പാക് പ്രധാനമന്ത്രിക്ക് എതിരേയുള്ള കോടതിയലക്ഷ്യ നോട്ടീസ് പിന്‍വലിച്ചു
ഇസ്്ലാമാബാദ്: പാക് പ്രധാനമന്ത്രിക്ക് എതിരേ കോടതിയലക്ഷ്യക്കേസില്‍ നല്‍കിയ നോട്ടീസ് സുപ്രീംകോടതി പിന്‍വലിച്ചു. പ്രസിഡന്റ് അസിഫ് അലി സര്‍ദാരിക്ക് എതിരേയുള്ള അഴിമതിക്കേസ് പുനരാരംഭിക്കണമെന്നാവശ്യപ്പെട്ട് സ്വിസ് സര്‍ക്കാരിന് കത്തെഴുതണമെന്ന കോടതി ഉത്തരവ് പാലിച്ച സാഹചര്യത്തിലാണിത്.

കത്തു കിട്ടിയെന്ന് അറിയിച്ച് സ്വിസ് സര്‍ക്കാര്‍ അയച്ച രേഖ നിയമമന്ത്രി ഫറൂക് നായിക് കോടതിയില്‍ ഹാജരാക്കി. ഇതെത്തുടര്‍ന്ന് ജസ്റീസ് അന്‍വര്‍ സഹീര്‍ ജമാലി അധ്യക്ഷനായുള്ള അഞ്ചംഗ സുപ്രീംകോടതി ബഞ്ച് നോട്ടീസ് പിന്‍വലിക്കുകയായിരുന്നു.


സുപ്രീംകോടതിയുടെ നിര്‍ദേശങ്ങളെല്ലാം സര്‍ക്കാര്‍ പാലിച്ചതായി നിയമമന്ത്രി റിപ്പോര്‍ട്ടര്‍മാരോടു പറഞ്ഞു. സര്‍ദാരിക്ക് എതിരേയുള്ള കേസ് അവസാനിപ്പിക്കണമെന്നു നിര്‍ദേശിച്ച് മുന്‍ അറ്റോര്‍ണി ജനറല്‍ അയച്ച കത്ത് പിന്‍വലിക്കണമെന്നായിരുന്നു കോടതിയുത്തരവ്. ഇതനുസരിച്ച് തയാറാക്കിയ കത്തിന്റെ കരട് കോടതിയെ കാണിച്ചശേഷമാണ് അയച്ചത്. ഇപ്രകാരം കത്തയയ്ക്കുന്നതില്‍ വീഴ്ച വരുത്തിയതിനെത്തുടര്‍ന്നായിരുന്നു മുന്‍ പ്രധാനമന്ത്രി ഗീലാനിക്ക് അധികാരം നഷ്ടപ്പെട്ടത്.