യുപിയിൽ എസ്പി- കോൺഗ്രസ് സഖ്യം : Deepika.com National News |

Click here for detailed news of all items

യുപിയിൽ എസ്പി- കോൺഗ്രസ് സഖ്യം

Tuesday, January 17, 2017 2:40 PM IST

ന്യൂഡൽഹി: ഉത്തർപ്രദേശിൽ അഖിലേഷ് യാദവിന് സൈക്കിൾ ചിഹ്നവും പാർട്ടി പ്രസിഡന്‍റ് സ്ഥാനവും തെരഞ്ഞെടുപ്പു കമ്മീഷൻ ഉറപ്പിച്ചു നൽകിയതോടെ സമാജ്‌വാദി പാർട്ടിയുമായി സഖ്യത്തിനു തയാറെന്നു കോണ്‍ഗ്രസ്.

യുപി തെരഞ്ഞെടുപ്പു ചുമതലയുള്ള എഐസിസി നേതാവ് ഗുലാം നബി ആസാദാണ് അഖിലേഷ് നേതൃത്വം നൽകുന്ന സമാജ്‌വാദി പാർട്ടിയുമായി ചേർന്നു കോണ്‍ഗ്രസ് നിയമസഭ തെരഞ്ഞെടുപ്പിനെ നേരിടുമെന്നു വ്യക്തമാക്കിയത്. സഖ്യം സംബന്ധിച്ചു വിശദമായ ചർച്ചകൾക്കായി കോണ്‍ഗ്രസ് ഉപാധ്യക്ഷനുമായി കൂടിക്കാഴ്ച നടത്താൻ അഖിലേഷ് യാദവ് ഉടൻ ഡൽഹിയിൽ എത്തും.

തെരഞ്ഞെടുപ്പു പ്രചാരണത്തിന് രാഹുൽ ഗാന്ധിയും അഖിലേഷ് യാദവും ഒരുമിച്ചിറങ്ങും. അതിനു പുറമേ അഖിലേഷിന്‍റെ ഭാര്യയും ലോക്സഭാ എംപിയുമായ ഡിംപിൾ യാദവും പ്രിയങ്ക ഗാന്ധിയും സജീവമായി പ്രചാരണ രംഗത്തിറങ്ങും. സീറ്റ് പങ്കിടൽ സംബന്ധിച്ച് ഇരുപാർട്ടികളും തമ്മിൽ ചർച്ച നടന്നു വരികയാണ്. എന്നാൽ, യുപിയിൽ സമാനസ്വഭാവമുള്ള മറ്റു പാർട്ടികളുമായി ചേർന്ന് മഹാസഖ്യമുണ്ടാക്കുന്നതു സംബന്ധിച്ചു പ്രതികരിക്കാൻ ഗുലാം നബി ആസാദ് വിസമ്മതിച്ചു.

ചർച്ചകൾ നടക്കുന്നുണ്ടെന്നാണു ഗുലാം നബി പറഞ്ഞത്. കോണ്‍ഗ്രസ്-എസ്പി സഖ്യം സംബന്ധിച്ച വിശദ വിവരങ്ങൾ ഉടൻതന്നെ വ്യക്തമാക്കും. നിലവിൽ അഖിലേഷിന്‍റെ നേതൃത്വത്തിൽ തെരഞ്ഞെടുപ്പിനെ നേരിടുന്നതിന് കോണ്‍ഗ്രസ് പിന്തുണ നൽകുമെന്നും അദ്ദേഹം വ്യക്തമാക്കി. കോണ്‍ഗ്രസുമായുള്ള സഖ്യം സംബന്ധിച്ച വാർത്തകൾ അഖിലേഷ് യാദവും സ്ഥീരീകരിച്ചു.

സെബി മാത്യു
———————————————————————————————————————————-

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.