ഈജിപ്തില്‍ ട്രെയിന്‍ ബസിലിടിച്ച് 50 നഴ്സറി കുട്ടികള്‍ മരിച്ചു
കെയ്റോ: മധ്യ ഈജിപ്തില്‍ ലെവല്‍ക്രോസ് മുറിച്ചുകടക്കുകയായിരുന്ന സ്കൂള്‍ ബസില്‍ ട്രെയിനിടിച്ച് 47 നഴ്സറി കുട്ടികളടക്കം 50 പേര്‍ മരിച്ചു. നാലിനും ആറിനും ഇടയില്‍ പ്രായമുള്ള കുട്ടികളാണു മരിച്ചത്. 18 പേര്‍ക്കു പരിക്കേറ്റു. സിഗ്നല്‍ കാണിക്കേണ്ട ജോലിക്കാരന്‍ ഉറങ്ങിപ്പോയതാണ് അപകടത്തിനു കാരണം.

അസിയുത് പ്രവിശ്യയിലെ മന്‍ഫലുത് ഗ്രാമത്തിലാണ് സംഭവം. അറുപതു കുട്ടികളാണ് ബസിലുണ്ടായിരുന്നത്. മരിച്ച മുതിര്‍ന്ന രണ്ടുപേര്‍ ഡ്രൈവറും ഒരു സ്ത്രീയുമാണ്. തുറന്നുകിടക്കുകയായിരുന്ന ലെവല്‍ക്രോസ് മുറിച്ചുകടക്കുകയായിരുന്ന ബസില്‍ അതിവേഗത്തിലെത്തിയ ട്രെയിന്‍ ഇടിക്കുകയായിരുന്നു. ലെവല്‍ക്രോസിലെ ജീവനക്കാരന്‍ ഗെയിറ്റ് തുറന്നിട്ട് ഉറങ്ങിപ്പോയതാണ് അപകടത്തിനു കാരണമെന്ന് അധികൃതര്‍ വിശദമാക്കി. ഇയാളെ അറസ്റ് ചെയ്തു.


അപകടത്തിന്റെ ഉത്തരവാദിത്വം ഏറ്റെടുത്ത് ഗതാഗതമന്ത്രി റഷാദ് അല്‍ മദീനിയും റെയില്‍വേ അഥോറിറ്റി മേധാവി മുസ്തഫ ഖെനാവിയും രാജിവച്ചു. രാജി പ്രസിഡന്റ് മുഹമ്മദ് മുര്‍സി അംഗീകരിച്ചു.

മൃതദേഹങ്ങള്‍ തിരിച്ചറിയാനാവാത്തവിധമാണ്.അപകടസ്ഥലത്തെത്തിയ ബന്ധുക്കള്‍ ചിതറിക്കിടക്കുന്ന ശരീരഭാഗങ്ങള്‍ ശേഖരിക്കുന്നതു കണ്ടതായി ദൃക്സാക്ഷികള്‍ പറഞ്ഞു. ബന്ധുക്കളും നാട്ടുകാരും റോഡ് ഉപരോധമടക്കം ശക്തമായ പ്രതിഷേധം നടത്തി. പരിക്കേറ്റവരെ നോക്കാന്‍ 45 ഡോക്ടര്‍മാര്‍ അടങ്ങിയ സംഘത്തെ നിയോഗിച്ചിട്ടുണ്ട്. പ്രധാനമന്ത്രി ഹിഷാം കാന്‍ഡില്‍ സംഭവസ്ഥലം സന്ദര്‍ശിച്ചു.