പാക്കിസ്ഥാനിൽ കാണാതായ മുസ്‌ലിം പുരോഹിതർ ഇന്നു മടങ്ങിയെത്തുമെന്നു സുഷമ : Deepika.com National News |

ന്യൂഡൽഹി: പാക്കിസ്ഥാനിൽ കാണാതായ ഇന്ത്യയിൽ നിന്നുള്ള മുസ്‌ലിം പുരോഹിതർ ഇന്നു മടങ്ങിയെത്തുമെന്നു കേന്ദ്ര വിദേശകാര്യമന്ത്രി സുഷമ സ്വരാജ്. ഇപ്പോൾ കറാച്ചിയിലുള്ള ഹസ്രത് നിസാമുദീൻ ദർഗയിലെ പുരോഹിതൻ സയിദ് നസിം അലി നിസാമിയുമായി സംസാരിച്ചെന്നും ഇരുവരും സുരക്ഷിതരാണെന്നും ട്വിറ്ററിലിട്ട കുറിപ്പിൽ സുഷമ അറിയിച്ചു.

പാക്കിസ്ഥാൻ സന്ദർശനം നടത്തുന്നതിനിടെ ഹസ്രത് നിസാമുദീൻ ദർഗയിലെ മുഖ്യപുരോഹിതൻ സയിദ് ആസിഫ് അലി നിസാമിയെയും അദ്ദേഹത്തിന്‍റെ മരുമകൻ നസിം അലി നിസാമിയെയും കാണാതായത് വാർത്തയായിരുന്നു. ഇതേത്തുടർന്ന് നടത്തിയ അന്വേഷണത്തിൽ ഇവർ പാക് ഇന്‍റലിജൻസ് ഏജൻസിയുടെ പിടിയിലാണെന്ന് കണ്ടെത്തി. മുത്താഹിദ ക്വാമി പ്രസ്ഥാനവുമായി ബന്ധമുണ്ടെന്ന സംശയത്തെ തുടർന്നാണ് ഇന്‍റലിജൻസ് ഏജൻസി കസ്റ്റഡിയിലെടുത്തതെന്നും അല്ലായെന്നു തെളിഞ്ഞതിനാൽ ഇവരെ വിട്ടയക്കുമെന്ന് പാക് അധികൃതർ അറിയിച്ചിരുന്നു.

പുരോഹിതരെ കാണാതായെന്ന വാർത്തകളെ തുടർന്ന് സുഷമ, പാക്കിസ്ഥാൻ പ്രധാനമന്ത്രിയുടെ വിദേശകാര്യ ഉപദേഷ്ടാവ് സർതാജ് അസീസുമായി സംസാരിച്ചിരുന്നു. ഇതിന്‍റെ അടിസ്ഥാനത്തിലാണ് ഇവരെ കസ്റ്റഡിയിൽ നിന്നു വിട്ടയച്ച കാര്യം പാക് അധികൃതർ കേന്ദ്ര സർക്കാരിനെ അറിയിച്ചത്.