കര്‍ദിനാള്‍ ഫെര്‍ണാണ്േടാ ഫിലോനിക്ക് ഡല്‍ഹിയില്‍ ഉജ്വല സ്വീകരണം
സ്വന്തം ലേഖകന്‍

ന്യൂഡല്‍ഹി: ഇന്ത്യാ സന്ദര്‍ശനത്തിനെത്തിയ മാര്‍പാപ്പയുടെ പ്രതിനിധി വിശ്വാസ പ്രഘോഷണ തിരുസംഘത്തിന്റെ അധ്യക്ഷന്‍ കര്‍ദിനാള്‍ ഫെര്‍ണാണ്േടാ ഫിലോനിക്ക് ഡല്‍ഹിയില്‍ സീറോ മലബാര്‍ സഭയുടെ ഉജ്വല സ്വീകരണം. പേപ്പല്‍ പതാകയുടെയും താലപ്പൊലിയുടെയും അകമ്പടിയോടെ ആയിരക്കണക്കിനു വിശ്വാസികളാണ് ഡല്‍ഹി ജസോളയിലെ ഫാത്തിമ മാതാ പള്ളിയിലും വഴിയോരങ്ങളിലുമായി അണിനിരന്നത്.

ഇന്ത്യയിലെ വത്തിക്കാന്‍ എംബസിയുടെ 130-ാം വാര്‍ഷികത്തിന്റെ ഭാഗമായി രാജ്യത്ത് ആദ്യ സന്ദര്‍ശനം നടത്തുന്ന കര്‍ദിനാള്‍ ഫിലോനിക്ക് സീറോ മലബാര്‍ സഭയുടെ നേതൃത്വത്തില്‍ ഫരീദാബാദ് രൂപതയാണ് സ്വീകരണം സംഘടിപ്പിച്ചത്. ഇന്നലെ വൈകുന്നേരം നാലിന് ജസോളയിലെത്തിയ കര്‍ദിനാളിനെയും സംഘത്തെയും സീറോ മലബാര്‍സഭാ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി, ഫരീദാബാദ് രൂപത ആര്‍ച്ച്ബിഷപ് മാര്‍ കുര്യാക്കോസ് ഭരണിക്കുളങ്ങര എന്നിവരുടെ നേതൃത്വത്തില്‍ സ്വീകരിച്ചു.

ജനിച്ചതും ജീവിച്ചതും പാരമ്പര്യത്തില്‍ അധിഷ്ടിതവുമായ വിശ്വാസത്തില്‍ വളരെയധികം മുന്നോട്ടു പോകാന്‍ സീറോ മലബാര്‍ സഭയ്ക്കു സാധിക്കും. വിവിധ മതങ്ങളുടെയും ഭാഷകളുടെയും സംഗമ ഭൂമിയായ രാജ്യതലസ്ഥാനത്ത് സഭയ്ക്ക് സാമൂഹ്യ രംഗങ്ങളിലും സാംസ്കാരിക രംഗങ്ങളിലും നല്ല പ്രവര്‍ത്തനങ്ങള്‍ കാഴ്ചവയ്ക്കാനാകുമെന്നും കര്‍ദിനാള്‍ ഫിലോനി അഭിപ്രായപ്പെട്ടു. ഫരീദാബാദ് രൂപതാധ്യക്ഷന്‍ ആര്‍ച്ച്ബിഷപ് മാര്‍ കുര്യാക്കോസ് ഭരണിക്കുളങ്ങരയുടെ പേര് നേരത്തെ തന്നെ ശ്രമപ്പെട്ടു പഠിച്ചതിനാല്‍ തനിക്ക് ഇപ്പോള്‍ ഒഴുക്കോടെ പറയാനാകുമെന്നും സ്വീകരണത്തിനു നല്‍കിയ മറുപടി പ്രസംഗത്തില്‍ കര്‍ദിനാള്‍ ഫിലോനി പറഞ്ഞു.


ഇന്ത്യയിലെ വത്തിക്കാന്‍ സ്ഥാനപതി ആര്‍ച്ച്ബിഷപ് സാല്‍വത്തോറെ പെനാക്കിയോ, ഡല്‍ഹി ആര്‍ച്ച്ബിഷപ് അനില്‍ ജെ.ടി. കൂട്ടോ, സഹായ മെത്രാന്‍ ഡോ. ഫ്രാങ്കോ മുളയ്ക്കല്‍, മലങ്കര സഭ ബാഹ്യകേരള അപ്പസ്തോലിക് വിസിറ്റേറ്റര്‍ ജേക്കബ് മാര്‍ ബര്‍ണബാസ് എന്നിവര്‍ സ്വീകരണ ചടങ്ങില്‍ പങ്കെടുത്തു.

സ്വീകരണ ചടങ്ങിനോട് അനുബന്ധിച്ചു നടത്തിയ പ്രത്യേക പ്രാര്‍ഥനയ്ക്കു രൂപത ചാന്‍സലര്‍ മോണ്‍. സെബാസ്റ്റ്യന്‍ വടക്കുംപാടം നേതൃത്വം നല്‍കി. ഡല്‍ഹിക്കടുത്ത് യുപി സാഹിബാബാദില്‍ പുതുതായി പണിയുന്ന സെന്റ് ജൂഡ്സ് ദേവാലയത്തിന്റെ കല്ലിടീല്‍ കര്‍മവും കര്‍ദിനാള്‍ ഫെര്‍ണാണ്േടാ ഫിലോനി നിര്‍വഹിച്ചു. കത്തോലിക്ക മെത്രാന്‍മാരുടെ ദേശീയ സംഘടനയായ സിബിസിഐ കര്‍ദിനാള്‍ ഫെര്‍ണാണ്േടാ ഫിലോനിക്ക് ഇന്നു സ്വീകരണം നല്കും.