ടി.പി. വധം: പി. മോഹനന്റെ ജാമ്യാപേക്ഷ തള്ളി
സ്വന്തം ലേഖകന്‍

ന്യൂഡല്‍ഹി: ടി.പി. ചന്ദ്രശേഖരന്‍ വധക്കേസിലെ 14-ാം പ്രതിയും സിപിഎം കോഴിക്കോട് ജില്ലാ സെക്രട്ടേറിയറ്റ് അംഗവുമായ പി. മോഹനന്റെ ജാമ്യാപേക്ഷ സുപ്രീംകോടതി തള്ളി. കോഴിക്കോട്, കണ്ണൂര്‍ ജില്ലകളില്‍ സ്വാധീനമുള്ള പ്രതിക്കു ജാമ്യം നല്‍കുന്നതു കേസിനെ ബാധിക്കുമെന്ന സംസ്ഥാന സര്‍ക്കാരിന്റെ വാദം അംഗീകരിച്ചാണു കോടതിയുടെ നടപടി. സാക്ഷികളുടെ വിസ്താരം പൂര്‍ത്തിയാക്കിയതിനുശേഷം ജാമ്യത്തിനായി വീണ്ടും അപേക്ഷ സമര്‍പ്പിക്കാമെന്നും സുപ്രീംകോടതി വ്യക്തമാക്കി. പ്രതി ഗൂഡാലോചന നടത്തി കൊലയാളികളെ ഏര്‍പ്പാടാക്കിയതെന്നാണു കേസ്. മാത്രമല്ല, ഇയാള്‍ക്കു സ്വാധീനവുമുണ്ട്. ഇക്കാര്യം ഹൈക്കോടതി ഉത്തരവില്‍ തന്നെ വ്യക്തമാക്കിയിട്ടുമുണ്ട്. അതിനാല്‍ ഇപ്പോള്‍ പ്രതിക്കു ജാമ്യം നല്‍കിയാല്‍ അതു കേസിനെ ബാധിക്കുമെന്നും ജാമ്യം അനുവദിക്കാനാവില്ലെന്നും ജസ്റീസുമാരായ ടി.എസ്. താക്കൂര്‍, എസ്.ജെ. മുഖോപധ്യായ എന്നിവരടങ്ങിയ ഡിവിഷന്‍ ബെഞ്ച് ചൂണ്ടിക്കാട്ടി.

ജാമ്യം അനുവദിച്ചാല്‍ സാക്ഷികളെ സ്വാധീനിക്കാന്‍ പ്രതി ശ്രമിക്കുമെന്ന സംശയത്തിന് അടിസ്ഥാനമില്ലെന്ന് മോഹനന്റെ അഭിഭാഷകന്‍ മുതിര്‍ന്ന അഭിഭാഷകന്‍ നാഗേശ്വര്‍ റാവു വാദിച്ചെങ്കിലും കോടതി ഇത് അംഗീകരിച്ചില്ല. കേസിലെ മറ്റുചില പ്രതികള്‍ക്ക് ഉപാധിയോടെ ജാമ്യം ലഭിച്ചിട്ടുണ്െടന്നും അത്തരത്തിലെങ്കിലും ജാമ്യം അനുവദിക്കണമെന്നും അദ്ദേഹം വാദിച്ചു. കേസ് രാഷ്ട്രീയ കേസാണോയെന്നു കോടതി കക്ഷികളോടു ചോദിച്ചു. അതേയെന്നു കേരളത്തിനുവേണ്ടി ഹാജരായ മുതിര്‍ന്ന അഭിഭാഷകന്‍ വി. ഗിരി കോടതിയെ അറിയിച്ചു.


കേസിന്റെ വിചാരണ എന്തുകൊണ്ട് ഇതുവരെ തുടങ്ങിയല്ലെന്ന ഡിവിഷന്‍ ബെഞ്ചിന്റെ ചോദ്യത്തിനു നേരത്തെ ഹൈക്കോടതി മോഹനനു ജാമ്യം നിഷേധിക്കുമ്പോള്‍ കേസ് 2013 ജൂലൈ 31നു മുമ്പ് തീര്‍പ്പാക്കണമെന്ന് വിചാരണകോടതിക്കു നിര്‍ദേശം നല്‍കിയിരുന്നെന്നും അതു പ്രകാരം ഏപ്രില്‍ 17 നു മുമ്പ് സാക്ഷി മൊഴി പരിശോധന പൂര്‍ത്തിയാക്കാന്‍ വിചാരണക്കോടതി പദ്ധതിയിട്ടിട്ടുണ്െടന്നും അഭിഭാഷകര്‍ അറിയിച്ചു.

കേസിലെ സാക്ഷികളെക്കുറിച്ചു ചോദിച്ചറിഞ്ഞ കോടതി ഒടുവില്‍ ജാമ്യാപേക്ഷ തള്ളുകയായിരുന്നു. കേസില്‍ 284 സാക്ഷികളാണുള്ളത്. മോഹനനു ജാമ്യം നല്‍കരുതെന്ന് ആവശ്യപ്പെട്ട് ചന്ദ്രശേഖരന്റെ ഭാര്യ കെ.കെ. രമയും സുപ്രീംകോടതിയില്‍ അപേക്ഷ നല്‍കിയിരുന്നു. രമക്കു വേണ്ടി അഭിഭാഷകനായ ബസന്ത് ഹാജരായി.