എഫ്ഐആര്‍ റദ്ദാക്കാന്‍ എം.എം. മണി നല്‍കിയ ഹര്‍ജി സുപ്രീംകോടതി തള്ളി
സ്വന്തം ലേഖകന്‍

ന്യൂഡല്‍ഹി: രാഷ്ട്രീയ പ്രതിയോഗികളെ പട്ടിക തയാറാക്കി വകവരുത്തിയിട്ടുണ്െടന്നു പ്രസംഗത്തില്‍ വെളിപ്പെടുത്തിയതിന്റെ പേരില്‍ രജിസ്റര്‍ ചെയ്ത എഫ്ഐആര്‍ റദ്ദാക്കണമെന്ന് ആവശ്യപ്പെട്ട് സിപിഎം മുന്‍ ജില്ലാ സെക്രട്ടറി എം.എം. മണി സമര്‍പ്പിച്ച ഹര്‍ജി സുപ്രീംകോടതി തള്ളി.

മണിക്കെതിരേ ചുമത്തിയിരിക്കുന്നത് ഗുരുതരമായ കുറ്റകൃത്യങ്ങളാണെന്നും എഫ്ഐആര്‍ നിലനില്‍ക്കുന്നതാണെന്നും നിരീക്ഷിച്ച കോടതി, കേസുമായി സംസ്ഥാന സര്‍ക്കാരിനു മുന്നോട്ടുപോകാമെന്നും വ്യക്തമാക്കി. മണിയുടെ ആവശ്യം അംഗീകരിച്ചാല്‍ അന്വേഷണം നടക്കുന്ന അഞ്ചേരി ബേബി വധം ഉള്‍പ്പെടെയുള്ള കേസുകളെ ബാധിക്കുമെന്നും ജസ്റീസ് പി. സദാശിവം അധ്യക്ഷനായ ബെഞ്ച് വിലയിരുത്തി.

അന്വേഷണം പൂര്‍ത്തിയായ കേസില്‍ പുനരന്വേഷണത്തിനു നിയമം അനുവദിക്കുന്നില്ലെന്നും സര്‍ക്കാര്‍ സംവിധാനം രാഷ്ട്രീയ വിരോധത്തിന്റെ പേരില്‍ തനിക്കെതിരേ ദുരുപയോഗം ചെയ്യുകയായിരുന്നെന്നും ചൂണ്ടിക്കാട്ടിയാണ് മണി സുപ്രീംകോടതിയില്‍ ഹര്‍ജി നല്‍കിയത്. കോടതി തീര്‍പ്പാക്കിയ കേസുകളില്‍ തുടരന്വേഷണം നടത്തുന്നതു തടയണമെന്ന് ആവശ്യപ്പെട്ട് മണി സമര്‍പ്പിച്ച ഹര്‍ജി സുപ്രീംകോടതി തള്ളുകയും ചെയ്തു. പ്രസംഗത്തിന്റെ പേരില്‍ രജിസ്റര്‍ ചെയ്ത എഫ്ഐആര്‍ നിലനില്‍ക്കുമോയെന്ന ഹര്‍ജിയാണ് കോടതി പരിശോധിച്ചത്. പ്രസംഗത്തില്‍ പറഞ്ഞിരിക്കുന്ന കാര്യങ്ങള്‍ ഗൌരവത്തോടെ പരിഗണിക്കേണ്ടതാണെന്ന സംസ്ഥാന സര്‍ക്കാരിന്റെ വാദം കോടതി അംഗീകരിക്കുകയായിരുന്നു.


കൊല നടക്കുമെന്ന വിവരം മുന്‍കൂട്ടി അറിഞ്ഞിട്ടും അതു മറച്ചുവയ്ക്കല്‍, കുറ്റകൃത്യം ചെയ്യാന്‍ പ്രേരിപ്പിക്കല്‍, സമൂഹത്തിനു ഭീഷണി സൃഷ്ടിക്കല്‍ തുടങ്ങിയ കുറ്റകൃത്യങ്ങളാണു വിവാദ പ്രസംഗത്തിന്റെ പേരില്‍ മണിക്കെതിരേ ചുമത്തിയിരുന്നത്. തൊടുപുഴയിലെ മണക്കാട് സിപിഎമ്മിന്റെ രാഷ്ട്രീയ വിശദീകരണ യോഗത്തിലായിരുന്നു വിവാദമായ പരാമര്‍ശങ്ങളുണ്ടായത്. എഫ്ഐആര്‍ റദ്ദാക്കണമെന്ന മണിയുടെ ആവശ്യം ഹൈക്കോടതിയും തള്ളിയിരുന്നു.