ആശുപത്രിയിലെത്തിച്ച വൃദ്ധയെ തെരുവുനായ്ക്കൾ കടിച്ചുകീറി കൊന്നു : Deepika.com National News |

ഭോപ്പാൽ: അവശനിലയിൽ ആശുപത്രിയിൽ പ്രവേശിപ്പിച്ച വൃദ്ധയെ തെരുവുനായ്ക്കൾ കടിച്ചുകീറി കൊന്നു ഭക്ഷണമാക്കി. മധ്യപ്രദേശിലെ രാജ്ഗഡിലാണു ദാരുണമായ സംഭവം നടന്നത്.

തെരുവിൽ അലഞ്ഞുനടന്നിരുന്ന ബിസ്മില്ല എന്ന എണ്‍പതുകാരിയെ പോലീസാണ് ആശുപത്രിയിൽ എത്തിച്ചത്. ഈമാസം 19ന് ഇവിടെനിന്നു വൃദ്ധയെ കാണാതായിരുന്നെങ്കിലും വിവരം ആശുപത്രി അധികൃതരുടെ ശ്രദ്ധയിൽപ്പെട്ടിരുന്നില്ല. കഴിഞ്ഞദിവസം പ്രസവ വാർഡിനു സമീപത്ത് രൂക്ഷ ദുർഗന്ധം അനുഭവപ്പെട്ടതിനെത്തുടർന്നു നടത്തിയ പരിശോധനയിലാണു വൃദ്ധയുടെ മൃതദേഹം കണ്ടെത്തിയത്.

മൃതദേഹത്തിന്‍റെ പകുതി ഭാഗം നായ്ക്കൾ ഭക്ഷിച്ച നിലയിലായിരുന്നെന്നുചീഫ് മെഡിക്കൽ ഓഫീസർ ഡോ.എസ്.എസ്.ഗുപ്ത പറഞ്ഞു.

മൃതദേഹത്തിന്‍റെ മേൽഭാഗം പൂർണമായി നായ്ക്കൾ ഭക്ഷണമാക്കി. ആരുടെയും ശ്രദ്ധയിൽപ്പെടാതെ ആശുപത്രിയിൽനിന്നു പുറത്തിറങ്ങിയ ഇവരെ നായ്ക്കൾ കടിച്ചുകീറിയതാകാനാണു സാധ്യതയെന്നു ഡോ.എസ്.എസ്.ഗുപ്ത പറഞ്ഞു.ആുപത്രിയിൽനിന്ന് ഇവരെ കാണാതായിരുന്നെങ്കിലും അധികൃതർ പോലീസിൽ പരാതി നൽകിയിരുന്നില്ല. ഗുണ ജില്ലയിലെ മധുസുദൻഗഡ് സ്വദേശിയായ വൃദ്ധയുടെ ശേഷിച്ച ശരീരഭാഗങ്ങൾ ബന്ധുക്കൾക്കു കൈമാറി. സംഭവത്തെക്കുറിച്ചു പോലീസ് അന്വേഷണം ആരംഭിച്ചു.