരിക്കുമെന്നു വ്യക്തമാക്കി മകന്‍ വീണ്ടും രംഗത്തെത്തിയത്. എന്നാല്‍, മാധ്യമപ്രവര്‍ത്തകരുടെ ആവര്‍ത്തിച്ചുള്ള ചോദ്യത്തിനു വ്യക്തമായ ഉത്തരം നല്‍കാന്‍ മഹേഷ് ജെത്മലാനി തയാറായില്ല.


നിതിന്‍ ഗഡ്കരിയുടെ സ്ഥാനാര്‍ഥിത്വത്തിനെതിരേ ആര്‍എസ്എസ് നേതാവ് സുരേഷ് സോണിയും രംഗത്തു വന്നിട്ടുണ്ട്. ഇക്കാര്യം സംബന്ധിച്ച് എല്‍.കെ. അഡ്വാനിയുമായി ചര്‍ച്ച നടത്തുമെന്നും അദ്ദേഹം അറിയിച്ചു. അധ്യക്ഷസ്ഥാനത്തേക്ക് നാമനിര്‍ദേശപത്രിക ക്ഷണിച്ചു ബിജെപി ഞായറാഴ്ച വിജ്ഞാപനം പുറപ്പെടുവിച്ചിരുന്നു. ബുധനാഴ്ചയാണു നാമനിര്‍ദേശ പത്രിക സമര്‍പ്പിക്കാനുള്ള അവസാനദിവസം. ഗഡ്കരിക്കു പകരം മറ്റൊരാളെ കണ്െടത്തുന്നതില്‍ പരാജയപ്പെട്ട ആര്‍എസ്എസും ബിജെപിയും ഗഡ്കരിക്കു രണ്ടാമൂഴം നല്‍കുന്നതിലുള്ള തയാറെടുപ്പാണു നടത്തുന്നത്. എന്നാല്‍, ഇതിനെതിരേ അഡ്വാനി വിഭാഗം എതിര്‍പ്പുമായി രംഗത്തുമുണ്ട്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.