ബജറ്റിനു കടുത്ത നിയന്ത്രണങ്ങൾ : Deepika.com National News |

Click here for detailed news of all items

ബജറ്റിനു കടുത്ത നിയന്ത്രണങ്ങൾ

Tuesday, January 24, 2017 3:24 PM IST

ന്യൂഡൽഹി: അഞ്ചു സംസ്ഥാനങ്ങളിൽ നിയമസഭാ തെരഞ്ഞെടുപ്പ് അടുത്തിരിക്കേ കേന്ദ്ര ബജറ്റിൽ കർക്കശ നിയന്ത്രണങ്ങളുമായി തെരഞ്ഞെടുപ്പു കമ്മീഷൻ. കേന്ദ്ര ബജറ്റ് ഫെബ്രുവരി ഒന്നിനു തന്നെ അവതരിപ്പിക്കാൻ സുപ്രീംകോടതി അനുമതി നൽകിയതിനു പിന്നാലെയാണ് നിയന്ത്രണങ്ങളുമായി കമ്മീഷനെത്തിയത്.

തെരഞ്ഞെടുപ്പ് നടക്കുന്ന സംസ്ഥാനങ്ങളിലേക്കു പ്രത്യേക പദ്ധതികൾ പ്രഖ്യാപിക്കുകയോ നടക്കുന്ന പദ്ധതികൾ വേഗം പൂർത്തീകരിക്കുന്നതടക്കമുള്ള കാര്യങ്ങൾ ചർച്ചയാക്കുകയോ ചെയ്യരുതെന്നാണു കമ്മീഷന്‍റെ മുന്നറിയിപ്പ്. വോട്ടർമാരെ സ്വാധീനിക്കാനുള്ള ശ്രമങ്ങൾ നടത്തരുതെന്ന് കേന്ദ്രസർക്കാരിനോടു നിർദേശിച്ചിട്ടുണ്ട്.

ഫെബ്രുവരി നാലിനു പഞ്ചാബിലും ഗോവയിലുമാണ് ഒറ്റഘട്ടമായി ആദ്യ പോളിംഗ് നടക്കുക. ഇതിനു മൂന്നു ദിവസം മുമ്പ് ഫെബ്രുവരി ഒന്നിനാണ് ബജറ്റ് അവതരണത്തിന് കേന്ദ്രസർക്കാർ ഒരുങ്ങുന്നത്. ഉത്തർപ്രദേശ്, പഞ്ചാബ്, ഗോവ, ഉത്തരാഖണ്ഡ്, മണിപ്പൂർ എന്നീ അഞ്ചു സംസ്ഥാനങ്ങളിലാണു ഫെബ്രുവരി നാലിനും മാർച്ച് എട്ടിനും ഇടയിൽ തെരഞ്ഞെടുപ്പു നടക്കുന്നത്. ന്യായമായും സ്വതന്ത്രമായും തെരഞ്ഞെടുപ്പ് നടക്കുന്നതിനു പ്രത്യേകം ശ്രദ്ധ വയ്ക്കണം. അതിനാൽ സംസ്ഥാനങ്ങൾ കേന്ദ്രീകരിച്ചു പ്രത്യേക പദ്ധതികൾ പ്രഖ്യാപിക്കരുത്. ധനമന്ത്രി അരുണ്‍ ജയ്റ്റ്‌ലിയുടെ പ്രസംഗത്തിൽ സർക്കാരിന്‍റെ നേട്ടങ്ങൾ വിവരിക്കരുതെന്നും നിർദേശമുണ്ട്.

അഞ്ചു സംസ്ഥാനങ്ങളിൽ തെരഞ്ഞെടുപ്പു നടക്കവേ സർക്കാരിന്‍റെ ബജറ്റ് നീക്കം വോട്ടർമാരെ സ്വാധീനിക്കാനാണെന്നു പ്രതിപക്ഷം ആക്ഷേപമുന്നയിച്ചിരുന്നു.
അഞ്ചു വർഷം മുമ്പു തെരഞ്ഞെടുപ്പ് അടുത്തപ്പോൾ കോണ്‍ഗ്രസ് നേതൃത്വം നൽകിയ യുപിഎ സർക്കാർ ബജറ്റ് മാർച്ചിലേക്ക് മാറ്റിവച്ചിരുന്നു. പോളിംഗിനുശേഷമാണ് അന്നു ബജറ്റ് അവതരിപ്പിച്ചത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.