ഐഎൻടിയുസിയെ ഒഴിവാക്കിയത് ജനാധിപത്യ വിരുദ്ധമെന്ന് ആർ. ചന്ദ്രശേഖരൻ നായർ
Wednesday, January 11, 2017 12:47 AM IST
ന്യൂഡൽഹി: കേന്ദ്ര സർക്കാരിന്റെ സമിതികളിൽ നിന്നും അന്താരാഷ്ട്ര തൊഴിൽ സംഘടനകളുടെ വേദികളിൽ നിന്നും ഐഎൻടിയുസിയെ ഒഴിവാക്കിയത് ജനാധിപത്യ വിരുദ്ധമാണെന്നു ഐഎൻടിയുസി ദേശീയ വൈസ് പ്രസിഡന്റ് ആർ. ചന്ദ്രശേഖരൻ. ഇന്ത്യയിലെ തൊഴിലാളി പ്രസ്‌ഥാനങ്ങൾക്ക് മേൽ സർക്കാർ അധികാരം ഉപയോഗിച്ചു നിരോധനം ഏർപ്പെടുത്തുന്നത് ആദ്യമായാണ്. തൊഴിലാളി പ്രസ്‌ഥാനങ്ങളുടെ അവകാശങ്ങളാണ് ഇതോടെ ഇല്ലാതാകുന്നത്. നരേന്ദ്ര മോദി സർക്കാർ അധികാരത്തിലെത്തിയ ശേഷം പൊതു മേഖല സ്‌ഥാപനങ്ങൾ വൻതോതിൽ വിദേശ ബഹുരാഷ്ട്ര കുത്തകകൾക്കു തീറെഴുതാനുള്ള ശ്രമമാണു നടക്കുന്നതെന്നും ചന്ദ്രശേഖരൻ ഡൽഹിയിൽ പത്രസമ്മേളനത്തിൽ ആരോപിച്ചു.

നേതൃനിരയിൽ തർക്കമുണ്ടെന്നും വിഷയം കോടതിയിലാണെന്നും ചൂണ്ടിക്കാട്ടിയാണ് കേന്ദ്ര സർക്കാർ ഐഎൻടിയുസിക്ക് നിരോധനം ഏർപ്പെടുത്തുന്നത്. എന്നാൽ, ഇത്തരത്തിൽ അവകാശവാദം ഉന്നയിക്കുന്നവരുടെ സാധുത സർക്കാർ പരിശോധിക്കുന്നില്ല.

നിലവിൽ ഐഎൻടിയുസിയുടെ അംഗബലം 3,330000 ആണെന്നും ചന്ദ്രശേഖരൻ ചൂണ്ടിക്കാട്ടി. തൊഴിലാളി സംഘടനകളുടെ മാനദണ്ഡങ്ങൾ നിശ്ചയിക്കാൻ സർക്കാരിന് അധികാരമില്ലെന്നും ചന്ദ്രശേഖരൻ പറഞ്ഞു.സംഘടനയ്ക്കുള്ളിൽ തർക്കമുണ്ടെന്ന് വരുത്തിത്തീർക്കാനാണ് സർക്കാർ ശ്രമിക്കുന്നത്. ഇതിനെതിരേ നിയമപരമായി നീങ്ങുന്നതിനുള്ള ശ്രമങ്ങൾ നടത്തുമെന്നും അദ്ദേഹം വ്യക്‌തമാക്കി.


കശുവണ്ടി ഇറക്കുമതിയുമായി ബന്ധപ്പെട്ട് വിജിലൻസ് കേസ് നേരിടുന്ന സംസ്‌ഥാന മന്ത്രി മേഴ്സിക്കുട്ടിയമ്മയുടെ വിഷയത്തിൽ സർക്കാർ ചട്ടങ്ങൾ ലംഘിക്കപ്പെട്ടിട്ടുണ്ടെങ്കിൽ നടപടിയുണ്ടാകണം. ഏതെങ്കിലും വിധത്തിൽ തൊഴിൽ നൽകാൻ എന്തു വില കൊടുത്തും തോട്ടണ്ടി വാങ്ങി എന്ന മേഴ്സിക്കുട്ടിയമ്മയുടെ നിലപാടിനോട് വിയോജിപ്പില്ല. ഇക്കാര്യത്തിൽ വി.ഡി സതീശൻ വിശദമായി പഠനം നടത്തിയ ശേഷമാണ് നിയമസഭയിൽ ആരോപണങ്ങൾ ഉന്നയിച്ചത്. അതിനെ പിന്തുണയ്ക്കുന്നുവെന്നും ചന്ദ്രശേഖരൻ വ്യക്‌തമാക്കി.